5
Jubeju zhauwa janane
1 Ekí tuatogukueñga sanexa xaldoxéxa ité noxeja jibatshaldi mual kalta makue mushtabañga akzukue kugua juizha ishkatsuñguane aksuí tu.
2 Ekí tualdatshake Jateja guaklde uldeñka ezua matshuwi kama axaldejañki saldiñgaja aldukaldiamak jaldáñ ekí guagaté nuká: “¿Meja jalde kalta ishkatsuñguaneki ishkawatiya niuwi axaldé naldaldixa ne?”
3 Guatshak ni ezua jékaldaxa, ni kagik, ni kagi sʉkldi zaldaja jiaga kalta ishkatsuñguane ishkawati xaldeki tu guaka naldakí na naldá.
4 Ni meja kalta ishkatsuñguane ishkawati xaldeki tu guaka niuwi axaldé naldakí naldák, naski itshani mauwiñgaba
5 guatogukueñki, ezua duebajañki ekí nakbeyá: “Akldé mauwagába. ¡Tu guwá! Judá ldaxega nabi sáñkalda nahamakbe saneka, sáñkalda Dabí zhinikga nakldeki ubiyá guane. Akna eja zʉnake kalta kugua juizha ishkatsuñguane ishkawatiaka nakldá.”
6 Nakbeyatshake ekí tu: Ezua jubeju zhauwa Jatek axakuaxa guanane tuñgatse sanexa xaldoxé staxaga, makaiwa benekueja, 24 duebakueja iyabateklde kenaxaga akté tu. Eñki kugua katshu aklduka, kugua uba ikué naldatshak, ubaki Jatetshi Alduna kugua naldashiñga ne kagi agatsauxa axaxanega.
7 Gueni Jubeju zhauwaja sanexa xaldoxéxa ité nukak axaldeyeniki etshi jibatshaldi mual kalta ishkatsuñguane aksuikualdé ipaná.
8 Amak ipanatshaga na makaiwa bene naldekueja, 24 duebakue naldekueja jiaga Jubeju zhauwa akldé akzamakga agazukualdiamak nuldu axayogatshak, jika azabeñshi jiba agabeñka kaksuikuegaba, jaldu niubakue we juma izhuka jialda akué kakldukagaba. Ai we juma izhukaki Jatetshi nekldekueja Jate axazguagatuka guashi.
9 Gueni abisa zubeya Jubeju zhauwak ekí axazabeyaldá:
“Ma za na jalde kalta ishkatsuñguane ipana xaldeki ishkawatiya niuwi mixaldé.
Jinak niuwi mixaldé naldakí. Mañki makuagatshak mijí abi mikzuldatshakna,
saldiñga kuíbuldu zaldakue, saldiñga sanákue, saldiñga sha sha zukuaxa saná na nahauxa nekue zhinik
Jatetshi aldaldaldiamak kesabímalde nak.
10 Ekibeñga na, Nauwijateja za kaksaneshi, e za axazauwi
múldigaba agaskaitshatoxaldixakue kaldekshi,
kagik zhekuekue agasanexaldixa ketemalde nak.”
11 Ekí axazabeyatshak mokue tualdatshake, matshuwi Jateja guaklde uldeñkakue sanexa xaldoxé, benekue, duebakuek me yo iyabateklde tualdatshake, aikueki matshuuwi izáatasa, guáagasa zalda aldaldi azabeyaté nukaldatshak,
12 ekí jaldáñ azabeyaté nuká:
“Jubeju zhauwa Jatek maxakuaxanane maldé, ma za ekí mikbeyakue ze:
¡Ma na saldiñga jika na nahauxa maksaneka nibaldá,
Ma za kabia ldexa na nahauxa miksuikue nibaldá,
Ma za auxaga mishkué maldé nibaldá,
Ma za auxaga kama mixaldé nibaldá,
Ma za akaldak mikzahamak mixabeta ipanamildaka nibaldá,
Ma za akaldak akaldak mikzé nibaldá,
Ma za saldiñga zeñ zalda mikbeya ipanamildaka nibaldá!”
13 Axazabeyatogatshak saldiñga Jateja gauwá guanauxa alnobaldi, kagik, kagi sʉkldi, níbunildi zhe nogauxa nekue ekí azabeyaté nuká:
“¡Ma sanexa xaldoxéxa ité malduká, ekíga na ma Jubeju zhauwaga maldé,
Ma na saldiñga zeñ zalda mikbeya ipanamildaka nibaldá,
Ma za akaldak mikzahamak mixabeta ipanamildaka nibaldá,
Ma za akaldak akaldak mikzé nibaldá,
Ma za saldiñga jika na nahauxa maksaneka nibaldá!
¡Ekí za naldiñga shi maldaldataní!”
14 Ekí axazabeyatshake makaiwa benekuejañki “¡Ekíga shi naldí!” ayokuatshak, 24 duebakuejañki [ega izhoshiñga izhuka] akldé akzamakga agazukualdiamak nuldu axayó guaté tu.