116
Genembo Ambari Dae Urogho Use Jebugedo, God Kena Aiyakoe Sisira.
1 Bajari nanda kori ningiraira aindae, na nu dubo buraena. Beká resena, na benunu sirureono ningiraira.
2 Na kori seraena ningiraira. Ava sedo, na sifo ghousa jo ambae iris
e, numokena banungedo gharena.
3 Ambari na asimi ivasi arigusira.
Na rekato ambono furugarera kotise, ghamo takegha etiri, oju beka use, kotari futo useni.
4 Aindae sedo na Bajari kena kori sise eminge siseni, “Arie Bajari, benunu resena.
Namoa ambari kena sainghimbe baso jebugaeteni.”
5 Bajari mo joka ari kato, ari dambugo beká eraira. Kavevera kato beká God numori.
6 Bajari evetu genembo sasinguko da tumondari avaga tofo mandi gagara eraira.
Giti evetu genembo na sosighi ari dae etero, nune na sainghimbe biri jebuguseni.
7 Arie namoako, dubo jama ase, ainda susu mo, Bajari nandae eveva usira.
8 Arie Bajari, ambaetena ava, na saghimbe beso jebuguseni.
Nanda diti jivu nine ghajisesi. Nine kaifa eso, gitofuimi na jo de atai fataeri.
9 Bajari amingusira aindae, na oroko nunda dombuda enda eminda jebuga ya foa gherena.
10 Na kotiseni, “Na dara eko beka beni.” Avata nanda tumondari God kena jo doyaeri.
11 Na manamana use eminge siseni, “Evetu genembo eni jo tumondae arena.”
12 Bajari nandae kavevera eraira aindae, numokena rea mutareni?
13 Bajari namo setiri jebugusena aindae, aiyakoe sise, vaini ava jobadae numokena mutarena.
14 Nunda natofo totorugedo tafaroro ururoro jokada, na rea beka gagojuse,
numokena mutari dae sisena, ava mutarena.
15 Bajari God da natofo, nunda dombuda dambugo beká irá gheraera, eni nanjigo ambarera amo,
nu mema teriago ava itatama arira.
16 Arie Bajari, na ninda saramana katori, nanda aya nimokena saramana usira, aminga ava eraena.
Na asiimi bundisira ava nine vujeteso na jebuguseni.
17 Na nimokena aiyakoe sise, sino fuka de oje dungedo mutarena. Kotugo nanda benunu barago, joba mutarena.
18-19 Ninda natofo isasambu ninda tafaroro kambo Jerusalem aminda totorugedo iroro,
nimokena rea beka gagojuse mutari dae sisena ava, nenda dombuda mutono baresa.
Bajari dae sakai saore!