95
Soko On In Kaksak
1 O fahsru, lela kut in kaksakin LEUM GOD,
Lela kut in on ke engan nu sin God su langoekut.
2 Lela kut in tuku nu ye mutal ke kulo,
Ac yuk on in engan ke kaksak.
3 Tuh LEUM GOD El sie God ku,
El sie tokosra kulana fin god nukewa.
4 El Leum fin faclu nufon,
Liki yen loal in luf uh nu yen fulat in eol uh.
5 El Leum fin meoa, su El orala,
Oayapa faclu su El lumahla.
6 Fahsru, lela kut in epasr ac alu nu sel,
Lela kut in sikukmutunte ye mutun LEUM GOD, su orekutla!
7 Tuh El God lasr,
Ac kut mwet su El nunku kac,
Ac un sheep natul su El karingin.
Misenge, porongo ma El fahk:
8 “Nik kowos srangesr lohng kas, oana mwet matu lowos ke elos muta in Meribah,
Oana ke len se elos muta yen mwesis Massah.
9 Elos tuh srikeyu we,
Elos ne liye ma nga oru nu selos.
10 Nga tuh arulana toasr selos yac angngaul,
Ac nga fahk, ‘Mwet inge arulana likkeke!
Elos tia lungse in akos ma sap luk.’
11 Nga tuh kasrkusrak ac orala wulela na ku se, fahk mu,
‘Kowos ac fah tiana ilyak nu in acn in mongla se
Nga tuh akoo in sot nu suwos.’ ”