89
[Psalm lal Ethan, Mwet Ezra]
Soko On Nu Ke Pacl In Keok Lun Israel
1 O LEUM GOD, nga ac fah onkakin lungse kawil lom pacl e nukewa.
Nga ac fah fahkak oaru lom nwe tok.
2 Nga etu lah wangin saflaiyen lungse lom,
Ac oaru lom oakwuki ku, oana kusrao.
3 Kom fahk, “Nga orala sie wulela inmasrlok ac sie su nga sulela.
Pa inge ma nga tuh wulela nu sel David, mwet kulansap luk:
4 ‘Sie sin mwet in fwil nutum ac fah tokosra in pacl nukewa;
Nga fah oakiya tuh tokosrai lom in oan nwe tok.’ ”
5 Kusrao onkakin ma wolana kom oru,
Elos su mutal fah onkakin oaru lom, LEUM GOD.
6 Wangin sie inkusrao oana kom, O LEUM GOD;
Wangin inmasrlon mwet inkusrao ku in lumweyuk nu sum.
7 Inmasrlon u mutal lom, elos sangeng sum;
Elos nukewa pasrla ye motom.
8 LEUM GOD Kulana, wangin sie su ku oana kom,
Tuh kom oaru in ma nukewa, O LEUM GOD.
9 Kom leum fin ku lun meoa,
Kom akmisye noa lulap we.
10 Kom itungya kosro lulap Rahab, ac unilya;
Ke ku lulap lom kom kutangla mwet lokoalok lom.
11 Kusrao ac faclu ma lom,
Kom orala faclu ac ma nukewa loac.
12 Kom orala epang ac eir,
Fineol Tabor ac Fineol Hermon on nu sum ke engan.
13 Fuka lupan ku lom!
Fuka pwengpengiyen ku lulap lom!
14 Tokosrai lom oakwuk fin suwoswos ac nununku pwaye,
Lungse ac oaru akkalemyeyuk in ma nukewa kom oru.
15 Fuka lupan insewowo lalos su alu nu sum ke on,
Su moul ke kalmen kulang lom!
16 Ke sripom elos engan ke len nufon,
Ac elos kaksakin kom ke wolana lom.
17 Kom ase kutangla yohk nu sesr,
Ac ke lungse lom kom oru tuh kut in kutangla.
18 Kom, O LEUM GOD, kom sulela mwet in loangekut;
Ac kom, God Mutal lun Israel, ase tokosra lasr.
Wulela Lun God Nu Sel David
19 Kom kaskas nu sin mwet kulansap oaru lom in sie aruruma in pacl meet ah, ac fahk,
“Nga sang kasru nu sin sie mwet mweun pwengpeng,
Nga akleumye sie su nga sulela liki inmasrlon mwet uh.
20 Nga oru tuh David, mwet kulansap luk, elan tokosra
Ke nga mosrwella ke mwe akmusra mutal.
21 Ku luk fah welul pacl e nukewa,
Ac ku luk fah oru elan ku.
22 Mwet lokoalok lal fah tia kutangulla,
Ac mwet koluk fah tia ku facl.
23 Nga ac fah itungya mwet lokoalok lal
Ac onelosi nukewa su srungal.
24 Nga ac fah lungse el ac pwaye nu sel,
Nga ac fah oru tuh elan ku fin mwet lokoalok lal pacl e nukewa.
25 Nga ac fah tafwela tokosrai lal,
Mutawauk Meoa Mediterranean lac nwe Infacl Euphrates.
26 David el ac fah fahk nu sik,
‘Kom papa tumuk ac God luk,
Kom eot ku luk ac lango luk.’
27 Nga fah oayapa oru tuh elan wounse mukul nutik,
El pa fulat liki tokosra nukewa.
28 Nga fah karingin wuleang luk nu sel,
Ac wulela luk fah welul nwe tok.
29 Tokosrai lal ac fah oakwuki ku oana kusrao.
Sie sin mwet in fwil natul ac fah tokosra in pacl nukewa.
30 “Tusruktu, mwet in fwil natul fin tia akos ma sap luk,
Ac tia moul fal nu ke oakwuk luk,
31 Elos fin seakos mwe luti luk
Ac tia karingin ma sap luk,
32 Na nga ac fah srunglulos ke sripen ma koluk lalos;
Nga ac fah akkeokyalos ke ma sutuu lalos.
33 Tusruktu, lungse luk nu sel David ac fah tia tui,
Oayapa nga fah tia mulkunla wulela luk nu sel.
34 Nga ac fah tiana kunausla wulela inmasrlok el,
Ku sisla siefanna ma nga tuh wuleang nu sel.
35 “Wulela sefanna nga fah orala ke Inek:
Nga fah tiana kikiap nu sel David.
36 Ac fah oasr na fwil natul,
Ac nga fah karingin tokosrai lal ke lusenna pacl faht uh kalem.
37 Ac fah sie ma oakwuk oana malem uh
Su liye ma nukewa inkusrao me.”
Kas In Mwemelil Ke Kutangyukla Tokosra
38 Tuh pa inge kom kasrkusrak sin tokosra su kom sulela;
Kom fahsr lukel ac sisella.
39 Kom kunausla wulela lom nu sin mwet kulansap lom
Ac sisla tefuro lal nu infohk uh.
40 Kom kunausya kalkal in siti sel
Ac filiya pot ku lal in musalsalu.
41 Elos nukewa su fahsr we, elos pisre ma lal,
Ac mwet tulan lal nukewa elos isrunul.
42 Kom sang kutangla nu sin mwet lokoalok lal;
Kom oru tuh elos nukewa in engan.
43 Kom oru tuh in wangin sripen mwe mweun natul,
Ac kom lela in kutangyukla el ke mweun uh.
44 Kom eisla scepter lal lukel
Ac ikruiya tron lal nu infohk uh.
45 Kom oru tuh elan matuoh meet liki pacl fal lal,
Ac afinilya ke mwekin.
Sie Pre In Siyuk Ke Molela
46 O LEUM GOD, ya kom fah wikinkomla nwe tok?
Putaka mulat lom uh fah firir oana sie e?
47 Esam lah moul luk arulana fototo,
Esam lah kom orekutla, moul lasr in sukawil.
48 Su ku in moul ac tia misa?
Mea mwet uh ku in oru in kaingkunla kulyuk uh?
49 Leum, ku pia akpwayeyen lungse lom su kom akkalemye meet ah?
Pia wulela kom tuh oru nu sel David?
50 Nik kom mulkunla lah akkolukyeyuk nga, mwet kulansap lom,
Ac nga muteng kas in selnga nukewa lun mwet pegan nu sik.
51 Mwet lokoalok lom elos aksruksrukye tokosra su kom sulela, O LEUM GOD!
Elos akkolukyal yen nukewa el fahsr we.
52 Kaksakin LEUM GOD nwe tok ma pahtpat!
Amen! Amen!