EXODUS
Di Beebaa Exodus
Di haga modongoohia:
Telekai dela bolo Exodus dono hadinga bolo “E hagatanga gi daha”. Gei di mee deenei le e haga modongoohia nia mee hagalabagau ala i lodo di kai o digau Israel ala nogo hai hege hagahuaidu i lala digau Egypt, ga hagatanga gaa hula gi daha.
Di beebaa deenei e wwae haa:
1) Tagalohaa digau Hebrew gi daha mo di nadau noho hege,
2) di nadau hula gi di Gonduu Sinai,
3) di hagababa ne hai go God i hongo di Gonduu Sinai ang gi ana daangada, mo nia haganoho belee hai hegau ai digaula, mo
4) di hau mo di humu haga madamada o di gowaa hai daumaha digau Israel, mo di hai o nnegau o digau hai mee dabu mo nnangaahai e daumaha ang gi God.
Di mee koia e hagalabagau la go nia mee a God ne hai, gaa mee ai di hagamehede ana dama nogo mouli huaidu, gaa hai digaula gii hai digau e hai mee gi di hagadagadagagee gi di madagoaa dela digi dae mai.
Tangada hagalabagau i lodo di beebaa deenei la go Moses, tangada dela ne hilihili go God belee lahi digau Israel gi daha mo Egypt. Gei di mee koia e hagalabagau la go nia Haganoho e Madangaholu a God, dela i di mada e 20.
Di hagahonu di beebaa deenei:
Digau Israel gu maahede gi daha mo Egypt (1.1—15.21)
a. Di mouli hai hege i lodo o Egypt (1.1-22)
b. Di haanau o Moses mo dono tomo aga (2.1—4.31)
c. Moses mo Aaron e heetugi gi di king o Egypt (5.1—11.10)
d. Pasoobaa mo di hula gi daha mo Egypt (12.1—15.21)
Mai Tai Mmee adu gi di Gonduu Sinai (15.22—18.27)
Nnaganoho mono hagababa (19.1—24.18)
Di Hale laa o di Hagababa mo di aago di hai e daumaha (25.1—40.38)
1
Di haingadaa o digau Israel i Egypt
1 Aanei la go nia ingoo o nia dama daane o Jacob ala ne hula gi Egypt dalia a mee, nia daane huogodoo mo digau nadau hale:
2 Reuben, Simeon, Levi mo Judah,
3 Issachar, Zebulun mo Benjamin,
4 Dan, Naphtali, Gad mo Asher.
5 Di hagadili o Jacob huogodoo e mada hidu. Gei Joseph nogo i Egypt mai hua i mua.
6 Malaa, Joseph mo ono duaahina huogodoo guu mmade mo digau huogodoo o di adu dangada deelaa.
7 Di hagadili o Israel gu dogologowaahee, gei gu maaloo dangihi i hongo tenua go Egypt.
8 Di king hoou guu dagi Egypt, geia digi iloo ia Joseph,
9 gei mee ga helekai gi ana daangada, “Digau Israel la gu dogologowaahee, digaula ga maaloo dangihi i gidaadou.
10 Gidaadou e hai tadau mee e hai digaula gi de dogologowaahee, ga huli mai digaula ga hagamaamaa tadau hagadaumee ma ga heebagi mai gi gidaadou, gaa lawa ga diiagi tenua deenei.”
11 Malaa, digau Egypt gaa hai gi nia dagi o digau ngalua bolo gi wanga ina nia ngalua kono gi digaula, gei digau Israel gaa hau nia waahale Pithom mo Rameses, e hai ai nia waahale dugu meegai di king.
12 Ma e aha maa nia moomee kono la ne wanga gi digau Israel, gei digaula koia ne hagadili i digaula i mua, gu modoho i nia madagoaa huogodoo i hongo tenua. Gei digau Egypt koia gu mmaadagu i digaula,
13 ga haga ngalua digaula gi nia moomee haingadaa huoloo.
14 Digau Egypt gu hai hua digaula hagauwwou gi nadau moomee haingadaa beenei ala e hai nadau hadu hau hale mono mee ala e haga pigi ai, mo nia hagadilinga ngalua hadagee. Gei digau Egypt hagalee e aloho i digaula.
15 Di king o Egypt ga helekai gi nia ahina go Shiphrah mo Puah ala e haga hahaanau nia ahina o Hebrew boloo,
16 “Di gulu madagoaa ma ga haga haanau di gulu ahina o Hebrew, gei di maa tama daane, gei goolua daaligidia gii made, gei di maa tama ahina, la dugu ina hua haga mouli.”
17 Gei nia ahina aalaa le e mmaadagu i God, meemaa digi heia di mee di king ne helekai ai gi ginaua, gu haga mouli hua nia dama daane.
18 Di king ga gahi mai nia ahina aalaa, ga heeu gi meemaa, “Goolua ne aha ala ne dugu haga mouli nia dama daane?”
19 Gei nia ahina aalaa ga helekai gi mee, “Idimaa nia ahina o Hebrew hagalee hai be nia ahina o Egypt. Digaula e haanau ngoohia, e haanau hua gei tei gimaua digi dau adu.”
20-21 Idimaa nia ahina aalaa e mmaadagu i God, gei God e hila anga gi meemaa, gaa wanga gi meemaa nau dama donu. Digau Israel gu haga dili, gu dogologo, ge maaloo huoloo.
22 Di king gaa hai dana haganoho gi ana daangada huogodoo boloo, “Nia ligiana daane huogodoo o Hebrew la gi kilia gi lodo di monowai Nile, gei nia ligiana ahina dugua haga mouli.”