Uţup Ulil Unuura
wi Yowan apiiŧuŋ
Uţup ujuni
Ulibra wi uwo Uţup Ulil Unuura wi Yowan apiiŧuŋ. Aţup ţi ulibra wi uko wi Yeŧu adoluŋ ţi mboş na uko wi ajukanuŋ bañaaŋ, na pkeţul na pnaţa ţi pkeţ pi nul. Yeŧu aţup bañaaŋ na mnhina, ajeban bamaakal, adook ŋnŧaayi akuţ ado iko iŧum maakan iñoŋarënaan ţi kadun ki bañaaŋ. Ulibra wi Yowan apiiŧuŋ uunaam maakan na ŋi bi Maci, Markuŧ na Luk. Yowan aşal kë bañaaŋ biki apiiŧuŋ ulibra wi bame ŋlibra mënţ na iko yi Yeŧu aţupuŋ da na iko yi adoluŋ. Uko mënţ ukaaŋ kë aampiiŧ iko yi bi Maci, Markuŧ na Luk bapiiŧuŋ.
Yowan aţup ţi ujuni wi ulibra wi nul ñaaŋ i Yeŧu awooŋ. Aţup aji Uţup wi Naşibaţi ubiiŋ ţi umundu wi akak ñaaŋ najën. Yeŧu ado iko iñoŋarënaan iŧum bañaaŋ bahilna bayikrën kë ul awooŋ Naşih i Naşibaţi aŧaruŋ adat aji ul akbuuranuŋ bañaaŋ. Uko unkaaŋ kë Uţup Ulil Unuura wi Yowan upaţ na ŋi bandukiiŋ wii wi : « Yowan akakalëş iko iloŋ yi Yeŧu aţupuŋ inkdiimanuŋ kë awo i Naşibaţi : Yeŧu aţup aji ul awooŋ bjeehi bi umundu, pde panjaaŋ pawul ubida, meel manjaaŋ manwul ubida, plëman pi ŋkaneel ŋmpoţi ŋakţëpnuŋ, nayafan nanuura, bko bdolni ubiñu. Aji kak ul awooŋ bgah, manjoonan na ubida, kë aji naţan bañaaŋ ţi pkeţ kawul baka ubida.
Hënk di ifah yi ulibra wi iwooŋ:
1. Pdëman Uţup (1.1-18)
2. Yowan Nabatŧaar aţup uko unkluŋ kabi (1.19-34)
3. Yeŧu adat baţaşarul baŧeek (1.35-51)
4. Yeŧu ado ŋyaaş paaj na uloŋ iko iññoŋarënuŋ bañaaŋ (2.1–12.50)
5. Kanëm kabaañşaani ki Yeŧu ţi mboş: pwayëş pi bawayëşuluŋ na pkeţul (12.1–19.42)
6. Yeŧu anaţa ţi pkeţ (20.1-10)
7. Yeŧu apën awinana ţi kadun ki baţaşarul (20.11–21.25)
1
1 Du ujuni anwooŋ Uţup ado bi wo'a wo, awo du Naşibaţi abot awo Naşibaţi.
2 Anwooŋ Uţup awo na Naşibaţi du ujuni.
3 Naşibaţi aţëpna ţi a aţak iko bŧi ; ţi iko bŧi inţakaniiŋ nin kaloŋ kaanţakana bë kaanţëpna ţi a.
4 Ţi ul di di ubida upënnuŋ, kë ubida mënţ uwo bjeehi pa bañaaŋ.
5 Bjeehi bajeehan du bdëm, kë bdëm baanwun ba.
6 Ubi ka ñiinţ aloŋ i Naşibaţi ayiluŋ ; katimul kawo Yowan.
7 Abi kaţup uko wi ameeŋ bŧi ţi bjeehi, bañaaŋ bŧi baţëpna ţi a bafiyaar.
8 Mënţ Yowan ţi uleeful awooŋ bjeehi ; abi bi ţañ kaţup uko wi ameeŋ ţi bjeehi.
9 Bjeehi mënţ bawooŋ na manjoonan bjeehi bambiiŋ ţi mboş kajeehan bañaaŋ bŧi.
10 Anwooŋ Uţup adobi wo'a wo ţi mboş, kë Naşibaţi abot aţëpna ţi a aţak ma, kë bañaaŋ biki mboş başë wo'a wo baamme'a.
11 Abi ţi katoh ki nul, kë bañaaŋ biki nul başë wo baandi'a.
12 Kë bañaaŋ bŧi banşaaŋ adi'a, afiyaara, aţen baka kë bahinan pwo babuk Naşibaţi.
13 Mënţ ţi pñaak këme ţi ñiinţ na ñaaţ këme ţi uko wi ñiinţ aŋaluŋ wi wi bawoonuŋ babuk Naşibaţi. Naşibaţi ul ţi uleeful adoluŋ kë bawo babukul.
