15
Ha Langipuɏangancha Kan Jesus Kan Pilate
(Mat. 27:1-2, 11-14; Luk. 23:1-5; Jhn. 18:28-38)
1 Bigbigat pun, lan-uugud cha ap-apun cha papachi, cha pallakayon cha Judio, cha mimistulun chi lintog ya cha kukunsiseɏ. Lan-uuguchencha lu silu kooncha kan Jesus. Ot pilungucha siya ot illiyoycha impuɏang kan Pilate.
2 Ot ilimus Pilate kan Jesus, “Sika kamma Arin cha Judio?”
Ot summongbyat si Jesus, “Siya imbyegam.”
3 Achu ipabyasuɏn cha ap-apun cha papachi kan siya.
4 Ot kasin Pilate ilimus kan siya, “Ha lappun isongbyatlu kan cha allaʼn ipabyasuɏcha kan sika?”
5 Ngim lappun insongbyat Jesus. Ot laschaaw si Pilate.
Lakodchongan Si Jesus Un Mapatoy
(Mat. 27:15-26; Luk. 23:13-25; Jhn. 18:39--19:16)
6 Si timpun chi Piyastaʼn Lallausan, ugalin Pilate un ibukatla osaʼn byaɏud un chawaton cha tagu.
7 Si hachiʼn timpu, inggew chi osaʼn leɏakiʼn mangngachen Barabbas un libyaɏud, kadwala cha summupling si gubillu un pummatoy si langguluwancha.
8 Ot lachagup pun cha amod un tagu, chilawatcha kan Pilate un ibukatla osaʼn byaɏud ti siya ugalila.
9 Kalan Pilate kan chicha, “Pionyu un ibukatku Arin cha Judio?”
10 Ilimusla hachi ti ammula un impuɏang cha ap-apun cha papachi si Jesus kan siya gapu si aposcha.
11 Ngim silugsugen cha ap-apun cha papachi cha amod un tagu ta ibukat Pilate si Barabbas chakampun un Jesus.
12 Ot ingkasin Pilate kalan kan chicha, “Ked himma kook si allaʼn taguʼn ngadlonyu Arin cha Judio?”
13 Impakuycha un kalancha, “Ilansam si krus!”
14 Ot ilimus bo Pilate kan chicha, “Puggey? Himma lawwik un kingwala?”
Ngim ilam-amodcha impakuy, “Ilansam si krus!”
15 Ked gapu ta pion Pilate un mat-op cha amod un tagu, imbukatla si Barabbas. Ngim si Jesus, impabokbokla siya ot lagamput pun, impuɏangla siya kan cha susuɏchachu ta ilansacha siya si krus.
Ilam-amsiw Cha Suɏchachu Si Jesus
(Mat. 27:27-31; Jhn. 19:2-3)
16 Ot illillok cha suɏchachu si Jesus si byeɏoy gubillachuɏ ot ilayagencha cha losan un biɏuncha un suɏchachu.
17 Ot sililupancha siya si mancheɏaeg un isun chi silup chi Ari. Ot bummalikugcha si wakeɏ un lalassilassiyan ot imbyangaɏatcha si uɏula.
18 Ot impakupakuycha kan siya un kalancha, “Matataguka un Arin cha Judio!”
19 Ot pin-acha uɏula pilat-uwan ya pin-acha siya tiluppaan. Lampalintumingcha si sangwalala un aginchachayaw kan siya.
20 Lagamputcha pun siya ilam-amsiw, kilaancha mancheɏaeg un insilupcha kan siya ot iggacha uwalaʼn silup. Ot illawacha ta umoycha ilansa si krus.
Ha Lilansaan Jesus Si Krus
(Mat. 27:32-44; Luk. 23:26-43; Jhn. 19:17-27)
21 Si inggewancha si chaɏan, ilabotcha si Simon un iCyrene. Siya aman cha Alexander kan Rufus. Lampeɏpu si Simon si tattaɏun un umoy si suidad. Impatut cha suɏchachu impabukud chi krus Jesus.
