18
Babildonia akjiená guane
1 Ekí tuatogukueni jékaldaxa zhinik Jateja guaklde uldeñka mokue ezua zabaté tu. Eñki matshuwi niuwi agaxene naldé, ají muñshí zalda kagik zahauxa istuatshakna
2 jaldáñ ekí guak:
“¡Kuíbuldutema Babildonia akaldak akzé akuaka agaldañkashiji agajieñguá, agajieñguá na gu!
Exaki jisétshi alduna shanekuegaba izhoxaldixa za abá na gu.
Exaga na nubá, [béyakze] agatsé gasʉ́ñze diuwi mikzukundana agatsekue zhekualdaldixa za abá na gu.
3 Akbiñgaki saldiñga saná na nahauxa aldéñ na askuildekldana kakzukuiñgaba kazʉtukshane jana amak katshishane.
Ekí sha atshijiñga saldiñga sanákuetshi sáñkaldakue na askuildeklde.
Ekíga na, aldéñ zeñ akldexaldiamak zʉxaita kakzʉjabinéñ zhinik na
kagi agatsauxa zaldakue numa nabesaxakue kabia kakuanekue nak.”
4 Guñgueni mokue jékaldaxa zhinik múldigaba ekí akuagaté nuká:
“Nají minekuañki, ¡exa kuíbulduk zhinik akzʉxaita guwíñ!
Exa zhekuekue sha ajanashamakga sha atshiji guamiñnegak.
Ekíga, migisalshá guakuekueja kagisalshapanatshak, maiñ jiaga miñgisalshazháldiamak.
5 Akze, zʉxaita sha ajanashaneki jékaldaxa yo neká tuñgakna,
sakí guiyaba tuakue kagatsé katualdikuéñ akldañká guak ekí kagisalshaldikue.
6 Sakí atshane nake, amakbeñga mutshuizha shi akizhakualdikshijí.
Ají jaldu sha atshaneldiagaba akuék axautshikue kastukshanamakga,
mutshuizha aldéñga izhgatuxaldixa shi siyaxagaxauwí.
7 Aldéñ zeñ akldexaldiamak zʉxaita izhgasjabiji sekuazhikshiji izhonauxa,
ekíga akizhbezhgui zʉxaita zalda guiyaba atuñshi abauñshiñgaba shi akuí.
Jinake naldakí. Aldunaxa ekí akldeka nak: ‘Naski munzhi sáñkalda sanekuge ité. Nasga ni mitsák sameyaldeklduge mauwashtéñkuge nzha.’
8 Akna migisalshá guakuekue shuixa, itshana, maldi makuája ezua ldiuwañgaba axaldaklde agisalshatoxaldiéñ, guksék ayoshi agaldañgashaldixa.
Jate saldiñga netshi Sáñkalda auxaga kama naxaldék ekí guiyaba tuakue agatsé axetenuge nahák.”
9 Guatshak kagik zhekuekuetshi sáñkaldakue sha atshiji e na askuildeshi, e na zhualduxa zeñ kakldexaldiamak zʉxaita izhgasjabiji izhonekueki kuíbuldu puldatuka ijiá nitshigaté atuatshakna, e shalda izhajani abauwiñgaba akualdixa.
10 Ekí zʉxaita guiyaba tuaté atuatshakna, zhe kakzeshi agajué zeñka akteté noshi ekí akuaxaldá:
“Wau wau wau, wau wau wau, kuíbuldutema Babildonia akaldak mikzé, akaldak kama mikué ne,
¡jinak anuñkáte guiyaba mawatuñshi maldeñgaba magaldañgashá guxá!”
11 Guatshak numa nabesaxa kagi nauxa zaldakue jiaga e shalda izhajani abauwiñgaba akualdixa. Akbiñgaki ni meja numa kakjabiyaldixa naldaksá guwák.
12 Akze, numa naba akiyasaldiamak akualdeñka nanekueki saldiñga nalda niuba níkuiti akzekue, zhakuá anuñka nalda maldé akzekue, saldak agatsekue, uldikulda, atsʉshi na sezhekldekue. Saldiñga nalda kaldi zauñka we juma izhukagaba. Jika anuñka naldak zhinik sezhekldekue, katshuk zhinikga sezheklde, kaldi akzekuek zhinikga sezheklde, shezhaxaldak zhinikga sezheklde, jagi akzék zhinikga sezheklde juizhi.
