9
Pilalin-awan Jesus Chi Taguʼn Lapalalais
(Mrk. 2:1-12; Luk. 5:17-26)
1 Oli pun lambyangka cha Jesus kasin ot chummemangcha si byeybyey ot langulin si ilila.
2 Lichuumcha pun si ili, inggetong cha tagu leɏakiʼn bilubulligenchaʼn lapalalais. Laammuwan pun Jesus chi gettok un pammaticha kan siya, kalala si lapalalais, “Alakku, pakoscheɏom chi somsomoklu. Lapakawan cha byasuɏm.”
3 Ot sin-aayumimit cha uchum un mimistulun chi lintog un kalancha, “Palaggey iyisu long-egla kan Apudyus!”
4 Ammun Jesus chi awed si somsomokcha ot kalala, “Puggey un lawwing chi somsomokyu?
5 Simma lagodgochong un ibyega, ‘Lapakawan cha byasuɏm,’ willu ‘Lumibbyatka ked malidchaɏanka?’
6 Allaya maligammuwanyu un Sakon un Alak chi Tagu, alla kalobbongak utla pita un mamakawan si byasuɏ.” Ot kalala si hachiʼn lapalalais, “Lumibbyatka, eɏam chi oboklu ya ingkan uwayu!”
7 Ot lummibbyat chi hachiʼn lapalalais ot ummoyon.
8 Intullong pun cha amod un tagu lakwa, laschaawcha ya ummogyatcha, ot chilaychayawcha si Apudyus un langatod si kamatchiʼn kalobbongan kan cha tagu.
Ha Langayagen Jesus Kan Matthew Ta Mandisipulusla
(Mrk. 2:13-17; Luk. 5:27-32)
9 Ot ummoyon si Jesus udchi ot si lalidtidchaɏalala intullongla osaʼn manchachagup si bugis un mangngachen Matthew un umaammuy si opisilala. Ot kalan Jesus kan siya, “Tun-ucholak.” Ot lummibbyat si Matthew ot litun-ud kan siya.
10 Si ummoyan cha Jesus ya cha disipulusla langalan ud uwancha Matthew, ummoy lakakan cha achuʼn kakadwan Matthew un manchachagup si bugis ya cha uchum un malagbyasuɏ.
11 Intullong pun cha Pariseo chicha, ilimuscha kan cha disipulus Jesus, “Puggey makakan chi Apuyu kan cha manchachagup si bugis ya cha malagbyasuɏ?”
12 Chingngeɏn ked Jesus chicha, summongbyat, “Ha taguʼn lappun sakitla, achipunla masapuɏ chuktuɏ. Ngim ha makasapuɏ ked ha lasakit.
13 Ingkayu amman achaɏon chi pion chi ugud Apudyus un ibyega un kalala, ‘Siyad piok chi kumachegu kayu kan cha asintataguyu. Chakampun si piok cha ichatchatunyu kan sakon.’ Ti siyad ummaliyak taplu ayagek cha taguʼn malagbyasuɏ ta mambyabyawicha, chakampun un cha taguʼn singkalan un lalintogcha.”
Im-imus Cha Disipulus John Mipanggop Si Mallaun
(Mrk. 2:18-20; Luk. 5:33-35)
14 Oli pun ummoy cha disipulus John un Mambubunyeg lakaimus kan Jesus, “Puggey un chikami ya cha Pariseo, mangankallayun kami mallaun, ngim cha disipuluslu achipuncha mallaun?”
15 Ot inyalig Jesus un summongbyat, kalala, “Ha makwa kamman un mallaun cha bubuɏun chi leɏakiʼn mangkaseɏ lu awed cha kan siya? Mangancha bò amin. Ngim gumatong chi timpu un miyachayu likaseɏ kan chicha, ked hachi asicha mallaulan.”
Mipanggop Si Tudtuchun Jesus
(Mrk. 2:21-22; Luk. 5:36-39)
16 Ot kasin lan-alig si Jesus un kalala, “Lappun tagù mangitekup si baruʼn luput si chachaan un silup ti lu kumsin chi baruʼn luput, ked maam-amod mapissay chi silup.
17 Ya lappun tagù mangigga si ilabuyu un byeyas si chachaan un giledchang un iiggaan ti bumtak chi hachiʼn gedchang ked misuyat chi byeyas ya mayam-an chi gedchang. Ngim siyad kopyala, ha ilabuyu un byeyas masapuɏʼn maigga si baruʼn giledchang un iiggaan taplu man-isuʼn michulincha.”
