5
Godokono Sipi-goeo Da꞉peso Kapiyate Mokopiamida Pepa A꞉iyamidama꞉ Modobola
1 Ebema꞉ naimano balidite iyama꞉ deda꞉onami ebe tanalote olopoligoa꞉no, Kawodawate ebeno Kawo Elawodawano okoli bailo eba okolitalo, nale ebeno tumudi apu kotolo pepa mokopiamida ebo uimo, dopamo lumagite ebe pepano magumu apuamo ega꞉walo unu apuamo iyaiya tabo akulolete, ebene ebete mokopiamidate sebeni ala꞉mo gito matuomeiya.
2 Ega꞉walo nale Godokono elawo nopodawanomo idi kuimo, ebete ebeno tabo madodo unamo adipatelo negi, “Potele modobola꞉ka꞉ me mokopiamida pepano ale iyailite, pepano tabo apuapu ulamolema꞉?”
3 Wiyasiya ebe tetelo Godokono Unu Duliyomololo ega꞉walo opo duliyomololo ega꞉walo A꞉elaopino Duliyomololo modobo lumagi idite ka꞉luta꞉ ebe mokopiamida pepa a꞉iyamidate pepano iyaiya tabo ulaema꞉.
4 Ebema꞉ nanitabola, me tanaloma꞉ nale kawonomamo iimo mabu modobo lumagi idi ka꞉luta꞉ mokopiamida pepa a꞉iyamidama꞉.
5 Ebe tetelo 24 Watowatopi magumulo idite natamo negi, “A꞉ma꞉ kiitala꞉! Numa꞉, Yuda gudawano Layono-gaa ba꞉luta! Ebe Da꞉ibidikono walonepi magumulo Kawo Elawodawama꞉ eda꞉na, ega꞉walo ebete wato kikopu iyalo elawiya. Ebe mabuma꞉ ebe modobola me mokopiamida pepano sebeni ale iyailite pepa a꞉iyamidama꞉.”
6 Ebema꞉ nale Kawo Elawodawano okoli bai niyakabolo Sipi-goeo Da꞉peso utitalo uimo, ega꞉walo netewa-netewa Nopopi Iyanomate 24 Watowatopiago ebe anakopa꞉midalo eba pola꞉nalo ebo kulaimo. Ebe epate danakapumiya ebe sipi-goeo da꞉peso keba kunula꞉ka꞉ eba kunula. Ebe sebeni kalitagonola ega꞉walo sebeni balida꞉gola, ebema꞉ nanitabola, ebe sebeni kalita ega꞉walo sebeni balidi ebe Godokono Uliyanano sebeni apuapula, ebete ebe Uliyana iyalo tetelo opo duliyomolo kawonomamo apalibiya.
7 Ebe tetelo Sipi-goeo Da꞉pesote Kawo Elawodawano okoli baiamo tote ebeno tumudi apu kotone mokopiamida pepa ebo nelawi.
8 Ebene ebete ebe tanalo dosiyodili, ebe tetenomolo netewa-netewa Nopopi Iyanomo ega꞉walo 24 Watowatopi iba꞉te ibino ololo opamo eba alomolo ebe ebo amamatiya. Ebene nale Watowatopino tanalo ma kunu uimo, ibino kotolo begube ega꞉walo golodo kalili ebe inamabu netewate pola꞉lameni, ebe golodo kalili magumulo wadewade nibo inamabu tabokaonomola, ebe wadewade nibo inamabu ebe nanitabokobi midipiate towetowe tabo Godotamo degelanaka ebe iyaiya tabola.
9 Ebene iba꞉te Sipi-goeo Da꞉peso amamatema꞉ oli oale ma kunu alapiya,
“A꞉ma꞉ kapiyate modobola
mokopiamida pepa lawa꞉wete pepano ale iyailima꞉,
mabu epate a꞉ma꞉ danakapumitiyala,
ebe tetelo a꞉ma꞉le Godoko kekalakalaima꞉ema꞉
ibi Saitanakono idoko motone wagaila꞉wete
a꞉imano kalimamo ibi wiyakobi a꞉midiliyata.
Iyo, a꞉ma꞉le epo epetapi
ibino iyaiya tama taneba magumune
ega꞉walo iyaiya tabo gela taneba magumune
ega꞉walo iyaiya opo magumune uwata꞉wete,
10 ibi Kawo Elawodawa Godokono duliyomolo epoma꞉ a꞉midiliyata,
iba꞉te uwomua꞉ tetelo ebeno woko kosiyodilonama꞉.
Iyo, ebe mabuma꞉ opo duliyomolo kawonomolo
epo bilibilinomo epetapiate
iba꞉tamo ba꞉tudila꞉onakoma꞉na꞉.”
11 Ebe tetelo nale walo Unu Duliyomolono nopopi epetapi bilibilinomono tabo madodo kolowimo, ebe nopopino taneba kawonomola, nale ibi ka꞉la꞉miolema꞉ modoboa꞉. Iba꞉te Kawo Elawodawano okoli bai anakopa꞉midalo eba pola꞉nalo, netewa-netewa Nopopi Iyanomo ega꞉walo 24 Watowatopi iba꞉te
12 ibino tabo madodo unamo wadipalatelelo negeliya,
“Sipi-goeo Da꞉peso kubakubapiate danakapumiya,
modobola epo bilibilinomate
ebeno elawo tanalamo na꞉tudila꞉oma꞉na꞉,
ega꞉walo inamabu bilibilinomo ebetamo eba ikameolo,
ebe Mulodawama꞉ ega꞉walo A꞉didawama꞉ neka꞉ima꞉na꞉!
Iyo, iba꞉te ebeno mailo unamo nadipatema꞉na꞉,
ega꞉walo ebe eba walogolo,
ebetamo kalakala tabo negelama꞉na꞉!”
13 Ebe tetelo Unu Duliyomololo ega꞉walo opo duliyomololo dilukuliona, iyo, damela magumulo ega꞉walo kewa꞉ kolomono obo magumulo ega꞉walo tobolo unulo dilukuliona, ebe epo ega꞉walo igilo inamabu bilibilinomate kapimiya degelitiya, nale ebe tabo ma kunu olowimo,
“Kawodawate ebeno Kawo Elawodawano
okoli bailo uwomua꞉ tetelo dokolitamene
ega꞉walo Sipi-goeo Da꞉peso,
modobola ale uwomua꞉ tetelo
iba꞉tamo kalakala tabo eba gelanalo,
ibino mailo unamo bowadipalatelenakoma꞉!
Iyo, modobola ale ibi eba walogolenalo,
ibino elawo tanalamo ba꞉tudila꞉onakoma꞉!”
14 Ebe tetelo netewa-netewa Nopopi Iyanomate negeliya, “Me tabo nanitabonomola, taula!” ebene 24 Watowatopiate ibino ololo opamo eba alomolo Kawodawa Godoko ega꞉walo Sipi-goeo Da꞉peso ebo amamalateliya.