7
Mwe Sang Lun Mwet Kol
1 Ke len se Moses el tulokunak tari Lohm Nuknuk Mutal sin LEUM GOD, el mosrwela ac kisaela Lohm Nuknuk sac wi kufwen orekma nukewa kac, oayapa loang uh wi kufwen orekma nukewa nu kac.
2 Na sifen sou lulap nukewa su mwet kol in sruf lun Israel, nuna mwet na ma fosrngakin oaoa lulap se ke pisen mwet uh,
3 elos use mwe sang lalos inge nu sin LEUM GOD: wagon onkosr ac cow mukul singoul lukwa, wagon soko sin kais luo mwet kol, ac cow soko sin kais sie mwet kol. Tukun elos sang ma inge,
4 LEUM GOD El fahk nu sel Moses,
5 “Eis mwe sang inge in orekmakinyuk nu ke ma ac orek ke Lohm Nuknuk Mutal. Sang nu sin mwet Levi uh fal nu ke orekma ma elos ac oru.”
6 Ouinge Moses el sang wagon ac cow mukul uh nu sin mwet Levi.
7 El sang lukwa wagon uh ac akosr cow uh nu sin mwet lal Gershon,
8 ac wagon akosr ac cow oalkosr nu sin mwet lal Merari. Orekma nukewa lalos orek ye kolyuk lal Ithamar wen natul Aaron.
9 Tusruktu wangin wagon ku cow Moses el sang nu sin mwet in sou Kohath, mweyen kufwen orekma mutal ma elos karingin uh enenu na in utuk finpisalos.
10 Na mwet kol elos oayapa use mwe kisa lalos in akfulatye kisala lun loang uh. Ke elos akola in sang mwe kite lalos mutun loang uh,
11 LEUM GOD El fahk nu sel Moses, “Fahkang nu selos lah in kais sie len ke lusen len singoul luo, kais sie mwet kol fah srukak mwe kite lal nu ke kisaiyen loang uh.”
12-83 Na elos use mwe kisa lalos uh oana ke takla ten inge:
| Len | Sruf | Mwet Kol |
| len se meet | Judah | Nahshon, wen natul Amminadab |
| Akluo | Issachar | Nethanel, wen natul Zuar |
| Aktolu | Zebulun | Eliab, wen natul Helon |
| Akakosr | Reuben | Elizur, wen natul Shedur |
| Aklimekosr | Simeon | Shelumiel, wen natul Zurishaddai |
| Akonkosr | Gad | Eliasaph, wen natul Deuel |
| Akitkosr | Ephraim | Elishama, wen natul Ammihud |
| Akoalkosr | Manasseh | Gamaliel, wen natul Pedahzur |
| Akeu | Benjamin | Abidan, wen natul Gideoni |
| Aksingoul | Dan | Ahiezer, wen natul Ammishaddai |
| Aksingoul sie | Asher | Pagiel, wen natul Ochran |
| Aksingoul luo | Naphtali | Ahira, wen natul Enan |
Mwe sang ma kais sie selos tuh use inge oana sie: sie pesin silver su toasriya oasr ke ounce lumngaul, ac sie pol silver su toasriya ounce tolngoul, fal nu ke srikasrak ma oakwuki, kewana sessesla ke flao karyak ke oil in olive nu ke mwe kisa wheat; sie ahlu gold su toasriya ounce akosr, sessesla ke mwe keng; cow mukul fusr soko, sheep mukul soko, ac sheep fusr mukul soko yac se matwa, nu ke mwe kisa firir; nani soko nu ke kisa ke ma koluk; cow mukul lukwa, sheep mukul limekosr, nani limekosr, sheep fusr limekosr yac se matwa nu ke kisa in akinsewowo.
84-88 Pa inge pisen mwe kisa ma mwet kol singoul luo ah orani nu ke pacl se ac kisaiyuk loang uh:
— pol silver singoul luo ac pesin silver singoul luo, toasriya oasr ke paun onngoul
— ahlu gold singoul luo, toasriya ounce angngaul oalkosr, sessesla ke mwe keng
— cow mukul singoul lukwa, sheep mukul singoul lukwa, sheep fusr mukul singoul lukwa yac se matwa, wi mwe kisa wheat nu kac tuh in mwe kisa firir
— nani mukul singoul lukwa tuh in mwe kisa ke ma koluk
— cow mukul longoul akosr, sheep mukul onngoul, nani mukul onngoul, sheep fusr mukul onngoul yac se matwa. Ma inge ma nu ke mwe kisa in akinsewowo
89 Ke Moses el ilyak nu in Lohm Nuknuk Mutal in kaskas nu sin LEUM GOD, el ac lohng pusren LEUM GOD kaskas nu sel inmasrlon cherub luo ma oan fin mwe afyuf ke Tuptup in Wuleang uh.