38
LEUM GOD El Topkol Job
1 Na LEUM GOD El kaskas nu sel Job in paka uh me, ac fahk:
[LEUM GOD]
2 “Su kom an ku kusen siyuk nu ke lalmwetmet luk uh
Ke kas na lalfon ac wangin kalmac lom ingan?
3 Fin mukul se pa kom, tuyak inge
Ac topuk ma nga ac siyuk sum uh.
4 Ku kom tuh muta ke nga orala faclu ah?
Fin arulana yohk etu lom an, kwal srumun ngan lohng.
5 Su tuh wotela mu in pa inge lupan faclu ah?
Su tuh asroelik lain in srikasrak uh nu fac ah?
Ku kom etu nufon top nu ke ma inge?
6 Mea sruokya sru ma loangeak faclu uh?
Su tuh oakiya eot in sruwasrik lun faclu?
7 Ke tafun lotu in len sac, itu uh tuh tukeni on,
Ac lipufan uh sala ke engan.
8 “Su tuh kaliya mutunpot ma sikulya meoa ah
Ke kof uh pisrme liki kapin faclu ah?
9 Nga pa tuh afinya inkof uh ke pukunyeng
Ac nokomla ke lohsr lulap ah.
10 Nga tuh akilenya masrol se lun inkof uh,
Ac filiya oan tukun mutunpot ma srumasryukla arulana ku.
11 Ac nga fahk nu sin meoa uh, ‘Safla na insacn!
Kuiyen noa lom an ac fah tui na inse.’
12 Job, ku nu oasr len se in moul lom uh
Ma kom sap faht uh in takak?
13 Nu oasr pacl kom sap tafun lotu uh in sruokya faclu
Ac osrokak mwet sulallal uh liki acn in wikwik lalos uh?
14 Kalmen len uh oru tuh fineol uh ac infahlfal uh in arulana kohn —
Oana ikwikeni ke sie nuknuk,
Kalem oana inken sie sil ma itungyuki fin fohk kle uh.
15 Kalem lun len uh arulana saromrom nu sin mwet koluk,
Pa ikololosi liki anwuk sulallal.
16 “Ku nu oasr pacl kom som nu ke unon in kof ma oan in acn loal meoa?
Nu oasr pacl kom fahsr fin kapin meoa uh?
17 Nu oasr mwet akkalemye nu sum mutunpot
Su karingin acn lohsr lun facl sin mwet misa?
18 Mea, kalem sum lah faclu lupa kac?
Topukyu kom fin etu.
19 “Kom etu lah kalem uh tuku ya me,
Ku lah pia acn ma lohsr uh mutawauk we uh?
20 Ya kom ku in srisrngiya acn kalem uh ac lohsr uh in tui we,
Na sifilpa folokunultalma nu yen seltal uh?
21 Sahp kom ac ku, mweyen kom arulana matu,
Ac kom tuh isusla oe ke faclu orekla ah!
22 “Kom nu utyak nu in acn in filma
Su nga filiya snow ac af yohk kosra uh we?
23 Nga filiyana oan akola nu ke pacl elya ac sikyak,
Ac nu ke len in lokoalok ac mweun.
24 Kom nu som nu ke acn faht ah takak we,
Ku acn ma eng kutulap uh tuh we me uh?
25 “Su pukanak inyoa ma af uh ac kahkla kac,
Ac sakunla inkanek lun pusren pulahl in pacl in paka?
26 Su oru tuh af uh in kahkla yen wangin mwet muta we?
27 Su aksroksrokye acn ma pulamlamla ac arulana enenu kof,
Tuh mah uh in ku in srunak we?
28 Ku oasr papa tumun af uh ku aunfong uh?
29 Su oswela ice ac aunfong ma kekela uh,
30 Ma oru tuh kof in ekla oana eot,
Ac orala fin kof uh in tipenmarla?
31 “Ya kom ku in kapriya un itu Pleiades nu sie,
Ku tulala mwe lohl ma kapriya un itu Orion uh?
32 Kom ku in pakiya mukuikui lun itu uh ke pacl la,
Ac kol un itu ma petsaela Mwe Yuyu Lulap se ac Mwe Yuyu Srisrik sac uh?
33 Ku kom etu ma sap ma karingin acn engyeng uh,
Ac kom ku in oru tuh ma sap inge in orekmakinyuk pac faclu?
34 “Kom ku in wowoyak ac sapsap nu sin pukunyeng uh
Ac oru tuh elos in fwikomla in wolak ke af?
35 Ac kom fin sap sarom uh in sarmelik,
Ya ac ku in tuku nu yurum ac fahk, ‘Kut a inge. Mea pac kut in oru?’
36 Su fahk nu sin won ibis lah Infacl Nile ac sronoti,
Ku su fahk nu sin won wa mukul uh lah ac afi?
37 Su oasr etauk yoro, ac ku in oakla pukunyeng uh,
Ac eklulosyak in kahkinya af uh —
38 Af su folsani fohkfok uh ac srukoalela?
39 “Ku kom pa sokak mongo nun lion uh,
Ac akkihpye lion fusr su masrinsral
40 Ke elos ac wikwik in luf lalos uh,
Ku oan in luf kialos soan ma elos in uniya uh?
41 Su sang mongo nu sin won raven uh
Ke pacl elos forfor masrinsral,
Ac ke pacl won fusr natulos uh pang nu sik in sukok mongo?