141
Genembo Eni Nunda Irari Kotise, God Da Sonembadae Benunu Resira.
1 Arie Bajari, na nimokena kori resena, na oroko nembako senembaso dae resena!
Na sifo reda senembaso dae benunu sarena, ningi!
2 Ungobughae joba nimokena dungutuse, yabiyabina dungoro muno viviturureari,
ivuga eraesa aminga ava, na sifo reda benunu sise, ungo nimokena jighono erarira,
ivuga aminga ava aso dae resena.
3 Arie Bajari, erá geka sembae seono dae sise, nanda beka tavo aso dae resena! Kaifa kato eini gategaso,
fetedo nanda avivi kaifa are!
4 Erama sembae kotise ari ekoko eono dae sise, nanda dubo joká kaifa aso dae resena.
Erá doyeoso, na ari eko embo da kirumo aminda ya nemonde dabade tatedo,
nenda aito ava fugeone!
5 Genembo eveva aimi na dengoro induduse, dombuda sarira amo,
nandae kavevera use aminge sarira.
Avata, ari ekoko embo nandae sakai sari sarera amo, na itoko jo ningae arena.
Ainda beká mo, nenda ari ekoko beká eure dae sise benunu seraena.
6 Nenda babojegari sifo reda bambu ghotaghaoro, fanada dudurugarera, evetu genembo gido,
kasama arera, Bajari da geka mo bekári.
7 Kau ika faragho sare gafe kiro karo eraera aminga ava, gitofui etero,
namaneda etu mane ofofo bako bekada soesa mainge mainge edo iritirera.
8 Avata, arie Bajari nanda God, nanda tumondari nimokena fifituse irena.
Namo gagara aso dae sise, eraena. Erá doyeoso, na deoro ambeone!
9 Namo ivasi ari dae vagho fifiterera aminda, na gagara e! Ari ekoko embo da ivasi fitari aminda na kosege fete.
10 Aso, ari ekoko embo totofo nenda vaghoda tetururoro, nemoa ivasi ururari na jo dae doyoro yari resena.