Tilagun Jesus Chi Byebyeɏasang Ya Pilalin-awala Lambuɏubuɏus Un Byebyai
(Mrk. 5:21-43; Luk. 8:40-56)
18 Sissiyaʼn man-ugu-ugud si Jesus kan chicha, ot gummatong chi osaʼn pangat chi sinagogan cha Judio. Lampalintuming si sangwalanla ot kalala, “Kakkatoy chi alakkuʼn byebyai, ngim lu umalika ta appachem siya, matagu kasin.”
19 Oli pun lummibbyat si Jesus ya cha disipulusla ot litun-udcha kan siya.
20 Inggew chi osaʼn byebyai un mambuɏubuɏus si lasawaɏan si chuwaʼn tawon. Ummoy si ochogen Jesus ot ilappachela pegpeg chi silupla,
21 ti ha somsomokla, “Samela gey lu maappachek chi silupla, ta lumin-awaak.”
22 Oli pun lantuwili si Jesus ot intullongla siya, ot kalala, “Pakoscheɏom chi somsomoklu, alakku! Gapu si pammatim kan sakon, lumin-awaka.” Ot kakma lummin-awa byebyai.
23 Gummatong pun cha Jesus si byeɏoy chi pangat chi sinagoga, lilumlokcha ot intullongla cha malungtungngali ya cha amod un taguʼn lappun kapuutancha,
24 kalala kan chicha, “Lumawa kayu, chakampun si latoy chi allaʼn byebyeɏasang, lasusuyop abus.” Ot liyokyokcha siya.
25 Lummawa pun cha amod un tagu, lilumlok si Jesus si chaɏom ot iloglela imala ot bummangon chi byebyeɏasang.
26 Ot lanchilameg chi killingwan Jesus si losan un sakup chi hachiʼn ili.
Pilalin-awan Jesus Cha Chuwaʼn Kuɏap
27 Ummoyon si Jesus, ot si malidtidchaɏalala, tilun-ud cha chuwaʼn lakuɏap un ip-ipkawcha, “Galak David, kacheguwam u chikami!”
28 Lilumlok pun si Jesus si byeɏoy, lilumlok bo cha hachiʼn chuwaʼn lakuɏap. Ilimus Jesus kan chicha, “Ha mamati kayuʼn makwak un kaalon chi kuɏapyu?”
Ot summongbyatcha, “O, Apu.”
29 Ot ilappachen Jesus chi atacha un kalala, “Gapu si pammatiyu, makwa.”
30 Oli pun makatullongcha. Ot bililin Jesus chichaʼn ustu un kalala, “Achiyu ibyegbyega ulay silu.”
31 Ngim ummoyoncha pun, inweɏawegcha chameg mipanggop kan Jesus si losan un sakup chi hachiʼn ili.
Pileɏyaw Jesus Chi Aɏan Si Osaʼn Laumeɏ
32 Ummoyon ked cha hachiʼn lakuɏap, illiyoy bo cha uchum kan Jesus chi osaʼn leɏakiʼn laumeɏ gapu ta laaɏan.
33 Pileɏyaw pun Jesus chi aɏan, gumminga hachiʼn leɏaki. Laschaaw cha amod un tagu ot kalancha, “Lappun illila takù katlaʼn lakwaʼd Israel!”
34 Ngim kalan cha Pariseo, “Awed kan siya pangat cha aɏan ked siya chi langatod kan Jesus si kilabyelin un mameɏyaw kan cha aɏan.”
Kilacheguwan Jesus Cha Tagu
(Luk. 10:2)
35 Ot lilikwos Jesus cha ili-ili un lantudtuchu ud cha sinagoga. Imbyegbyegala Bibiɏuʼn chameg mipanggop si Mampangatan Apudyus ya pilalin-awala bo cha losan un kalasin cha saksakit cha tagu ya sigeb chi long-egcha.
36 Intullongla pun cha amo-amod un tagu, kilacheguwala chicha ti maligligatancha ya kakkaasicha. Isucha keɏlilu un lappun mangayyuwan kan chicha.
37 Ot kalala kan cha disipulusla si pangngalig, “Achu cha maali, ngim akit cha man-ali.
38 Ked manchawat kayu kan Apudyus un singkuwa kan cha maali ta mangibuun si achuʼn man-ali.”