65
1-13 Sakai Sise, God Da Javo Jighoro Erare!
1 Arie God, Saion aminda iresa, namane rejo ava ari dae beka gagosusera ava use,
nindae sakai sarera, amo evevari.
2-3 Ni evetu genemboda benunu ningido sonemberaesa.
Ágido, endada iritirera nenda ari ekoko da bouvu aindae nimokena furarera.
Namaneda ari ekokoimi namonde bu fatiraira, avata ni ari ekoko amo kote doyeraesa.
4 Ni mavejua gategedo unumbedo, ninda vasa kakarago aminda iroro dae fitaresa, aimi dubo jamaghae irarera.
Namane ninda kambo kakarago ainda roera eveva gaveva ava barise, ivuga ghae iritirarera.
5 Arie God, namaneda jebuga mutari kato, ninda ari babaigo gae gitida eregosera aimi,
namanenda benunu ningido, namane gitofu kena sorega fumburaesa.
Endada evetu genembo reighi isasambu da iritirera, a soka beká evada a butuda iritirera,
nenda tumondari isambu nimokena fitiraera.
6 Ninda fakina teriago beká ava ijuguse, doriri isasambu nine ututusesi.
7 Nine eva anje gugugugheraira ava, eoso binono gamburaira,
a kotugo evetu genembo gogore use nimokena osogo futo eraera ava, nine eoso songheraera.
8 Endada evetu genembo tano reda reda isambu ninda tano babaigo eraesa,
ava gosuse oju use, ghamo takegha eraera.
Ninda ari ututeraesa aindae, utu gambari utu gambari ivugaghai fumbu aruguse irá gheraera.
9 Enda nine tavo tatau use, borija muturaesa. Nine eoso, enda raugo use bayau roera digari futo vivitigeraera.
Arie God, nine ninda sasaka averegeoso, uvu isambu bedo ututeraera.
Nine enda esimbuguse seoso, roera veka vivitegeraera. Emo ninda ariri.
10 Nine borija muteoso enda gae dureraera aminda dise, sasaka aimi enda safegeraira.
Nine borija muteoso enda raugo use, roera veka seka vivitigeraira.
11 Nimo kavevera katori ava sedo ghaeko sifoda bayau dige faseraira. Ninda yari furari aminda dige faseraira.
12 Oka mane ningaminda kaifa eoso, mamandi digari fumburaera. Ganasa, enda fumbari aminda ivuga siroreraira.
13 Eke vasada sifi aimi dige faseari, enda tevisa farava vujiimi dige fasedo gherira,
isambu aimi ivugaghae fumbu aruguse yaru divuraera.