143
Sonemba Dae Benunu Sisira.
1 Arie Bajari, nanda banungari ningi! Ninda natofokena bekáda bekáda eraesa.
Aminguse, nanda benunu ningi! Ninda sari ava nembo eraesa. Aminguse, na sonembe!
2 Na ninda saramana katori. Avata, erá nanda eko ijujeose!
Ai resira amo, ninda dombuda jo evetu genembo eniimi fetari inono iraeri.
3 Nanda gitofuimi na ondi sandi budo fugetiri dureno, atai fati gitetiri faseteni.
Na bu vasa tumbago ainda jokáda fitiri na kau ambari embo anakora ambududurusera, aminga ava erena.
4 Ava sedo, na kotari dadabetiri ambari dae itako erena.
Arie namoako, na nange aeteni, ava erebunena.
5 Ni nange edo ghusesa, ava kotise irena. Na ninda tano duroghae udo refesa, isambu kotedo gherena.
Ni nange usesa isambu ava erekotena.
6 Na banunguse, nanda ungo jigheono ereraira. Kau dubo sagheari, uvu mindari dae angasa angasa eraera aminga ava, nanda asisi nimoa tambari dae uju erira.
7 Arie Bajari, tavaraghe foa, nanda benunu ningaetesi! Erá nandae jungeose!
Ninda dombu namokena jungaresa amo, na anakora ambudo ambari embo da vasada vosarena.
8 Ni tumonduse irena, ágido sifo ghousa ataeghae ninda dubo bari ava ijugururu, gaone!
Nanda asisi isambu futuse nimokena benunu sise irá gheraena, ava sedo nanda emboro ijugururu, yaone!
9 Arie Bajari, na nimokena afote fetari ya gheraena. Namoa gitofukena saghimbe bu darige!
10 God nane tumonde baingheraena amo, nimori. Ninda uju ava ijuge, ava aone!
Ninda asisi eveva aimi na ununbe, emboro evevada yaone!
11 Arie Bajari, ni nange ari sisesa ava use, namoa gitofukena saghimbe bu darige!
Ninda kavevera eraesa aimi na sonembe, mema namokena foa gheraira ava darigaone!
12 Ni na dubo buraesa aindae, nanda gitofu isambu dive gafe sirivu e tefo aore!
Na ninda saramana kato, ava sedo evetu genembo na daoro ambono dae aito eraera, isambu sosighi e!