139
God Da Dubo Bari Jo Itako Darigari Da Kaugo Iraeri.
1 Bajari, ni na dere gido kasama e gogoghomberaesa.
2 Na rea eraena ava, isambu ni kasama eresa.
Ni soka fetedo, anakora nanda kotari gi tefo eresa.
3 Na saramana arena o jangutarena amo, ni na giraesa.
Nanda ari rea eraena ava, isambu kasama eresa.
4 Na beka jo sae iriono,
ni giti kasama easo gido, amboda na geka seraena.
5 Ninda ungoimi, na gagara edo kosegeraesa.
Ninda fakinaimi na gajeaso, dara jo itatamae eraena.
6 Nane resena, ni na kasama eresa, avata ninda kasama mo, jo nane dubo kotise kasama ari da kaugo iraeri.
Ainda beká mo: ninda kasama teria a jungarida ava sedo, jo nane dubo kotise kasama ari da kaugo iraeri.
7 Na jo reda ya jungono ni tava ae aresa!
Na ninda dombuda jo reda ya jungari da kaugo mo iraeri.
8 Na utuda vitiyaetena amo, ni aminda iraso tambaeteni.
O na ambari embo da vasada vosaetena amo, ni aminda iraso tambaeteni.
9 O na rika da kaugo edo ghumbudo, eva da butu isambu darigedo, soka ya aminda iraetena amo,
10 ni aminda irise, ninda ungoimi nanda emboro ijuguse, na sonembaetesi.
11 Na tumbakena eminge saeteni, “Fu, namo gagara ase!”
O na usasa janimberaira aikena eminge saeteni, “Jovereghe, tumba jine!”
12 Aminge saeteni, avata ni tumba aindae jo kotae eraesa.
Tumba jirarira o iji janimbarira, nimokena inonori.
Tumba a usasa mo, nimokena inonori, jo dombu eni iraeri.
13 Ni na eteso, nanda tamo isambu sirorusira.
Ni na budo fesa dabako eteso, na aya da tinida siroruseni.
14 Na nimokena aindae sakai seraena. Ainda susu mo: na jungarida ava eteso siroruseni.
Ni rea eraesa amo, isambu eveva bekári, evetu genembo gi bunedo dudukugheraera.
Ava, nanda dubo isambuimi itatamuse kasama erena.
15 Ni durumuguse kotise, nanda etu aya da tinida esimbugeteso sirorusira.
Na jokáda irise babojusena ainda sifo aminda, ni kasama usesa amo, na amindari.
Na jo sirorae ireno ainda gitida,
16 ni na gosusesi.
Nanda sifo nanjogo enda eminda jebuga irarena ava,
ni anakora tegedo ninda bukuda gefusesi.
Tegedo gefusesa amo, na jo sirorae ireno ainda sifo aminda, ni nanda sifo tegedo gefusesi.
17 Arie, God, ninda kotari mo, eveva bekári, jo nane kasama e bari da kaugo iraeri.
Kotugo, ni na koteraesa amo, jo umbu dabako o etoto aminda ava,
jo kotae eraesa, ni na sifo evia inono koteraesa.
18 Na ninda kotari namokena irira, ainda inono tege bari dae aetena amo, kora da ghonesa irira omo, tege tefo aeteni!
Na fase avido diti fange ereraena ainda sifo aminda, na itatameraena, ni nangae dabade irera,
na jo avirureono ni na jo doyae eraesa.
19 Arie, God, nanda uju mo, eviri. Ni nange ari ekoko embo daso ambaeteri!
Nange gegenembo tataya kakato na do darigaoro, na nasukako iraeteni!
20 Ne nindae sise, geka eko seraera,
ninda javo eoro eko eraira.
21 Arie, Bajari! Na ne imboe beká ava eraena! Mave ni imboe eraera ava, na imboe beká eraena.
Mave ninda geka jo ningae irise, nimokena isoro ari dae seraera amo, na aindae imboe beká use, ningari mo beghagha eraira.
22 Ne nanda gitofu sise, na ne imboe beká use, ningari mo, beghagha eraira.
23 Arie, God! Nanda irari ijuje dere gaetesi!
Nanda kotari kasama edo, na dere gido, nanda kotari tambaetesi!
24 Nanda dubo joká dere gaetesi. Ari eko eni aminda iraetira amo, tambu seghe fugedo,
na unumbe bu giti jijighururaso, na jebuga evovodae irari ainda emboro ava tambaeteni!