18
Babilon ap lug paknɨg gab
1 Pen naböŋ nɨŋem nɨŋnö, ejol ap halö kumi kabö adö laŋ nɨbö auajɨp. Ejol anɨbu, God hag lö bɨ kub yabɨƚ mɨdeia. Kumi kabö adö laŋ nɨbö apöm, mailö aij nɨpe u gö, mɨnöŋ naböŋ iƚ i magöŋhalö mailö ga.
2 Ejol anɨbu apöm wɨñ kub alöm haga,
“God gö daun kub yabɨƚ Babilon böŋ nöp ap lug paköp o!
Böŋ nöp ap lug paköp o!
God gö daun kub anɨbu, nɨbi bɨ ap mɨdagöp yabɨƚ;
kɨjaki aiön pi yaur naij gau nöp mɨdöp e.
3 Nɨhön gɨnɨg: nɨbi bɨ Babilon gau kale nɨbi si bɨ si göm,
gɨ naij unbö ke gɨlö gɨlö,
nɨbi bɨ ram mɨnöŋ ke ke gau magöŋhalö nɨŋöm
anɨb unbö rö nöp gɨpal.
Babilon nɨpe ñɨg wain kƚö nɨpe ke ñɨŋöm,
nɨbi bɨ ram mɨnöŋ ke rɨmnap gau kalɨp ñö ñɨŋlö,
nɨpe göp rö, kale u rö nöp
hauƚ alöm gɨ naij nöp gɨpal.
Kiŋ mɨnöŋ naböŋ adö iƚ i gau,
nɨpe aip gɨ ajöm, gɨ naij nöp gɨpal.
Pen nɨpe nan aij aij gau udnam a göm pör gasɨ nɨŋöb rö,
bɨ mɨnöŋ naböŋ adö iƚ i nan sɨkim gɨpal gau mani kub udpal,” a ga.
4 Pen yad nɨŋnö, manö ap halö kumi kabö adö laŋ nɨbö haga,
“Nɨbi bɨ yad Babilon mɨdpim gau, daun anɨbu höŋ adö ammim,
Babilon kai aip uɫ gagmim.
Nan si nan naij kale gɨpal gau, kale aip gagmim.
Ilön kub kale udnɨg gaböl u, kale u rö nöp udagmim.
5 Nan si nan naij gɨpal gac u, nan asmen kub rö aram aram
kub yabɨƚ ap ran ara kumi kabö adö laŋ.
God nɨŋöm kale nan si nan naij gɨpal u
gasɨ nɨŋöl gɨ mɨdöp.
6 Babilon nɨpe nɨbi bɨ rɨmnap kalɨp gɨ naij ga rö u,
ne pen nɨp u rö nöp gɨ naij gɨmön.
Pen Babilon nɨpe nɨbi bɨ rɨmnap kalɨp gɨ naij ga rö nöp wasö;
nɨp pen gɨ naij ke yabɨƚ gɨmön.
Babilon nɨpe nɨbi bɨ rɨmnap kalɨp ñɨg asɨ ñöb rö wasö;
nɨp pen ñɨg asɨ ke yabɨƚ kap nɨpe hoŋ gɨmön nɨp ñö ñɨŋnɨm.
7 Nan iru nöp udnam, a göm, hib nɨpe ke dap ranöb rö u,
nɨp pen ilön mab unbö ke yabɨƚ ñö, mög yabɨƚ gɨnɨm.
Gasɨ nɨpe ke nɨŋöm hagöp,
‘Yad nɨbi kwin aui asɨk mɨdpin.
Yad nɨbi adu mɨdagpin;
mɨŋör rɨmnap yɨp udnɨm rö lagöp,’ a göp.
8 Anɨg hagöp u
pen God Bɨ Kub
nɨp manö kub hagöm ilön ñɨnab u,
bɨ kƚö unbö ke yabɨƚ mɨdöp.
God Bɨ Kub nɨpe gö, ñɨn añɨ ap nöp mɨña kub gɨnab;
mɨɫöŋ kub gɨnab; nan magö pɨlagnab, kɨyö kub gɨnab.
Pen God Bɨ Kub nɨpe gö,
Babilon mab mɨɫöŋ lug in habɨk ñɨŋ arnab.
9 “Babilon mab inöm hadu ap ranö nɨŋöm, kiŋ ram mɨnöŋ ke gau nɨbö nɨbi anɨbu aip gɨ ajmɨdal gau mög gö mɨɫöŋ gɨnaböl.