14 Anwooŋ Uţup akak ñaaŋ najën abi afëţ na nja, kë ŋşë win mndëm mi nul, aŧum na bnuura abot aŧum manjoonan. Aşin awululuŋ mndëm mënţ ul anwohaŋ aloolan i abukuŋ ţañ.
15 Yowan aţiiniyaan uko wi nul aji : « Ul i i nji njakuŋ aji : “Ankmbiiŋ ţi kafeţ naan, ajotën kadun ţiki, ji mbi ndo kawo, ado bi wo'a wo.” »
16 Na manjoonan nja bŧi ŋji ŋyeenka yeenk ţi bnuura bŧum banwooŋ ţi a.
17 Ŋyeenkna bgah ţi *Moyiŧ, kë bnuura na manjoonan manşë biina ţi Yeŧu Kriŧtu.
18 Nin ñaaŋ aambaaŋ kawina Naşibaţi. Abukul i akaaŋ anwooŋ Naşibaţi, ankabuŋ ţi Aşin, ameeţanuluŋ.
Uko wi Yowan nabatŧaar aţupuŋ ţi bkowul
(Maci 3.1-12; Markuŧ 1.1-8; Luk 3.1-18)
19 Uko wi Yowan ajakuŋ wii wi, wi baweek biki bayuday banwooŋ Yeruŧalem bayiluŋ baţeŋan Naşibaţi na bañaaŋ baloŋ banjaaŋ balemp du *Katoh Kaweek ki Naşibaţi kë baya hepara ñaaŋ i awo i.
20 Aampok pŧeem baka, abi ţup ţup baka ajinţan aji : « Mënţ nji dwooŋ Kriŧtu. »
21 Kë baŧeema aji : « Iwo in keeri? Iwo *Eli i? »
Kë aji na baka : « Mënwo Eli. »
Kë bakak ajaka : « Iwooŋ *Naţupar Naşibaţi i? »
Kë aji : « A-a. »
22 Kë başë ji na a : « Ţupun keeri ñaaŋ i iwooŋ ŋhilna ŋya ŋţup banyiluŋ un. We wi wi ikţupuŋ ţi iwi? »
23 Kë aŧeem na ŋţup ŋi *Iŧayi Naţupar Naşibaţi aji : « Nji, dwooŋ:
pdiim pankhuuranuŋ du *pndiiş aji :
“Nadolan bgah bi Ajugun bawo bŧool.” »
24 Bayili bukuŋ bawo *bafariŧay.
25 Bakak ahepar Yowan kak aji : « Kë we ukaaŋ kë ikbatŧaar wi iwooŋ iinwo Kriŧtu, iinwo Eli, iinkak awo Naţupar Naşibaţi? »
26 Kë aŧeem baka aji : « Nji dbatŧaar na meel, kë aloŋ aşë wo ţi pŧoofan i nawooŋ naammee,
27 ankmbiiŋ ţi kafeţ naan, i nji ndooŋ awo mëññoom kaŋup pfënşa işapaat. »
28 Uko mënţ uţëpna du Betani du plut pi bdëk bi Yordan, dul di Yowan akbatŧaaraanuŋ.
Uko wi Yowan Nabatŧaar aţupuŋ ţi Yeŧu
(Maci 3.13-17; Markuŧ 1.9-11; Luk 3.21-22)
29 Wi unuur ujinţuŋ, Yowan awin Yeŧu kë akbi, kë aşë ji : « Anwooŋ unkaneel wi bţeŋan wi Naşibaţi unkmpënanuŋ pekadu di umundu awi.