13 Ekíga na, jika we akzukuxagaba, we juma izhaxaldixagaba, we zukualdixagaba, kalwéldia akldé we akzegaba, mantixa akldé akzegaba, pañ sezheka akldé akzé abuldinegaba, zulda abuldiagáldekue, béyakze numa uldeñkakue, jubeju, kabayu, kaldu janagatse kabayuk akldi awaldeñkakue, káguba benekue jiaga ajabiyaldixakue juizhi naba akiyasál akualdeñka nane.
14 Ne kuíbulduk ekí agabeyaldixa: “Jika mikldunká ‘náxalda guashí’ alduna magauxa namaldekueki nuk migajuezhá guxá tiuwi. Numa zʉxaitsha janshagatsegaba zeñ mikldexaldiamak mixaldé naneki migitshuaniñga nuk migitshuizhá guxá tiuwi.”
15 Guatshak ekí numa nabagisaji nuxa kabia nekldekuejañki kuíbuldu zʉxaita guiyaba tuaté atuatshakna, zhe kakzeshi agajué zeñka akteté noshi, e shalda izhajani abauwiñgaba
16 ekí akuaxaldá:
“Wau wau wau, wau wau wau, kuíbuldutema akaldak mikzé maldé,
zhakuá uldikulda atsʉshi na sezheklde akzé mijuakue,
níkuiti, niuba janshagatse mitshekue jiaga
17 ¡jinak anuñkáte numa zʉxaitsha mixaldé maldeñgaba naldaksá guxá!”
Guatshakna balku numa uldeñkakuetshi sáñkaldakue, balku uldeñkakue, balkuk neñkakue, balkuk zhinik kasa izhgauxakueki agajué zeñka akteté aldoshi,
18 ai kuíbuldu puldatuka ijiá nitshigaté atuatshakna ekí jaldáñ akuaxaldá: “¡Mielde kuíbuldu e janamé akzé naldaldixa ne!”
19 Akuagatshake e shalda izhajani abauwiñgaba akuatogatshak, ekí izhajanká awatuñshi sáñkaldeldi kaksibuldi izhgazheñgui ekí jaldáñ akuaxaldá:
“Wau wau wau, wau wau wau, kuíbuldutema akaldak mikzé maldé,
numa zʉxaitsha zʉñjabimaldéñ zhinik na saldiñga balku níbunik zʉñkaldekueki kabia zʉnakuamalde ne,
¡jinak anuñkáte maldeñgaba akldañka makuxá!”
20 Akuagatshak ekí jiaga nuká:
“¡Saldiñga jékaldaxa zhe minogauxa, alde kuíbuldu akldañkane shalda zeñ shi miñneshí!
Jatetshi nekbinekuek, Duwe Jesújañga ají múldigaba guaxal mimakaxanekuek,
Jatetshi múldigaba naldiñga mizʉxaitshixakuek, ¡zeñ shi miñneshi!
Jinake naldakí. Alde kuíbuldu sha mimakuane shalda
Saldiñga netshi Jatejañga axatshakuamak axatshiji,
guiyaba tuakue axeté guane nak.”
21 Ekí tuatogukueñga Jateja guaklde uldeñka ezua matshuwi kama axaldejañki jagitema izhgaldakshiñgueni, níbunildi aguteñgueni ekí guak:
“Kuíbuldutema Babildonia akaldak mikzé makuaka,
jekibeñga maxajieñgualdinik ni mitsák mokue mawatuazhíta naldaldixa.
22 Ni mitsák mikenáñ azabeyá, ni azabeyaldiamak jibagabeñka azabeñshá, kuizi axazajuí, tata axazajuí nukabaldáta.
Ni káuxaldak jibatshixakue ni mitsák mokue mikenáñ tuabaldáta.
Ni mitsák mokue mikenáñ jakbalda ishkaldék nukabaldáta.
23 Ni mitsák mokue muñshí zukuxa mikenáñ asuñguane muñshí tuabaldáta.
Ni mitsák mokue mikenáñ numa aldegatukakue zeñ ishkazakuák nukabaldáta naldaldixa.
Jinak ekí migisaldaldixa naldakí.
Exa zalda numa nabesaxakueki kagi zhekuauxa guashiñki akldé akzekue izhogatshak,
mañki awaldintik atshiji na, saldiñga sanákue naldagálde nuxa namak kajañgushamalde nak.
24 Mañga guana Jatetshi nekldekue, ají múldigaba naldiñga zʉxaitshixakue abi baxé kakuaxamalde.
Ekíga na, kagi agatsauxa akuaxanauxa, mañga kakuaxamaldekue nakldá.”