28
Talodalo i di hagamaamaa
1 Meenei Dimaadua, dogu Dangada Daa, au e gahigahi Goe.
Hagalongo mai gi dagu dangidangi!
Maa nei bolo Goe digi helekai mai,
gei au ga madalia digau ala e hula gi lala gi tenua o digau mmade.
2 Hagalongo mai i dogu madagoaa ma ga dangi adu di hagamaamaa,
i dogu madagoaa ma ga dahi aga ogu lima gi doo Hale Dabuaahia.
3 Hudee heia au gii made madalia digau huaidu,
mo madalia digau hai mee huaidu,
ala go nia hagadilinga daangada ala e hai nadau helekai humalia huoloo,
gei nadau manawa le e honu i nia halahalau dangada.
4 Daaligidia digaula gi nia mee digaula ala ne hai,
mo nia huaidu digaula ala ne hai.
Daaligidia digaula i nia mee huogodoo huaidu digaula ala ne hai.
Wanga ina gi digaula nia mee ala e tau ang gi digaula!
5 Digaula e de heia ginaadou nia mee a Dimaadua ne hai,
be go nia mee a Mee ala ne hai.
Malaa, Mee ga daaligi digaula ga hagammaa digaula gi daha.
6 Goodou hagaamu ina Dimaadua,
i Mee dela gu longono Ia dagu gahigahi hagamaamaa ne hai.
7 Dimaadua e hagaloohi gei e abaaba au.
Au e hagadagadagagee gi Mee.
Mee e hagamaamaa au gei e hai au gi tenetene.
Au e hagaamu a Mee gi nia daahili haga tenetene.
8 Dimaadua e hagaloohi ana daangada,
Mee e abaaba ge e haga dagaloaha dana king dela ne hilihili.
9 Meenei Dimaadua, haga dagaloaha ina au daangada,
hagamaluagina ina digau ala nia daangada ni aau.
Dagia digaula be di hagaloohi siibi,
gei Goe gi madamada humalia i digaula gaa hana hua beelaa.