57
Genembo Eni God Sonembare Dae Banungusira.
1 Arie God, nandae joka beká, joka beká aetesi, ainda susumo na nimokena ambo sose fetari refena.
Ninda ghabu duruda terono, yaura vovoga ekoimi na afuregaetira, ava darigari ghamo asegarena.
2 Na God ika bekáda aikena kori seraena.
God, namokena rea aono dae uju eraira, ava nune ari beká sirorarira.
3 Nune utuda irise nanda benunu da mino futuse sari na jebugarena.
Evetu genembo namoa kateyavara eraera ava, nune dedo atai duboda fatarira.
Aminguse, God namokena rea ari sisira ava use, na evovodae dubo buraira ava ijugarira.
4 Nanda gitofu, raioni (lion) genembo mindiraera da kakaugo aimi na jimbe birurugheteri.
Nenda dika mane mo, kau goroba a feva da goroba amingori. Nenda aviva mo, kaeya da dikagori.
5 Arie God, ninda teria kau mavega ava utu aminda ijuge, isagha are! Ninda usasa mutaso vose endaé beda are!
6 Nanda gitofuimi nane ombono bari dae sedo, futo bariseri. Na dubo bunise irena.
Na vosono sandari dae sedo, nanda emboroda bako ghaghambuguseri, avata makoe,
ne totofo du vovoseguseri.
7 Arie God, nanda tumondari nimokena amo jo roimi ari doyae arena. Na yaru didivuse, ninda javo jighono erarira.
8 Arie namoako, erone! Nanda gita a yuka ghae, divari dae erena! Nane giti yaru didivururono, iji vitarira.
9 Arie Bajari, evetu genembo utu gambari utu gambari irera, ainda dombuda nindae aiyakoe sarena.
Natofo isambu irera, ainda dombuda fetedo, ninda javo jighono erarira.
10 Ni dubo rurudo refesa aimi, enda beda edo viti ya utu tamburaira.
Ni rea ari seraesa ava, bekáda bekáda eraesa, aimi viti ya utu tamburaira.
11 Arie God, ninda teria kau mavega ava utu aminda ijuge, isagha are!
Ninda usasa mutaso vose endaé beda are!