2
Cha Hachiʼn Aginsusuɏu
(1Ti. 1:3-11; 4:1-5; 6:3-10; 2Ti. 4:3-5; Jud. 8-13)
1 Ked illinggew bo cha silan-propeta un lummoswa ud Israel. Ked kamatchi bo si sala, ti lummoswa cha uchum un aginsusuɏu kan chikayu un itudtuchucha mayam-alan ya chakampun si katuttuwaan. Ked achipuncha awaton si Jesu Kristu un man-Apucha ulay siya lansaka kan chitaku, ked hachi mipatiyancha si magalatong un machusaancha.
2 Ngim ulay kamatchi, achu bo cha sumuɏut kan chicha un makakopya kan cha lawwing un pin-acha koon. Ked gapu kan chicha, mayam-an chi katuttuwaan.
3 Ked gapu si kilaagumcha, sikapancha un mantudtuchu kan chikayu si is-istorya un killingkingwacha ta mangeancha si pilak. Ngim labyeyeg un lakasagala chi machusaancha ya achipun masuyop chi manyam-an kan chicha.
4 Ti achipun Apudyus kilacheguwan cha angheles un lakabyasuɏ, ngim imbyellula chichaʼd impiyeɏlu ta mabyabyaɏudcha si hachiʼn manggikbot ta manguuwayancha si eɏgew un manguisan Apudyus kan cha losan.
5 Ya achipunla bo kilacheguwan cha tagu si chamu un timpun Noah, ti lilitapla pita ot laaludcha losan. Ot abus si Noah un langibyegbyega si bibiɏu un kopya, chi tilagula ya cha pituʼn kabyeɏoyla.
6 Ked isula bo killingwala si ili ud Sodom ya Gomorrah. Singgobla inggala chummabu ked lambyalilola chicha mansampaɏan si mambyalagen cha lappun Apudyuscha.
7 Ngim sileɏaklibyela si Lot, un osaʼn lalintog un tagu un lalibulibuk chi somsomokla kan cha lawwing cha achipun tumuttuwa si lintog un tagu.
8 Si Lot, lakaumili kan chicha, ked biligat un malibulibuk chi somsomokla gapu kan cha lawwing un pin-acha koon un itutullongla ya chongchongɏola.
9 Ked ammun Apudyus chi in-ilolaʼn maleɏaklib kan cha mamati un mapaligatan, ya ammula boʼn byentayan cha taguʼn achipun mamati inggala si umaliʼn eɏgew un manguisala ta machusacha,
10 sinchumadlu chusan cha ummingsan maluɏut si pipion chi long-egcha ya cha mangam-amsiw kan cha turay Apudyus.
Lateɏodcha ya latangsitcha, achipuncha umogyat un mangkiyakiyap kan cha machaychayaw ud langit un awed chi pallakabyelincha.
11 Ked cha angheles, ulay lakoskoscheɏ ya chakchakeɏ pallakabyelincha lu chicha, achipuncha ibyega kabyasuɏancha si sangwalan chi Apu.
12 Ngim cha allaʼn aginsusuɏu, isucha kaog-ogyat ya atap un ayam un liyalakchaʼn machochokmaan ya mapatoy. Ya lappun pulus biincha, ya achipuncha maawatan siya. Ked ha mambyalagencha, mayam-ancha.
13 Gapu ta pilaligatancha cha uchum un tagu, mapaligatancha bo. Ti chicha, ganggalasonchaʼn mangwa si losa-losan un kabibiin un pipion chi long-egcha, ulay lu eɏgew. Siyad kooncha cha kabibiin lu umoycha makakan kan chikayu un miyaligcha si mansa un mampakaisaw si silup, ked ituɏutuɏuycha ganggalason cha mallablabos un laglagsak.
14 Ked lu itullongcha cha byebyai, pionchaʼn chegchegasan chicha, achipuncha iyagey un mangwa si byasuɏ. Ya lalaingcha boʼn mangawis kan cha lakapsut chi pammaticha un makabyasuɏ. Ya ummingsa kilaagum si somsomokcha. Ked chuchussaon Apudyus chicha!
15 Tilelancha ustuʼn chaɏan ot lalungachungawcha. Tiluɏedcha killingwan Balaam un alak Beor si awi, un lambyasuɏ gapu si kilaagumla si pilak.
16 Ngim ilomɏan chi changki si killingwalan byasuɏ, gumminga un isun chi tagu, ot inyageyla un pin-a mangwa si kilauyungla.
17 Miyalig cha aginsusuɏu si laksit un uud, ya isucha bo mibyalibyali un libuu. Insasaggalan Apudyus chi inggewancha un manggikbot.
18 Mamaspasweɏchaʼn mantobyeg chi gingacha ngim tilitingang ya lappun simbin chi ibyegbyegacha. Ked useɏoncha cha lawwing un pipion chi long-egcha un mansulisug kan cha tagu un malluglugi malelan si lawwing un biyeg.
19 Ingkaricha kan chicha chi wayawaya. Ngim ha katuttuwaala, chicha bo ked musassun cha lawwing un pipion chi long-eg. Ti lu silu makaabyak si tagu, iturayan chi hachi un langabyak kan siya.
20 Maseɏaklibyen cha tagu si kilalawwing chi lubung gapu si mangammuwancha kan Jesu Kristu un Apu ya Malagu kan chitaku. Ngim lu uliloncha bo kasin cha sigud un killingwacha, sin-umamod chi kilalawwing chi kasasaedcha lu ha chamchamu.
21 Un-ulloy chi achipuncha laammuwan chi chaɏan un kilalintog lu laammuwancha ked lan-awichencha bo cha laapudyusan un bilin un laatod kan chicha.
22 Lipaila chi lakwa kan chicha un tuttuwa chi mibyegbyega un kalanchaʼn, “Ha asu, kasinla kalon chi inyud-udla, ya ha laomos un byeɏok, kasin mambyangbyang si pitok.”