3
Lampasagalaon John Un Mambubunyeg Cha Tagu
(Mrk. 1:1-18; Luk. 3:1-20; Jhn. 1:19-28)
1 Si hachiʼn timpuʼn inggewan Jesus ud Nazareth. Inggew chi osaʼn leɏakiʼn mangngachen John un Mambubunyeg. Ummoy si lugeɏ ud Judea un lappun ummili ot lambyegbyega kan cha taguʼn kummatam kan siya.
2 Kalala, “Ibyabyawiyu cha byasbyasuɏyu ti chanchali Mampangatan Apudyus.”
3 Si John chi hachiʼn ibyegbyegan propeta Isaiah un kalala,
“Awed chi osaʼn tagu un inggew si lugeɏʼn lappun ummili un ip-ipkawla un,
‘Pabiɏuwonyu somsomokyu ya mansagala kayu un isun chi ileɏamyu chaɏan un ayon chi Ari.’ ”
4 Ha silup John, lilagaʼn chutchut chi kameɏ, ked ha sintulunla gedchang, ha kakallola ked chuchun ya chilu.
5 Amod cha taguʼn ummoy lanchongeɏ si intudtuchula un lampeɏpuʼd Jerusalem ya losan un iliʼn sakupon chi probinsiya ud Judea ya ulay ili-iliʼn mampachewwang un Jordan.
6 Ot lan-ipudlucha kan cha byasbyasuɏcha ot bilunyagen John chicha si chewwang un Jordan.
7 Ngim intullong pun John cha amod un Pariseo kan cha Saduceo un umoy mampabunyeg kan siya, kalala kan chicha, “Chikayuʼn lasikap un isun chi uɏog, silu langibyega kan chikayu un milisiyu chusan Apudyus lu mampabunyeg kayu?
8 Masapuɏʼn koonyu cha losan un mangipaila un tuttuwaʼn lambyabyawi kayu kan cha byasbyasuɏyu.
9 Achiyu kalan un milisiyu kachusaanyu gapu ta galak chikayu kan Abraham. Ti ibyegak kan chikayu un makwaʼn mambyalilon Apudyus cha byetuʼn alla un galak Abraham.
10 Si Apudyus isun chi taguʼn iyaallala wasaylaʼn mamokpok si puun chi kayu. Losan un kayuʼn achipun mamunga si bibiɏu ked mapokpok ya mitungu si apuy.
11 “Bunyagek chikayu si chelum un mangipaila un lambyabyawi kayu kan cha byasbyasuɏyu. Ngim ha misagsagulud kan sakon, bunyagela chikayu si Ispiritun Apudyus ya apuy. Langatngatu siya si achayu lu sakon ked achipulak lumbong un mamigging si sancheɏla.
12 Ked lu umali siya ilasinla cha bibiɏu un tagu si cha lawwing un tagu, miyalig si mantopa un mansilaola bilayu ya chugi. Ha bilayu iteponla si aɏang ngim ha chugi ibyellula si apuy un achipun masobsobyen.”
Ha Lampabunyagen Jesus
(Mrk. 1:9-11; Luk. 3:21-22)
13 Si hachiʼn timpu gummatong si Jesus un lampeɏpuʼd Galilee ot ummoy chewwang un Jordan ta mampabunyeg kan John.
14 Ngim achipun John pion un bunyagen siya, ot kalala, “Sakon chi masapuɏʼn bunyagem. Puggey un sika bugga umali mampabunyeg kan sakon?”
15 Ngim kalan Jesus un summongbyat, “Chowot sika mamunyeg kan sakon si sala, ti kasapuɏan un koon taku cha losan un ipakwan Apudyus kan chitaku.” Ot inteun John un bunyagen siya.
16 Lagamput pun labunyagen si Jesus, ummopwas siya si chelum, ot liwalit ud langit ot intullongla Ispiritun Apudyus un isun chi kalapati un lan-osog ot lansap-oy kan siya.
17 Ot ladngeɏ ginga un lampeɏpuʼd langit un kalala, “Liya Alakkuʼn tagtagopok ya masmas-omak kan siya.”