3
Ha Tuttuwaʼn Bibiɏuwon Apudyus
(Rom. 2:28-29; 3:28; 1Co. 15:9-10; 2Co. 11:18-31)
1 Ked susuludku, ha ibyegak kan chikayu ked magalasan kayu otyan gapu si litimpuyugenyu kan Apu Jesu Kristu. Achipulak masngay un mangikasin mangibyega kan chikayu si alla ti siya bumaɏuwanyu.
2 Tatanchaalanyu cha taguʼn lawwing chi somsomokcha un mangipatut un mampasogyat kalu kacha tagu taplu makwaʼn mitimpuyugcha kan Apudyus. Lauyung cha katchiʼn tagu un isucha lakupeɏn asu!
3 Ngim ha katuttuwaan ked chitaku ibilang Apudyus un lasogyatan, chakampun un chicha, ti chitaku malayaw kan Apudyus gapu si pallakabyelin chi Ispiritula, kan chitaku bo malayaw kan Jesu Kristu. Siya abus chi mantegochen taku, un chakampun kan cha ugali ya cha lintog un ipatut cha uchum un tagu un maluttuwa si kamatchi.
4 Lu awed tagu un mantegod si kamatchi, lappun uchum lu achi abus sakon. Lu awed tagu mangibyega un mantegod matagu si ing-inggala gapu si maluttuwaala si lintog, sin-umamochak ti lappun achik killingwa si maluttuwaak si lintog.
5 Sakon, galakak kan Benjamin un osaʼn tribun Israel. Ked ha mikawaɏuʼn eɏgew chi liyalakak silogyatalak, ked gettokak un Judio. Ya lu mipanggop si maluttuwaak si lintogmiʼn Judio, sakon bo osaʼn Pariseo un patungedku tuttuwaon chi lintog.
6 Ked si langipapattiyak un langwaan si ugalimiʼn Judio, achu pilaligatak kan cha lamati kan Jesus, ya lappun bo lapabyasuɏak mipanggop si lintogmiʼn Judio ti ilaminku killingwa.
7 Ngim gapu kan Kristu, losan cha pilotpotogku si sin-eɏgew ked si sala ibilangku un lappun simbila losan cha kamatchi, ti laawatak un lappun ituɏungla si mataguwak.
8 Ya chakampun un abus cha hachi, ngim imbilangku bo chicha losan un lappun simbila gapu ta laammuwak si Jesu Kristu un Apuk. Hachi lapotpotog! Ked mipagapu kan siya, tilelak losan cha hachi ot imbilangkuʼn kaisaw losan cha lapotog kan sakon si sin-eɏgew, taplu ammuwok un ustu-ustu si Kristu
9 ked mitimpuyugak kan siya. Ked si sala, achipunku piyeɏon chi kilabiɏuk gapu si laluttuwaak si lintogmiʼn Judio, ti ha kilabiɏuk si sala, illidchon Apudyus kan sakon gapu si lamatiyak kan Jesu Kristu.
10 Ked ha piok si sala, agammuwok un ustu-ustu si Kristu ya mipachasku bo pallakabyelinla si ummuliyala lataguwan. Ya mipachasku bo makaligat kan siya ya miyisuwak kan siya si matoyala.
11 Ti lamlamaok un umuliyak matagu un isun bod chi ummuliyala lataguwan.
Masapuɏʼn Ipapati Taku Un Mangwa Si Pion Apudyus
(Act. 20:24; Heb. 12:1-2; 2Ti. 4:7-8)
12 Achipunku kalan un ustu-ustuwak un lagamput liyisu somsomokku kan Jesu Kristu, ya achipunku bo kalan un lappun kuɏangku si sala. Ngim ipakatku koon cha piola si losan un kabyeeɏak ti siya panggopla un lamili kan sakon un mantagula.
13 Susuludku, achipunku kalan un killingwak losan chi pion Jesu Kristu, ngim ha kook, liwatak cha leus un lakwa ti ha awed si somsomokku ked cha kook si umaliʼn eɏgew.
14 Ipapatik un mangwa si pion Apudyus ta idchelak si gunggula un makataguwan kan siya ud langit un siya langayagela kan chitaku gapu kan Jesu Kristu.
15 Losan taku un lootong chi pammatila kan Jesu Kristu, kamatchi otyan chi somsomok taku. Ngim lu awed sabsabyali somsomokla, si Apudyus chi mangipakaawat kan chikayu.
16 Ngim ulay lu kamatchi, masapuɏʼn chitaku losan, ituɏutuɏuy taku tuntun-uchon chi impakaammun Apudyus kan chitaku un ustu.
17 Susulud, tuɏachonyu otyan sakon. Ya itullongyu bo cha maluɏed si mambibiyeg un impailami kan chikayu taplu chicha bo tuɏachonyu.
18 Ti tuttuwa cha hachiʼn imbyegbyegak kan chikayu, ked malluluwaak un kasin mangibyega si sala ti achu cha sissiyaoncha biyegcha un kabusuɏn Jesu Kristu ti ipampaliwacha latoyala si krus.
19 Ked ha makwa kan chicha, mibyellucha ud impiyeɏlu, ti siya abus un potgoncha cha pipion chi long-egcha. Ked cha kabibiin, hachi isaysayawcha, ked cha awed si allaʼn pita cha pin-acha somsomkon.
20 Ngim kan chitaku, ud langit chi ustuʼn bumɏoyan taku, ya uuwayon taku mangulilan Apu Jesu Kristu un Malagu kan chitaku, ti umali un mampeɏpuʼd langit.
21 Ked mambyalilola cha allaʼn lakapsut un long-eg takuʼn matoy isun chi kilabiɏun chi long-egla si ummuliyala lataguwan. Ked makwalaʼn koon chi hachi gapu si pallakabyelinla un mangawis si losan ta mampaituraycha kan siya.