42
Genembo Eni Gitofuimi Sandi Budo Isera, Ainda Banungariri.
1 Sino fuka eni diya (deer) seraera,
aimi dubo sagheari uvu tava eraira aminga ava,
God, na nimo tava erena.
2 God jebuga iresa, nimoa tava erena.
Na nanjigo ya ninda
dombuda tumonde bainghaeteni?
3 Nanda gitofu nandae eminge sise irera,
“Ninda God nangetirai ni sonembaeri?” Sifo tumba evia soraraghae irena.
Jivu nanda bayauri.
4 Anakora na giti jighido, natofode yaru didivuse
vuredo jasedo ghuse,
God dae sakai sise,
nunda Kamboda ya teredo ghuseri. Ava kotise aindae, mema eraena.
5 Na redae mema ereni?
Na redae bune jarutereni? Avori, jo amingae arena.
Na sekago nanda tumondari nanda God a sonemba katokena fifituse,
nundae sakai sarena.
6-7 Janje gagojurureari, na sekago numoa koteraena.
Dubo mema nanda janje jokáda mo,
kau voru viti bari gerira.
Dubo bunari kau uvu usegha doriri Hermon nengae Mizar ghaekena ghedo jorughuse,
vose foa Jordan buvuraira, amingaimi na fatira.
8 Ijighae Bajari da kavevera a dubo bari namokena irá gheraira.
Tumbaghae, God nandae jebuga muturaira aikena, nunda yaru muturaira aimi yaru, didivuse banungeraena.
9 God namokena sorega muturaira, numokena resena. “Redae na kotae eteso,
nanda gitofuda ari ekoko einda bovu fufuse irareni?”
10 Evovodae nandae koviono sise,
“Ninda God nangetirai ni sonembaeri?”
sirureoro, na ambaetena, ava koteraena.
11 Na redae mema ereni?
Na redae bune jarutereni? Avori, jo amingae arena.
Na sekago nanda tumondari nanda God a sonemba katokena fifituse,
nundae sakai sarena.