22 Illiyoycha si Jesus si lugeɏ un ngadloncha Golgotha, piolaʼn uguchon, “Igew chi Bettukeg.”
23 Ot illidchencha siya si byeyas un lakamsan si mirra, ngim illissala.
24 Ot illansacha siya si krus, ot lambibillulutcha lu silu makaaɏa si silupla.
25 Ustu un machigas chi langilansaancha kan siya si krus.
26 Inggew chi liigili si krusla, un impabyasuɏcha kan siya, un kalala, “Arin cha Judio.”
27 Awed bo lilansa si krus un chuwaʼn akkawan si cheegla, osa si machuwalan ya osa si machuwigi.
28 Latungpeɏ chi liigili si ugud Apudyus un kalala, “Litakuɏung siya kan cha akkawan.”
29 Ked cha hachiʼn taguʼn lummaus, mawwigiwigiwigcha un mangam-amsiw kan siya, un kalancha, “Lo, sikaʼn manyam-an si templo ked kasinlu bo pauchon si tiɏuʼn eɏgew.
30 Taguwom chi long-eglu, ked lumogsedka si kruslu!”
31 Siya bo killingwan cha ap-apun cha papachi ya cha mimistulun chi lintog un langam-amsiw kan Jesus. Kalancha, “Tilagula cha uchum, ngim achipunla makwaʼn taguwon chi long-egla!
32 Lu siya Kristu un Ari taku un galak Israel, lumogsed otyan si halat un krus ta lu itullong taku ked mamati taku.” Ulay cha hachiʼn lilansa si krus si cheegla, ilamsiwcha bo siya.
Ha Latoyan Jesus
(Mat. 27:45-56; Luk. 23:44-49; Jhn. 19:28-30)
33 Lummamatuk pun, gummikbot losan chi ili inggala lummachema.
34 Ot si hachiʼn machema, impakuy Jesus un kalala, “Eloi, Eloi, lama sabaktani?” Ha piolaʼn uguchon, “Apudyusku, Apudyusku, puggey sakon man-awichen?”
35 Chingngeɏn pun cha uchum un summisiked chi imbyegala, kalancha, “Chongɏonyu ked, ayagela si Elijah!”
36 Ot lalodchak chi osa ummoy langaɏa si isun chi kapas ot illusongla si summukan byeyas, ot impakatla si salipat ot inchuwela kan Jesus ta ilumola, un kalala, “Oli, ta ilan taku u lu umalin Elijah opason siya.”
37 Ot lan-ichakeɏn Jesus chi agaegla, ot latoy.
38 Si hachi, kakma lapissay un langkadwa ketilan chi templo un lallugi si ngatu inggalaʼd cheɏa.
39 Intullong pun chi kapitan cha suɏchachuʼn summisiked si sangwalan Jesus chi in-ilolaʼn latoy, kalala, “Tuttuwan siya Alak Apudyus!”
40 Illinggew bo cha uchum un byebyaiʼn lan-oottap. Cha uchum kan chicha ked cha Mary Magdalene, Salome ya si Mary un ilan cha James un kaalakan ya si Joses.
41 Chicha lituntun-ud kan Jesus si inggewalaʼd Galilee un tummuɏung si cha kasapuɏala. Achu bo cha illinggew un byebyai un litun-ud kan siya si ummoyala ud Jerusalem.
Ha Liimbolan Jesus
(Mat. 27:57-61; Luk. 23:50-56; Jhn. 19:38-42)
42 Lummaschom pun, un lansagalaan cha Judio si Sabyechu un man-illongan,
43 lantuntuled ummoy si Joseph un iyArimathea kan Pilate ta chawatola lecheg Jesus. Siya ked osaʼn machaychayaw un kukunsiseɏ ya osa boʼn manguuway si Mampangatan Apudyus.
44 Laschaaw si Pilate un langngeɏ un lagamput latoy si Jesus. Ot impaayegla kapitan cha suɏchachu, ot ilimusla lu tuttuwaʼn latoy si Jesus.
45 Ot laammuwala pun kan kapitan cha suɏchachu un tuttuwaʼn latoy si Jesus, impalubus Pilate un aɏan Joseph chi lecheg Jesus.
46 Ot ngummila si Joseph si mamputilak un luput. Ot ummoyla ilopas chi lecheg Jesus si krus ot bilussungla si hachiʼn luput. Ot ummoyla illigga si lobon un tilikitikanchaʼn byetu. Ot liligedla chakeɏʼn byetu ta iplotla si sawang chi lobon.
47 Cha Mary Magdalene ya Mary un ilan Joses, intullongcha liimbolan Jesus.