73
God Nange Evetu Genembo Bekáda Bekáda Ijugarira Ainda Gekari!
1 Geka bekári, natofo Israel embo jokáda mave janje joká keosogo beká eraera aikena,
God ari eveva beká eraira.
2 O namo, nanda tumondari feghako usira.
Jo soka irae, nanda tumondari dadabe tefo aetira.
3 Ainda tuka mo, na evetu genembo God da Agho Dari ighagha use,
“A jo rejo eni iraeri,” sise, ivuga futo usera aindae bengoso useni.
Ari eko embokena roera isambu eveva siroreraera, siseni.
4 Ne fakinago a tamo mema eni tefori. Ne jo totoi kae tambae eraera.
5 Nemokena mema eni tefori,
jo evetu genembo mendenigo memaghae iritirá gheraera amingo iraeri.
Evetu genembo mendeni mema tamburaera avaga nemokena tefori.
6 Susu aindae nenda ivuga amota, kau guri duboda dighido isagha beká giraera ava gareva.
A kotugo meka irae titigho ari ava nenda goghori.
7 Evetu genembo amo rea koteraera aimi misurugurureari eko vanembo eraera.
Ne ari ekoko dombu eni dombu eni ari dae manaka garuse irá gheraera.
8 Ne God dere jise, itatako jo oju ae eraera, a kotugo nunda natofo ava kateyavara beká eraera.
Nemo ivuga kakatori. A kotugo ne evetu genembo mendenikena
mema mutari dae manaka gayeraera.
9 Ne God utuda irira aikena, geka ekoko seseguse ivuga ututeraera.
A kotugo God da Agho Dari ighagha use, “A jo rejo eni iraeri.” sise,
evetu genembo endada irera aikena, katiyavara use irera.
10 Susu aindae, nene rea seraera ava, God da natofo barago aminguse,
nenda ambo gayeraera, a kotugo nene rea seraera ava totoi tumonderaera.
11 A kotugo ari ekoko embo setena, eminge seraera, “Namonde rea eraera evia,
God jo gae eraira. God ika bekáda irira jo kasama ae arira.”
12 Ari ekoko embokena gugua diguterira, a kotugo sifo ghousa digutuse irá gheraira.
13 Arie namoako, redae soro ghousa ari eko darigari dae korai use ireni?
Redae korai janjago use ari eveva vanembo udo refeni?
14 Arie God, nandae mo, sifo ghousa mema ava muturaesa, sifo inono evia ataeghae nandae mema ava ghamo baono dae eraesa.
15 Na avaga saetena amota, a jo ninda natofo da kaugo iraeri. Ava sedo, na ainda kotari ighagha ari dae sise, resena.
16 Na ari evia nange kasama aetena aindae inini useni. Avata nanda munju jo inono ae etiri, mana mana udo fena,
17 amboda, na ena, ninda tafaroro kambo jokáda teredo, nanda kotari afigetiri,
ari ekoko embokena amboda rea sirorarira amo, kasama useni.
18 Arie Dara! Ari ekoko embo amo, God seriri vasada fitari,
jo numbo irae, ne gosasaghe vovosegedo ambu tefo arera.
19 Ne totoigo amomonjegarera. Ne ya ambari embo da vasa eko aminda vovosegarera.
20 Nemoa taká aturu avavagori. Tumbaghae aturu edo, sifo ateari, kotae eraera amingori.
Arie Bajari, ni nanjigo eraresa amo, ne manjarera.
21 Na kotari ekoko use itatamari sembae beká use, dubo mema useni.
22 Na kavakava edo kotari dadabeari, sino fuka da ari ava edo ghuseni. Na ni itatako jo kasama aeri.
23 Avata na sifo ghousa ninda tinguda irá ghedo ghuseni.
A kotugo, nine namoa ungoda bu jighi irá ghedo ghusesi.
24 Ninda ijugaimi namoa giti buraesa, a kotugo sifo gombuda nine namoa nati joká doruse unumbaresa.
25 Nisukako nimoa nanda uju bekári. Utuda a kotugo, endada eni nimongo tefo gido,
nanda uju isambu nimokena fifituse irá gheraena.
26 Nanda fisíkena a kotugo asisikena rojaetena, avata God nu irira.
Numo nanda fakinari, nusukako numoa evovodae nanda tofo bekári.
27 O evetu genembo mave God tumonde bainghari imboe gamboe eraera amo ambarera.
Ainda tuka mo, evetu genembo mave ni dodo, ove kevari ava tumonde baingheraera amo,
nine daso sirivo arera.
28 O namo taká God da tinguda irarena amo, evevago bekári.
Namo Bajari God ava nanda ambo sose fetari vasadae ruruseni. Nune rea ututusira, ava osa sedo gharena.