9
Lalmwetmet Ac Lalfon
1 Lalmwetmet el musaeak lohm sel, ac orala sru itkosr kac.
2 El sapkin in anwuki soko kosro nu ke sie kufwa, ac kurrauk mwe akyu mongo nu ke wain uh, ac akoela tepu nu kac.
3 El supwala mutan fusr kulansap lal nu yen fulat ke siti uh elos in pang ac fahk,
4 “Utyak, kowos su wangin etauk la!” Ac nu sin mwet lalfon el fahk,
5 “Fahsru, kang mwe mongo nak, ac nim ke wain ma nga kurrauk.
6 Fahsr liki mwet nikin ingan ac moul. Fahsr ke inkanek lun etauk.”
7 Kom fin kai sie mwet filang, el ac folokin ke kas in akmwekin. Kom fin kai sie mwet koluk, el ac suk in akngalye kom.
8 Nimet kai sie mwet filang; el ac srungakom. A kom fin aksuwosye sie mwet lalmwetmet, el ac akfulatye kom.
9 Kutena ma kom ac fahk nu sin sie mwet lalmwetmet ac akyokye lalmwetmet lal, ac ma nukewa kom ac fahk nu sin sie mwet suwoswos ac laesla etauk lal.
10 Sangeng sin LEUM GOD pa mutaweyen lalmwetmet. Ac eteyen El su Mutal pa etauk.
11 Lalmwetmet uh ac akloesye moul lom.
12 Kom pa ac eis woiya kom fin lalmwetmet, ac kom fin srangesr eis, na kom ac keok.
13 Lalfon el oana sie mutan wowon, su nikin ac sumwekin.
14 El muta ke mutunoa in lohm sel, ku muta fin sie mwe muta fulat in siti uh,
15 ac pang nu selos su fahsr alukella nu ke orekma lalos sifacna. El fahk,
16 “Utyak, kowos su wangin etauk la!” Ac nu sin mwet lalfon el fahk,
17 “Kof pisrapasrla uh arulana emwem. Bread pisrapasrla uh pa arulana yu.”
18 Mwet inge tiana etu lah mwet nukewa ma som nu in lohm sel uh misa; ac elos su utyak tari nu yorol, inge elos oan yen loal in facl lun mwet misa.