86
Sonemba Da Benunuri.
1 Arie Bajari, na gofari bekári. Na tofo sonembari da emboro eni tefori.
Ava sedo, nanda benunu ningido, na sonembe!
2 Na ni tumonduse, ninda sari ava eraena, na ninda saramana katori.
Ava sedo, ambari dae erena ava sonembe, jebugaone!
3 Nanda God nimori. Na banungurureono sifo ate fa ya tumba jiraira. Ava sedo, nandae joka aso dae resena.
4 Arie Bajari, nanda benunu nimokena viti ya gheraira. Na ninda saramana katori.
Ava sedo sonembaso, na ivuga aone!
5 Ni namanekena veka eveva use, namanenda ari ekoko kote doyeraesa.
Mave nimokena banungeraera aindae, ni evovodae dubo buraesa.
6 Bajari, nanda benunu ningi! Nanda kori nininguse, na sonembe!
7 Ni nanda banungari ningiraesa, ava sedo na dara tafuse, nimokena kori seraena.
8 Arie Bajari, god eni nimongo tefori. Nine usesa avavaga enimi jo ae eraera.
9 Oro isasambu nine eteso sirorusera aimi, fua tumoi bainghuse ni tumondarera.
Ninda javo tomanako ava jighoro erarira.
10 Ni fakinago bekári, a ni tano dombu eni a ari gae gitida ava eoso siroreraira. God nisuka nimori.
11 Arie Bajari, ni rejoa aono dae uju eresa ava, ijugaso amingaone! Ijuge, na dubo dabako use nindae farago jighone!
12 Arie Bajari, nanda God, nanda janje joká isambu aimi ni jighono eraresa.
Ninda javo tomanakogo kau mavega ava natofo isambu kena evovodae osa sise irarena.
13 Evovodae ninda dubo bari tomanakoi na dubo buraesa! Aminguse, na ujeda ava sonembe beso jebuguseni.
14 Arie God, evetu genembo ivuga kakato aimi eredo, namoa dari dae refera.
Tafasara kakato, ninda geka jo ningae eraera aimi, na daoro ambono dae erera.
15 Avata, Arie Bajari, ni joka ari a dubo bari da God ri.
Ni evovodae durumuguse kavevera eraesa, kotugo ni rea ari dae beka gajeraesa ava,
isambu urureoso beká siroreraira.
16 Jovereghe namo gosuse, joka e! Aya nindae farago edo ghusira, aminga ava use irena.
Ava sedo, fakina futururaso jebugaone!
17 Bajari, ninda kavevera eraesa, ainda beká ava ijugururaso isagha are!
Amingarira amo, evetu genembo na imboe gamboe eraera ava,
na nange sonembuse yove sisesa ava gosuse, meka garera.