16
Ha Lampakumustaan Paul Kan Cha Uchum
1 Awed chi osaʼn sulud takuʼn byebyai un piok un ipatagammu kan chikayu. Siya si Phoebe un osaʼn mansimbi kan cha mamatiʼd Cenchrea.
2 Mangiliyonyu siya mipagapu si pammatiyu kan Apu Jesus ti kamatchi ustuʼn koon cha tagun Apudyus. Ya tuɏunganyu siya kan cha losan un kasapuɏala, ti achu cha taguʼn tiluɏungala ya sakon bo osa.
3 Pakumustaonyu cha Priscilla kan Aquila un man-asawa, chicha cha biɏunku un mansimbi kan Jesu Kristu.
4 Ked inchuyacha biyegcha gapu kan sakon. Ked chakampun un abusak un manyaman kan chicha, ngim losan cha mamatiʼn Gentil.
5 Ya pakumustaonyu bo cha mamati un pin-a manchetchetong ud uwacha.
Pakumustaonyu chi potpotgok un biɏunkun Epaenetus. Siya kaulaan un lamati kan Kristu si probinsiya ud Asia.
6 Pakumustaonyu bo si Mary un langipapatiʼn langkawachi para kan chikayu.
7 Ya pakumustaonyu bo cha Andronicus kan Junia un kailiyak un Judio ya biɏunkuʼn labyaɏud si sin-eɏgew. Potpotgon cha apostoles chicha, ya ummun-ulacha lamati lu sakon.
8 Pakumustaonyu bo biɏunku un si Amplias un ay-ayatok gapu kan Apu Jesus.
9 Ya ulay bo si Urbanus un osaʼn biɏunmi un mansimbi kan Kristu, ya si Stachys un osaʼn potpotgok.
10 Ya pakumustaonyu bo si Apelles un lapaloklokan chi kilatuttuwala kan Kristu. Ya siya bo kan cha kabyeɏoy Aristobulus,
11 ya si Herodion un osaʼn kailiyak un Judio, ya cha mamati un kabyeɏoy Narcissus.
12 Pakumustaonyu bo cha Tryphena kan Tryphosa un mansimbi kan Apu Jesus, ya si Persis un potpotgok un biɏun un mangipapatiʼn mansimbi kan Apu.
13 Pakumustaonyu bo si Rufus, un mantegochen un mansimbi kan Apu, ya si ilala un isun bod chi ilak.
14 Ya pakumustaonyu cha Asyncritus, Phlegon, Hermes, Patrobas, Hermas ya cha losan un susulud taku un awed kan chicha.
15 Ya siya bo kan cha Philologus kan Julia, Nereus ya suludlaʼn byebyai, ya si Olympas, ya cha losan un tagun Apudyus un awed kan chicha.
16 Man-asipakumusta kayu un man-asilamalu un mangipaila si ayatyu. Pakumustaon chikayu losan un mamati kan Kristu.
Ha Alungus Chi Intudtuchun Paul
(Gal. 1:8-9; 1Ti. 6:3-5; Tit. 3:10)
17 Susulud, chawatok un an-allachenyu cha taguʼn manyam-an si timpuyugyu ya manggulu si pammatiyu. Ti suplingoncha katuttuwaan un litudtuchu kan chikayu ked sabyali itudtuchucha. Masapuɏʼn achayuwanyu chicha.
18 Ti cha kamatchiʼn tagu, chakampun un mansimbicha kan Apu Jesu Kristu, ngim abus cha pipion chi long-egcha singsingtoncha. Gapu si bibiɏu ya makaay-ayu un man-uugudcha, maallilawcha cha lalaka un maawis chi somsomokcha.
19 Matetteɏokak gapu kan chikayu ti lanchilameg chi langipapattiyanyu si pammatiyu. Ked piok bo un lumailaing kayu un mangammu lu simma bibiɏu, ngim lappun otyan ammuyu mipanggop si lawwing.
20 Achipun mabyeyeg, ked si Apudyus un mampeɏpuwan chi lin-awa ked abyakola si Satalas, un isun chi gussan taku siya. Sapay otyan ta kacheguwan Apu Jesu Kristu chikayu.
21 Pakumustaon chikayu kan Timothy un lakakawachi kan sakon. Siya bo kan cha Lucius, Jason ya Sosipater un kailiyak un Judio.
22 Sakon si Tertius, langigili si allayaʼn suɏat. Pakumustaok bo chikayuʼn mamati kan Apu Jesu Kristu.
23 Pakumustaon chikayu bo kan Gaius un lammangili kan sakon ya siya simbyeɏoy si pin-an cha mamati manchetchetngan utla. Pakumustaon chikayu bo kan Erastus un mamangchon si pilak chi allaʼn ili, ya ulay si sulud takuʼn Quartus.
24 Sapay otyan ta kacheguwan chikayu losan kan Apu Jesu Kristu. Amen.
Machayaw Si Apudyus
(Jud. 24-25)
25 Ked machaychayaw si Apudyus! Ti alla pallakabyelinla un mampakoscheɏ si pammatiyu un tumimbuɏuy si Bibiɏun Chameg un ibyegbyegak mipanggop kan Jesu Kristu. Hachiʼn chameg un litataɏu lalipud si awi, ked sala mipakaammuwala.
26 Ngim si sala, lipatigammu allaʼn katuttuwaan kan cha kaili-ili ti lagamput cha propeta inggili si awi. Ked si Apudyus un mallalayun, ked imbilinla un mipakaammu alla si losan un nasyun ta mamati cha tagu ya tuttuwaoncha siya.
27 Machaychayaw otyan si ing-inggala chi os-ossaan un kalaingan un Apudyus gapu kan Jesu Kristu! Amen.