137
Di tangitangi o digau Israel i lodo di nadau noho hege i Babylon
1 Gimaadou nogo noho i taalinga nia monowai i Babylon,
ga maanadu mai Zion, ga tangitangi.
2 Gimaadou gu daudau madau ‘harp’ gi tomo nia laagau ala i madau baahi.
3 Digau ala ne lahi gimaadou galabudi
e hai mai gi gimaadou bolo gimaadou gi daahili.
Digau ala e hagaduadua gimaadou
le e hai bolo gimaadou gi haga tenetene ina ginaadou:
“Daahili mai gi gimaadou i di hai o Zion.”
4 Gimaadou e deemee loo di daahili i lodo tenua o digau mai i daha!
5 Au bolo au gi deemee hua laa di dadaahili i di ‘harp’
maa au ga de langahia eau goe, Jerusalem!
6 Au bolo au gi deemee hua laa di daahili labelaa maa au digi langahia eau goe,
gei digi hagamaanadu ina goe bolo goe go dogu haga tenetene!
7 Meenei Dimaadua, Goe gi langahia di mee a digau Edom ne hai
i di laangi dela ne kumi ai Jerusalem go madau hagadaumee.
Goe gi langahia telekai digaula dela ne hai boloo, “Ohaa ina gi meheu gi lala!”
8 Babylon, goe ga mooho.
E maluagina go tangada dela e tala di hui adu gi di goe
i dau mee dela ne hai mai gi gimaadou.
9 E maluagina go tangada dela e kae au ligiana,
ga haga mamaawa gi di gili tadugalaa.