24
Din Kasin Nasiglotan Din Intolag Diyos Ed Sekem
(24:1-3,14-31)
1 Idi siya di, inpasinop Josue din am-in ay tribun di Israelita ed Sekem. Inpaayag na abe din nankakay di ili, papangolo, hohowis ya oopisyal, et nasinop da am-in sin sangoanan Diyos.
2 Kanan Josue sin amin ay ipogaw, “Siya na di ibagan Yahweh ay Diyos tako ay Israelita: ‘Ed nabaon, nan-ili din aap-o yo pati da Tera ay aman da Abraham en Nahor sin bas-il di ginawang ay Eufrates, yan nandaydayaw das odom ay diyos.
3 Siya di, inayagak si Abraham ay apo yo sin daga ay sana, et inpangok sin intiro ay daga ed Canaan. Inpaad-adok abe din poli na babaen en Isaac ay anak na ay indawat ko en sisya.’ Siya din kinwanin Diyos.
4
5
6
7
8
9
10
11
12
13
14 “Isonga ed wani, patgen ya egyatan yo koma si Diyos, dowan naimposoan ya napasnek di iyat yo ay mansilbi en sisya. Iwasit yo abe din sinan didiyos ay dinaydayaw di ap-apo yo ed Mesopotamia ya ed Egipto ta si Diyos et anggoy di pansilbian yo.
15 Ngem mo sigaan yo ay mansilbi en sisya, masapol ay pilien yo ed wani ay agew mo sino di pansilbian yo, mo din diyos ay dinaydayaw di aap-o yo ed Mesopotamia ono din daydayawen di Amorreo ay akin daga isnan kad-an yo ed wani. Mo sak-en pay ya din pamilyak, si Diyos di pansilbian mi.”
16 Kanan din ipogaw ay sinombat, “Adi mi polos dokdokogan si Yahweh ta mansilbi kamis odom ay diyos,
17 tan si Yahweh ay Diyos tako di nangipango sin ap-apo tako ay komaan ed Egipto ay naibabag-enan da. Sisya di nangam-amag sin da dooy ay nakaskasdaaw ay inila tako. Sinilibanas datako sin am-in ay nandad-anan tako ya sin am-in ay ipogaw ay nilabsan tako.
18 Inpakaana am-in din Amorreo ay man-ili sin daga ay nay ay dinatngan tako, isonga dakami abe et mansilbi kami en Yahweh, tan sisya di Diyos tako.”
19-20 Ngem kanan Josue sin ipogaw, “Adi yon kabaelan ay mansilbi en Diyos, tan nasantoan sisya et iparit na ay waday ikadkadwa yon sisya ay daydayawen. Isonga mo taynan yos sisya ta mansilbi kayos diyos di odom ay nanasyon, adi nan pakawanen din basbasol yo. Olay mo siged di inyat na en dakayo ed idi, kontraena ya dosaenas dakayo enggana ay mamaga kayo.”
21 “Aga, mansilbi kamin Diyos,” kinwani da ay sinombat.
22 Kanan Josue en daida, “Dakayo met laeng di manistigo ay pinili yo ay mansilbi en Diyos.”
“Aw, dakami di tistigo,” kinwani da.
23 “Iwasit yo ngarud din sinan didiyos di odom ay nasyon ay wadan dakayo yan ikari yo ay magay dayawen yo mo adi si Yahweh ay Diyos tako ay Israelita,” kanan Josue ay nangibilin.
24 Pag kanan din ipogaw ay nanongbat, “Mansilbi kami en Yahweh ay Diyos tako et tongpalen mi din bilbilina.”
25 Sin siya di ay agew, inamag Josue di tolagan para sin kaipoipogaw yan initdo na din linlinteg ya bilbilin ay onodan da.
26 Insolat na dana sin libro ay naisolatan di linteg Diyos. Pag man-a si dakdake ay bato et tinood na sin poon di dakdake ay kaiw sin kad-an din nasantoan ay lugar isdi ed Sekem.
27 Pag nan kanan sin kaipoipogaw, “Ilan yo nan bato ay nay ay say manbalin ay tistigo tako, tan dinnge na am-in din inbagan Diyos en datako. Isonga say mangipanemnem en dakayo mo kontraen yos Diyos.”
28 Idi nakdeng ay inbagan Josue di, inpasaa na din ipogaw et esa en inmey sin bingay na ay daga.
29 Idi siya di, natey si Josue ay anak Nun ay baan Diyos. Sin-gasot ya sinpo di tawena sin nateyana.
30 Inponpon da sin tawid na ay daga ed Timnatsera sin kadondontogan ed Efraim sin bomandas amyanan di dontog ay Gaas.
31 Nansilsilbi din Israelita en Diyos sin kamatagon Josue. Olay sin nakdeng ay nateyana, intoltoloy da pay ay nansilsilbi en sisya idi wada pay laeng din papangolo da ay mismo ay nakaila sin amin ay nakaskasdaaw ay inam-amag Diyos para en daida.
32
33