2
Miyalig Si Jesu Kristu Byetu Un Matattagu
(Mat. 21:42; Rom. 9:33; 10:11; 1Co. 3:10-17)
1 Ked gapu si liyalakanyu kasin kan Apudyus, masapuɏʼn man-awichenyu cha losan un lawwing, mantuntulli ya kamad bibiɏu kan cha uchum, ilaapos ya mangkiyakiyap kan cha asintataguyu.
2 Isuyu kàiyalak un piolaʼn sumusususu, kamatchi otyan chi mallalayedyu un mangad-acheɏ si ugud Apudyus ta kumoscheɏ pammatiyu ya matatagu kayu ing-inggala.
3 Ti lagamputyu lapachasan chi kilabiɏu ya kachegun Apudyus.
4 Ked umachali kayu kan Apu. Siya miyalig un matattaguʼn byetu un inwalin cha tagu, ngim siya chilutukan Apudyus ya kapotogen kan siya.
5 Ked umachali kayu un isun chi matattaguʼn byetu un mauseɏ si mampauchen si laispirituan un byeɏoy. Mansimbi kayuʼn laapudyusan un pachi un mangichatun si laispirituwan un chatun, makaay-ayu kan Apudyus gapu kan Jesu Kristu.
6 Ti kalan chi liigili un ugud Apudyus,
“Awed chi pililiyak un kapotogen un byetu un iggak ud Zion un mampon-ed.
Ked lu silu mamati kan siya, achipun pulus mibibiin.”
7 Kan chikayuʼn mamati, lapotog chi hachiʼn byetu. Ngim cha hachiʼn achipun mamati, kalala,
“Ha byetu un inwalin cha pin-a lampaud si byeɏoy un
kalanchaʼn lappun simbila,
siya lambyalin un kapotgen un mampon-ed.”
8 Ked ha osa boʼn liigili, kalala,
“Liya byetuʼn misabyangtuwan cha tagu,
ya siya bo milus-ubyencha.”
Misabyangtucha ti achipuncha tumuttuwa si ugud Apudyus, un siya likodchong un kooncha.
9 Ngim chikayu pililiyan Apudyus un tagula ya papachiʼn chi Ari un mansimbi kan siya. Ya chikayu laapudyusan un tagula, mismuʼn tagun Apudyus, ti chikayu mangibyegbyega si lakaskaschaaw un killingwala. Illawala chikayu si gikbot ot inyatunla chikayu si lakaskaschaaw un padchala.
10 “Si sin-eɏgew, chakampun un taguʼn Apudyus chikayu, ngim si sala lantagun Apudyus chikayu. Si sin-eɏgew, achipunyu ammu kachegun Apudyus, ngim si sala kilacheguwan chikayu.”
Ha Koon Un Mansimbi Kan Apudyus
(Rom. 13:1-7; Tit. 3:1-11)
11 Susulud un ay-ayatok, isu taku mangili si allaʼn lubung. Chawatok kan chikayu un achi kayu paituray kan cha lawwing un sigud un pipion chi long-eg, un siya sumupling si kalichodwayu.
12 Ya ammanyu leman cha koonyu kan cha Gentil. Ulay lu awed ipabyasuɏcha si lawwing kan chikayu, lu mimìilaʼn bibiɏu cha pin-ayu koon ked chaychayawoncha si Apudyus si eɏgew un umaliyala.
13 Gapu kan Apu Jesu Kristu, masapuɏʼn tumungpeɏ taku kan cha losan un turay. Ya masapuɏʼn tumungpeɏ taku si Emperador un kangatuwan un manturay,
14 ya ulay cha gubillachuɏ un imbuunla un malusa kan cha mangwa si lawwing ya mangichayaw kan cha mangwa si bibiɏu.
15 Ti ha pion Apudyus siyad koonyu cha bibiɏu ta mapagilok cha man-ugu-ugud si tilutuli ya lappun simbila.
16 Matagu kayu un isun cha taguʼn lawayawayaan, ngim achiyu useɏon chi wayawayayu un pangtàun si lawwik. Ngim matagu kayu un isun chi musassun Apudyus.
17 Masapuɏʼn potgonyu cha losan un tagu, ya ay-ayatonyu cha susuludyuʼn mamati. Ya masapuɏ boʼn umogyat kayu kan Apudyus, ya potgonyu emperador.
Tuɏachonyu Kilaalus Kristu Si Lapaligatala
(Eph. 6:5-8; Col. 3:22-25; 1Jn. 3:13-18)
18 Chikayuʼn musassu, masapuɏʼn tuttuwaonyu cha sinmusassu kan chikayu ya potgonyu chicha, chakampun un abus cha bibiɏu ya laalus, ngim ulay bod cha lauyung.
19 Ti bibiɏuwon Apudyus chi taguʼn mangiyalus si mapaligatala ulay chakampun un lobbonglaʼn mapaligatan, un ha mangiyalusala gapu si malosomkala kan Apudyus.
20 Ti lappun tagu si machayaw gapu si langalusala si lapaligatala lu siya tuttuwaʼn langwa si lawwing. Ngim lu bibiɏu koonyu ya paligatan chikayu ked maattomanyu, mas-om si Apudyus.
21 Ti hachi langayagen Apudyus kan chikayu, gapu ta lapaligatan si Kristu gapu kan chikayu ked tilelala mantuɏachenyu ta suɏutonyu biyeg Kristu.
22 Ti siya, achipun pulus lambyasuɏ ya
lappun ilug-uggudla si tuntulli.
23 Si langam-amsiwancha kan siya, achipun summongsongbyat si lawwing. Si lapampaligatala, achipun lan-og-ogyat, ngim lantegod kan Apudyus un lalintog un manguis.
24 Bilukud Kristu cha losan un byasuɏ taku si latoyala si krus ta awed in-ilon takuʼn mawayawayaan si pallakabyelin chi byasuɏ ya matagu taku un mangwa si ustu. Gapu si sugatla, lapalin-awa kayu.
25 Ti si chamchamu, isu taku lachungaw un keɏlilu. Ngim si sala, inyulin chitaku kan Jesu Kristu un pastuɏ taku ya mangay-ayyuwan si kalichodwa taku.