69
Genembo, God Numo Sonembare Dae, Benunu Resira.
1 Arie God, na sonembe, uvu gaunganghe viti ojira, na duboi tatano erira.
2 Na fororo basusuda tifugherena, enda fakara eminda gegori.
Na uvu kafuru sorodari, a kotugo eva fumbasa futo use, fatari mindi ambono dae erira.
3 Na sonembaso dae kori sise irana, fakina dadaberira, dubo ghoré ghoré mema resira,
kotugo ninda sonemba kakovuse, sorara eno, nanda diti yaya iri, gari erebunena.
4 Evetu genembo susu tefo namoa imboe eraera ava,
genembo eni da beo tegaetera amo, darige vitaetira.
Nanda gitofu gungubo futo sise namokena osogo eraera.
Ne fakina beká use, namoa daoro ambono dae eraera.
Ne kateyavara etero, roera nanda tofo, na jo bagia ae, ava nemokena futuseni.
5 Arie God, nanda ari ekoko mo jo nimokena jungarigo iraeri.
Na gogovara da ari use irena ava, ni kasamari.
6 Arie Bajari God Fakina kato, erá doyeoso nane eono,
evetu genembo nimo tumonderaera ava, meka geore!
Arie God, Israel embo da tofo, erá doyeoso nane eono,
evetu genembo nimoa tumonde baingheraera,
ainda javo sembae eure!
7 Na nimoa tumonde baingheraena aindae,
namokena geka ekoko sesegero, na mekai jaruterena.
8 Nanda nano namendikena na kau mo teano embogo edo irena,
nanda ambo begoimi namokena kau oro enidae arigo eraera.
9 Nanda kotari enikena jo fitae, nanda kotari a uju isambu
ninda tafaroro kambokena fifituse irá gheraena.
Jijivu ekoko nimokena sesegeraera, ainda bouvu ava, nane fumburaena.
10 Na uvu bayau reta use tofo fitiono vovosurureari, natofo nandae geka ekoko sesegeraera.
11 Na tou rovarova urureono, ne nandae gegha jiraera.
12 Emboro soró soró ava nenda kiki namoa nembo sariva nembori,
a kotugo uvu fakara mindi jiro birurughari yaru namoa isimberaera.
13 O namo, Bajari, nimokena banungarena. Nine sifo reda uju aresa aminda, na sonembe.
Ni na dubo bu gogoghomberaesa, kotugo na sonembari dae sisesa aindae,
na sonembaso dae resena.
14 Erá na tauya basusuda tifugheono dae sise, na sonembe!
Erá gitofuimi na deoro dae sise, na kaifa ururu!
Kotugo uvu kafuru aminda na kaifa ururu, jebuga irone!
15 Erá doyeoso, na useghami viti jarigiure!
Erá doyeoso, na ghighi eminda mindi ambeone,
o tifughe ambari emboda bakoda voseone!
16 Arie Bajari, nandae evovodae kavevera use, dubo buraesa aindae, na sonembe!
Nandae joka eraesa aindae, namokena jovereghe!
17 Na ninda saramana katori. Erá nanda dombuda jungeose!
Na dara eko beká eretafena. Tavaraghe fu, na sonembase.
18 Fu namokena utua edo sonembaso jebugaone! Gitofu da ungoda na saghimbe bu darige.
19 Nandae jijivu ekoko seraera, ava ni kasama eresa.
Kotugo, nanda gitofu nange eoro, na meka giraena a nanda javo sembae eraira,
ava ni eregosesa. Nanda gitofo isambu ni kasama eresa.
20 Jijivu ekoko futo sari aimi na ghamo gaetiri bune jaruterena.
Nandae joka edo sonembaetira aindae, gigitusena, avata aminda eni gegori.
Mave na eghovo daetera ava kotise kakovusena, avata gegori.
21 Na ighoi usira, nandae kae ava futuseri.
Na dubo saghusira, nandae vaini dokegha ava futuseri.
22 Na uju erena, nenda kirumu karumu rise, aimi ari kosasaghedo sirivu aeteri.
Kau daba aminga ava, ne God kena sino fuka dungarera ava rise,
aimi ari gofe dudo ghuse irore.
23 Aso, nenda diti digoi are, kotugo nenda guka degagururari, evovodae gofuse irore!
24 Ninda janje ekoko averege nemokena vosare!
Aso ninda girivaita aimi asugari itatama arera.
25 Na uju erena, ne reda dighi anumbusera, aminda natofo sirivu aeteri,
kotugo nenda dobo do dumbaeteri.
26 Ai resira amo, evetu genembo nine ghamo baoro dae usesa aikena,
ne mema bouvu erefutera.
Kotugo, evetu genembo nine eteso, mema eretafera aindae unongu seraera.
27 Nenda ari ekoko isambu gembu fitido ghe!
Erá doyeoso, ninda jebuga muturaesa, ava tambu beore!
28 Na uju erena, nenda javo jebuga evovodae irarida buku aminda ghajaresa.
Ninda natofoda javo gembaresa ainghae dabade, itako jo gembae aresa.
29 Avata namo mema itatama use, mana mana beká ava erena.
Arie God, na saighimbe bu fiti jebugaone!
30 Na yaru didivuse, God dae sakai sarena.
Na nundae aiyakoe sise irarena aimi, nunda fakina tomanako isagha arira.
31 Sino fuka da mamandi o burumakava da kandana eni
bu oje dungedo joba mutarera amo,
Bajari ivuga itako arira. O nundae sakai sarena amo, nu ivuga ambari ava arira.
32 Evetu genembo mave mema itatama use irera aimi,
God da sonemba garera, ne ivugai jarutarera.
Evetu genembo God tumonde baingheraera aikena ghamo erarira.
33 Ai resira amo, Bajari makasi embo da benunu ningiraira,
a kotugo nunda natofo diburada irera ava, kotise irá gheraira.
34 Arie utu, enda a karaje a kotugo sino fuka, oka, a rika nanjogo ainda jokáda ireva,
ne isambu God dae sakai sevu!
35 Ai resira amo, God nune sari Jeruselem embo jebugarera, a kotugo sonemba futuse,
Judah frovensi da reighi nanjogo nune sekago itarira.
Nunda natofo aminda dighi anumbedo, enda ava nene tofo arera.
36 God da saramana kakato Israel embo da imemisiri gamemisiri aimi
enda ava nene tofo arera.
Kotugo, evetu genembo mave numoa dubo buraera aimi, aminda irarera.