30
Din Kalin Agur
1 Da nay di kalin Diyos ay inbagan Agur ay anak Jakeh. Kanana: Apo Diyos, palalo ay nabbayak, enggay magay pigsak.
2 Kamanak animal, adiak maibilang ay ipogaw tan magay nemnem ko.
3 Magay sirib ay inadal ko et magay ammok maipanggep en Diyos ay Nasantoan.
4 Sino di nakaeey ed langit ay nantaoli isnan daga? Ay waday makabael ay manpap sin dagem? Sinoy makabongon sin danom si lopot ya nangikeddeng si beddeng isnan daga? Mo waday ammom si makabael isna, ibagam di ngadana ya ngadan di anak na.
5 Din kalin Diyos et napaneknekan ay kostokosto. Kaman salida ay manalaknib sin komamang en sisya.
6 Adi ka taptapian din kalin Diyos tan yamyaman daka ya ipaila na ay maetek ka.
7 Apo Diyos, waday dowa ay banag ay kedawek en sik-a sakbay ay mateyak:
8 Panbalinem kod sak-en ay matalek ta adiak polos man-etek ya adi kan palaloan ay pabaknangen ono pabitegen sak-en. Say idawat mo koma din kostokosto ay kasapolak,
9 tan mo mansobsobraak, into et mo dokogak sik-a yan kanak, “Sino od si Yahweh?” Mo bomitegak abe, mangakewak et ibabain kos sik-a ay Diyos ko.
10 Adi kan palawlawaen di esa ay baa sin apo na tan baosan daka sin baa ay sana et man-ikaro ka.
11 Waday odom ay ipogaw ay pankalian das lawa da ama da en ina da.
12 Din odom yan kanan da en magay basbasol da olay mo kinmadodogis da si basol da.
13 Din odom yan palalo ay ipapangato da di awak da.
14 Waday palalo di kinagamgam da et posen da din sanikwan di nabiteg ya kakkaasi.
15 Waday singin ay matek. Kanan da ay dowa, “Omya ka, omya ka.”
16 Wada abey opat ay banag ay adi kapkapnek, adi dan polos kanan en kosto: din kad-an di natey, din basig ay babai, din nakgang ay lota ya manbidbidang ay apoy.
17 Din manglasoy en ama na ya adi manongpal en ina na, awni et okiten di gayang sin tanap din mata na ya isidan di dadakke ay titit din lamlames na.
18 Waday opat ay nakaskasdaaw ay adiak maawatan:
19 din iyat di agila ay tomayaw ed kayang, din iyat di eweg ay manbodos sin kabatbatoan, din iyat di bapor ay manbalasat sin baybay ya din iyat di baro ya balasang ay manlinayad.
20 Siya nay kaiarigan di makikamalala ay babai: mangan asi na ponasan din tepek na yan kanana en magay basol na.
21 Waday opat ay banag ay panpayegpegan di kaipoipogaw isnan lobong, tan adi dan maanosan:
22 din bag-en ay manbalin ay ari, din naong-ong ay mawadaan si ad-ado ay makan ya amin ay kasapolana,
23 din sinigsigaan da ay babai ay maasawaan ya din balasang ay bag-en ay maiskat sin babai ay among na.
24 Waday opat ay kinittoy ay animal isnan daga, ngem nankalalaing da:
25 Din koton, nakapsot da ngem ammo da ay man-idolin si makan sin tiyagew.
26 Din koneho, nakapsot da abe, ngem manbeey da sin deppas.
27 Din dodon, magay ari da, ngem naolnos da ay mankokoyog.
28 Din alalakkap, nalaka da ay depapen, ngem wada da sin palasyo.
29 Waday opat ay mo manmandan da yan maila ay napigsa da:
30 din layon ay kapigsaan sin am-in ay animal ya magay egyatana en daida,
31 din taraki ay kawwitan, din kalakian ay kalding ya din ari ay mangipangolo sin sosoldado na.
32 Mo naong-ong ka et it-it-ek mo di awak mo ya manpanggep kas lawa, opopem san tepek mo ta iginek mo.
33 Tan mo ikolog ya pespesan di gatas, mawada di mantikilya. Mo despegem abe din eng di ib-am, bomala di dada. Siya abe ay mo sepsepem di bonget mo et pawadaem di ibaw.