44
God Genembo Eni Gagara Aetira, Ainda Banungariri.
1 Arie God, anakora beká avia abua agira mane da sifoda, ni ari tomanako rea usesa ava setero,
totofo namanenda dengoroi nininguseri.
2 Ni aminguse, evetu genembo ni jo tumondae usera ava, nine tofo ondeso buvu dariguseri.
O ninda natofo mo, seteso, nenda enda futusesa aminda dighi anumbuseri.
Aminguse, oro mendenikena fakarago eso, tofo ninda natofo sonembeteso aimi iti fafode useri.
3 Ninda natofo jo nenda misi gandigha aimi isoro edo enda baeri.
A ne jo totofo nenda fakinai gitofu dedo enda baeri.
Ni ne dubo budo ghusesa ava ijuguse, tofo mandi nemonde ise enda sanghimbe rurusevu.
4 Nanda Kini a nanda God, Jacob da imemesiri Israel embo da gitofu de atai fati feteraira amo, nimori.
5 Ninda fakinaimi namane gitofu ava dedo atai fati feteraera.
6 Na jo nanda feva, O nanda misi gandigha ava tumondururono, aimi na sonembaeri.
7 Tefo, namanenda sonemba kato namane gitofu jokáda sorisira,
a evetu genembo namane imboe eraera ava, de atai fati fefetusira, amo nimori.
8 Namane evovodae nindae sakai sise a aiyakoe sise irarera.
9 Avata oroko mo, ni nange namane gukai muteso, gitofu namane de atai fati fefetumutari. Namane isorodae ya gheraera ainda jokáda, ni tefori.
10 Ni eteso namane gitofu dae oju sufero, namanenda gugua rea irira ava, nene sosighi e barimutari.
11 Ni ghabu sokinimbeteso, namane sino fuka de ojarigo umutari.
Kotugo, namane mendeni kotae fuge doteso, teana embo da reighi aminda sisigaga edo irera.
12 Tofo ninda natofo, jo mino kitako oriri ari da kaugo irae avata, mino kitako da oriri umutasi.
13 Namanenda kokomana tinguda irá gheraera aimi, namanendae rea umutasa ava gido, dere jise gegha seraera.
14 Nine eteso, natofo nunda oro oro namane gi derejise gegha seraera. Ne namanendae fakina tefova sise, mendó faingheraera.
15-16 Nanda gitofui unongu sise, nandae mendo kininje kananje ghuse dere jiraera,
a evetu genembo na imboe eraera, aimi koviono seraera aindae, na sifo ghousa evia meka giraena.
17 Namane ni jo kotae eraera, a ninda evovo geka jo bejae eraera.
Avata, ari avavaga namanekena sirorerira.
18 Namane nimokena jo gukai mutaeri, a ninda Agho Dari ava jo bejaeri.
19 Avata ni namane bu, taima sino evetu genembo gamburaera da vasa aminda fiteso,
tumba jinjanghari jokáda irera.
20 Namane nimokena gukai futuse, teana embo da god kena banungaetera amo,
21 ni anakora namane tambaetesi.
Ai resira amo, namanenda kotari jungarida mo, isasambu ni kasama eraesa.
22 Avata, namane ni tumonduse irera aindae, gitofuimi namane kau sifi (sheep) de ojari geraera,
aminga ava use, namane sifo ghousa evia dorureoro sirivo eraera.
23 Arie Bajari, diti fange ere! Ni redae ravesi?
Diti fange ere, namane erá doyari beká eose!
24 Ni redae namanekena junguteresi? Namanenda dara a mema erá kotae eose!
25 Namane endada du degigitege fafaseteri. Sonemba eni tefo gido, namane gofedo, fonja jokáda fafaseteri.
26 Fu, namane sorase! Namane evovodae dubo buraesa aindae, fu, namane sonembase!