9
1
2
3
4
5
6
7
8
Din Omalian Din Arin Di Jerusalem
(9:9-13)
9 Dakayo ay taga-Jerusalem, manragsak kayo,
ibogaw yo din ragsak yo,
tan dandani ay omali din ari yo.
Nangabak ngem napakombaba,
anak di dangki di nangabayoana.
10 Kanan Diyos, “Awni et kaanek ed Israel amin dana:
din kalisa, kabayo ya pana
ay gobat di kaosalan da.
Din ari yo, awni et makikapya
sin kailiili isnan daga.
Sakopen to di iturayana
manlogi sin benget di baybay enggana sin esay benget na,
manlogi sin ginawang ay Eufrates enggana sin gedeng di daga.
11 Gapo sin intolag kon dakayo
ay siniglotan di dadan di daton yo,
wayawayaak to din ipogaw yo
sin bobon ay magay danom na ay naibalodan yo.
12 Dakayo ay naibalod sin addawi ay daga,
balod ay wada di namnama da,
mantaoli kayo sin ili yo ay makneg di alad na.
Ed wani, ibagak en dakayo,
dobli di bindisyon ay idawat kon dakayo
mo din ligat ay linaklak-am yo.
13 Dakayo ay taga-Juda ya Israel, dengngen yo,
dakayo abe ed Zion, tan osalek dakayo
ay kaman pana ya kampilan di soldado
ay makigobat sin ipogaw ay Griego.”
Si Diyos Di Mangayowan Sin Taga-Juda
Si Diyos di mangisalakan sin ipogaw na tan abakena din kalaban da. Sisya di mangipawadas odan ta gomabay di molmola, ya panbalinena din ipogaw na ay nasalon-at ya napigsa. Mo pay din manpontos ya mankotom, owat dan ietekan din manpatolong en daida, isonga masangsangaw din kaipoipogaw ay kaman dan kakarnero ay iwed di mangay-ayowan en daida. Dosaen Diyos din papangolo ay mangam-amag si kaman nidi yan isalakana ya papigsaena din ipogaw na. Olay mo nansianenas daida sin kailiili ed idi, sinopenan tos daida et onodan das sisya. (9:14–10:12)
14
15
16
17