30 Uko wi nul wi wi nji kaţiiniyaanuŋ wi njakuŋ: “Ñiinţ ankmbiiŋ ţi kafeţ naan ajotën kadun, ţiki, ji mbi ndo kawo, adobi woha wo.”
31 Nji ţi uleef naan, mëmbi me'a, kë pdola ameeţana ţi bañaaŋ biki Iŧrayel, pakaaŋ kë mbi abatŧar na meel. »
32 Yowan aţup ji ñaaŋ namaar aji : « Dwin *Uhaaş wi Naşibaţi kë uwala ţi a awo ji ubalab ufaaŧal abi aţo ţi a.
33 Mëmbi me'a, kë anşaaŋ ayilën aji mbatŧaar na meel aşë jakën aji : “Ñaaŋ i ikwinuŋ Uhaaş wi naan uwala ţi a ubot uţo ţi a, uŋ mënţan akbatŧaaruŋ na Uhaaş wi naan.”
34 Kë nji nşë win abot aţup kë i mënţ awo Abuk Naşibaţi. »
Baţaşar Yeŧu baŧeek
35 Wi unuur ujinţuŋ, Yowan akak awo da na batëb ţi baţaşarul.
36 Awin kë Yeŧu akţëp kë aşë ji : « Anwooŋ unkaneel wi bţeŋan wi Naşibaţi i i. »
37 Baţaşarul batëb bukuŋ baŧiink uko wi ajakuŋ aşë ţaş Yeŧu.
38 Yeŧu akok awin kë bakţaşa aşë ji na baka : « We wi naklaaŋ ba? »
Kë baŧeem aji : « Rabi, ţuŋ di di iwooŋ ba? » Rabi dawooŋ najukan.
39 Kë aji na baka : « Nabiin naşë nawin. » Kë baya ame dko di awooŋ, aţo na a unuur mënţ. Ŋwoori ŋbaakër ŋi utaakal ŋakyaaŋ pban wal mënţ.
40 Andre aţa Ŧimoŋ Piyeer awo aloŋ ţi batëb banŧiinkuŋ uko wi Yowan ajakuŋ aşë ţaş Yeŧu.
41 Adun awin Ŧimoŋ naweekul aji na a : « Ŋwin Meşuwa. » Meşuwa dawooŋ Kriŧtu.
42 Añooţa du Yeŧu. Yeŧu ajabana këş aşë ji : « Iwooŋ Ŧimoŋ abuk Yowan, hënkuŋ ido kadu'ana Kefaŧ. » Kefaŧ dawooŋ Piyeer.
43 Wi unuur ujinţuŋ, Yeŧu aţu na pya uŧaak wi *Galilay. Aya awin da Filip aji na a : « Ţaşaan! »
44 Filip awo i Betŧayida, ubeeka wi bi Andre na Piyeer.
45 Kë Filip aya awin Natanayel aji na a : « Ŋwin ñaaŋ i Moyiŧ aţiiniyaanuŋ ţi Ulibra wi Bgah, i baţupar Naşibaţi bandukiiŋ bakaaŋ aţiiniyaan! Yeŧu i Naŧaret a, abuk Yoŧef. »
46 Kë Natanayel aşë hepara aji : « Uko uloŋ unuura uhil kapënna du Naŧaret i? »
Kë Filip aŧeema aji : « Biini, iwin. »
47 Yeŧu awin kë Natanayel akbi ţi a, aşë ji : « Abuk Iŧrayel na manjoonan akbiiŋ hënk, aamme kalagare. »
48 Natanayel kë aşë hepara aji : « Ţuŋ di imeennuŋ ba? »
Kë Yeŧu aŧeema aji : « Ji Filip abi ado kadu'u, wi iwooŋ du bfig uţeeh, dwinu. »
49 Kë Natanayel aşë ji na a : « Rabi, iwo Abuk Naşibaţi, iwo naşih i *Iŧrayel. »
50 Kë Yeŧu aŧeema aji : « Ifiyaar ţiki djaku dwinu wi iwooŋ du bko uţeeh. Iluŋ kawin iko indëmuŋ apel yi iwinuŋ nţa. »
51 Wi wi aşaaŋ aji : « Na manjoonan, dţupan, naluŋ kawin baţi bahaabëşa, ŋwanjuŧ ŋabot ŋado kapaya, kawala ţi *Abuk Ñiinţ. »