59
Bajari Nu Nange Gitofukena Gagara Aetira, Ainda Banungariri.
1 Arie, nanda God, nanda gitofukena namo sonembe!
Mave namoa dari dae erera aikena, kosege fete!
2 Evetu genembo ari ekoko ari kakato aikena na sonembe!
Evetu genembo kokomana anakora detero amomonjegusera evia, erá doyeoso, na deore!
3-4 Bajari, gi! Evetu genembo setena, nemokena joka ari tefo bekári, aimi na daoro ambono dae, junge kaifa erera.
Arie Bajari, na kosege dari dae sise, junge fetari dae eresufera da beká mo, jo nanda ari eko eni usena,
o dara usena, o kosasa eni usena, aindae sise erera.
5 Bajari God fakina isambu da tofo, Israel da God, ere fu, na sorase!
Evetu genembo ni ighagha edo, namane dari dae sise, aito usera aikena, erá joka eose!
Ne rea usera ainda mino ava mutu, budo itatama aore!
6 Ne ungobu evia inono jovereghe foa, bogu begaya eminda sino maneimi gangara sise deindangheraera,
aminga ava eraera.
7 Evetu genembo setena buvudo, kateyavara use, jijivu ekoko resera ningi!
Geka ekoko nenda bekáda buvuruterira amo, tataya da kaiya ainda kaugori.
Ne rea resera amo, mave enii jo ningae ari ava kotise, resera.
8 Avata Bajari, ni nendae gegha jiraesa,
evetu genembo ni ighagha eraera ava, dere jise gegha seraesa.
9 Arie God, na ambo nimokena sose feteono, fakina nine futururaso, na fete gogoghomberaena.
10 Nanda God na dubo buraira aimi,
namokena fuse,
nanda gitofu de atai fati fefetuse,
ijugururari garena.
11 Arie God, namanenda Bajari a sorega kato,
namanenda gitofu daso ambarera amo,
nanda natofo ninda sonemba kotae arera. Ava sedo, ninda fakinaimi, ne ondido bu soesa fugaresa.
12 Nenda bekaimi dara eraera, nenda geka isambu ekoko vanembori.
Totofo nenda gogore ariimi jovereghe nemoa gayari ambore!
Gitofu resena aimi, gungubo sise, jijivu teria futo seraera aindae,
13 ninda janje ekoimi ne sosighi aso manjarera.
Amingaso, evetu genembo utu gambari utu gambari aminda
isambu kasama arera, God ni Israel tavo use kaifa eraesa.
14 Ne ungobu evia inono jovereghe foa,
bogu begaya eminda sino maneimi gangara sise deindangheraera,
aminga ava eraera.
15 Kau sino mane bayau tava use, jo mindoro inono ae urureari,
gangaraghae deindanghuse eraera, amingeraera.
16 Avata namo, ninda fakina aindae yaru divarena.
Sifo evia inono nindae beka fainghedo, na evovodae dubo buraesa aindae, yaruimi koko fuge divarena.
Ni na gagara urureaso, nanda dara sifoda nimokena ambo sose feteraena.
17 Na nindae sakai sarena. Nimo nanda bereri.
Arie God, nanda sorega kato nimori. God, nine na evovodae dubo buraesa.