4
Ha Mangilasilan Taku Si Tuttuwa Ya Tuntulli
1 Bubuɏunkuʼn ay-ayatok, achiyu patiyon cha taguʼn mangibyegbyega un awed kalu Ispiritun Apudyus kan chicha. Ngim paloklokanyu yan lu tuttuwaʼn si Apudyus chi lampeɏpuwan chi hachiʼn ispiritu. Ti ummachu cha tuntulliʼn propeta un lummoswa utla lubung.
2 Kamatla mangilasilanyu lu tuttuwaʼn Ispiritun Apudyus: Lu bigbigola un ummali si Jesu Kristu utla pita un lambyalin tagu, awed kan siya Ispiritu un lampeɏpu kan Apudyus.
3 Ngim lu achipunla bigbigon un lambyalin tagu si Jesus, lappun kan siya Ispiritu un lampeɏpu kan Apudyus. Ngim lampeɏpu si kabusuɏn Kristu ispiritu un awed kan siya. Chingchingngeɏyu un ummali hachiʼn kabusuɏn Kristu, ked awed utla lubung.
4 Ngim chikayuʼn imbilangkuʼn aalakku, uwa chikayu kan Apudyus ked illogyu cha silan-propeta, ti ha Ispiritun Apudyus un awed kan chikayu ked mallakabyelin lu si Satalas un mangituray kan cha achipun mamati.
5 Cha allaʼn silan-propeta, chicha cha tagu un ha ugalicha suɏutoncha cha lailubungan un sumupling si pion Apudyus, ked ha itudtuchucha, cha mitimbuɏuy si ugalicha, ked cha achipun mamati pionchaʼn chochongɏon chicha.
6 Ngim chitaku uwan Apudyus, ked cha mangagammu kan Apudyus, pionchaʼn chochongɏon chi itudtuchu taku, ngim cha chakampun un uwan Apudyus, issanchaʼn chongɏon chitaku. Ked hachi mangagammuwan taku lu himma lampeɏpuwan chi itudtuchucha, ha Ispiritun Apudyus un puun chi katuttuwaan willu Satalas un puun chi tuntulli.
Ha Man-aayat Apudyus
(1Co. 13)
7 Bubuɏunku, man-asiayat taku ti si Apudyus chi puun chi ayat. Ked ha mangay-ayat kan cha susuludla, lalaweg un siya ked alak Apudyus ya ammula si Apudyus.
8 Ngim ha taguʼn lappun ayatla, lappun teɏon ammula kan Apudyus ti si Apudyus ked ayat.
9 Ked ha ilon Apudyus un langipaila kan chitaku si man-aayatla, imbuunla ossaan un Alakla si allaʼn pita taplu makatagu taku kan siya si ing-inggala mipagapu kan siya.
10 Kamatla tuttuwaʼn ayat: Chakampun un ha man-aayat taku kan Apudyus ngim ha man-aayatla kan chitaku ya langibuulala si Alakla ta mapakawan cha byasbyasuɏ taku.
11 Bubuɏunkuʼn ay-ayatok, lu kamatla man-aayat Apudyus kan chitaku, masapuɏʼn man-asiayat taku.
12 Lappun tagu si langitullong kan Apudyus ngim lu man-asiayat taku, iinggew si Apudyus kan chitaku ked maila si biyeg taku chi ayat Apudyus un lappun mangkuɏangala.
13 Ha mangagammuwan taku un iinggew taku kan Apudyus ya iinggew bo si Apudyus kan chitaku, ti illidchola Ispiritula kan chitaku.
14 Ked chikami, intullongmi si Jesus kan sistiguwanmi un imbuun Apudyus chi Alakla utla pita ta siya Malagu kan cha tagu.
15 Ked lu silu mamigbig un Alak Apudyus si Jesus, iinggew si Apudyus kan siya ya iinggew bo siya kan Apudyus.
16 Ked tilagammu taku ya mamati taku si ayat Apudyus kan chitaku.
Si Apudyus ayat, ked iinggew kan Apudyus chi mangay-ayat kan cha suludla, ked iinggew bo kan siya si Apudyus.
17 Ked lu kamatchi man-aayat taku, machogchog-an inggala lappun mangkuɏangala ked lappun umogyatan taku si hachiʼn eɏgew un manguisan Apudyus kan cha losan un tagu, ti mitimbuɏuy chi mambibiyeg taku kan cha ugalin Kristu.
18 Lu awed ayat taku kan Apudyus, lappun pulus ogyat taku, ti ha ayat un lappun mangkuɏangala, kaalola ogyat. Ti ha leɏpuwan chi ogyat, malosomkan si chusan Apudyus. Ked lu silu umogyat, langkuɏang chi ayatla.
19 Man-asiayat taku ti ummun-ula un ilay-ayat chitaku kan Apudyus.
20 Lu awed mangibyega un ay-ayatola si Apudyus ngim lawwingola bo suludla, ked matuli. Ti lu achipunla ayaton chi suludla un itutullongla, ma in-ilolaʼn mangayat kan Apudyus un achipunla intullong.
21 Allaya imbilin Apudyus kan chitaku: Lu silu mangay-ayat kan Apudyus, masapuɏ boʼn ayatola cha susuludlaʼn mamati.