10 Nɨbi u nɨp ilön mab ke yabɨƚ gɨnab anɨbu, hanɨp u rö nöp gɨnɨm rö löp, a göm, ke ke au daŋ mɨdöm mɨɫöŋ göm hagnaböl,
‘Wasö e! Wasö e! Daun kub ke yabɨƚ e!
Babilon daun kub kƚö ke yabɨƚ e!
Ne wan aua nöp manö kub nɨŋmön,
pen ilön kub udmön böŋ nöp ap lug pakpan,’ a gɨnaböl.
11 “Pen daun kub anɨbu ap lug paknab rö, bɨ nan sɨkim gɨmɨdal gau, mɨñi nɨbi bɨ gau nan hanɨp rauagnaböl, a göm, mög gö mɨɫöŋ gɨnaböl.
12 Nan kale anɨb gau me, kabö gol, kabö silpa, kabö pro aij aij ke ke mani kub rauep, magö pro kɨbap mɨƚep rö rud gab ‘pöl’ a gɨpal u; laplap aij yabɨƚ nan ‘linɨn’ a gɨpal u rɨk dam pak al dör gɨmɨdal u, laplap mu, laplap aɫɨ, laplap ganwan hib nagɨ rö ud al dör göm ‘silk’ a gɨpal u; mab haƚɨŋ aij auep ke ke gau; kaj elpad meg kub udöm nan ke ke iru nöp gɨmɨdal gau; mab po aij aij mani kub rauep nan ke ke iru nöp gɨmɨdal gau; nan ain rö ‘brons’ a gɨpal u, ain u, kabö ‘mabɨl’ a gɨpal u udöm nan ke ke iru nöp gɨmɨdal gau;
13 nan haƚɨŋ aij auep ñɨg ke ke gau, pauda ke ke gau ‘sɨnamɨn’ u, ‘spais’ u, ‘insens’ u, ‘mö’ u, ‘pƚaginsens’ u; ñɨg wain abe, olip wel abe; wid magö abe, plaua abe; kaj kau abe sipsip abe; kaj hos abe, nan kaj hos adɨklö ɫɨp gɨ ud ajpal gau abe; nɨbi bɨ kalɨp rau daulö nagɨ wög gɨmɨdal gau abe, nɨbi bɨ aip pen pen göm kalɨp nagɨ lɨ daulö nagɨ wög gɨmɨdal gau abe. Nan kale sɨkim gɨmɨdal anɨb gau me u.
14 “Pen bɨ nan sɨkim gɨmɨdal gau Babilon nɨp hagnaböl, ‘Hañ romaŋ ne gasɨ göp nan aij aij ne gau magöŋhalö adɨŋ hir göp. Kabö gol silpa mani nan aij ke ke iru nöp ne u magöŋhalö hadö ur göp. Hainö kuöyaŋ udagnabön,’ a gɨnaböl.
15 “Bɨ Babilon au nan gau sɨkim göm, mani kub udmɨdal bɨ gau, Babilon u nɨp ilön mab ke yabɨƚ gɨnab anɨbu, hanɨp u rö nöp gɨnɨm rö löp, a göm, ke ke au daŋ mɨdöm mɨɫöŋ göl gɨ
16 hagnaböl,
‘Wasö e! Wasö e!
Daun kub ke yabɨƚ e!
Daun kub kƚiñ aij anɨbi, waƚɨj aij aij,
laplap aij yabɨƚ linɨn rɨk dam pak al dör gɨmɨdal u,
laplap mu, laplap aɫɨ udöm rɨb adɨk lɨ mɨdmɨdöp;
kabö gol, kabö pro aij aij ke ke mani kub rauep,
magö pro kɨbap mɨƚep rö rud gab “pöl” a gɨpal u udöm
rɨb adɨk lɨ mɨdmɨdöp.
17 Pen mɨñi wan aua nöp nan aij aij nɨpe anɨb gau
magöŋhalö hadö böŋ nöp ur göp,’ a gɨnaböl.
“Ñɨg magɨb kapden gau abe, bɨ wög gep kale gau abe, nɨbi bɨ ñɨg magɨb adö ajpal gau abe, nɨbi bɨ ñɨg magɨb nan kago ud sɨkim gɨpal gau abe, magöŋhalö ke ke au daŋ mɨdeinaböl.
18 Ke ke au daŋ mɨdöm, daun kub anɨbu mab inöm hadu kub upɨƚ areinab u nɨŋöm hagnaböl, ‘Daun kƚö ke yabɨƚ i rö ap nöd mɨdagmɨdöp e!’ gɨnaböl.
19 Kale haƚpɨƚ udöm, nabɨc adö kale laŋ ud yuöl gɨ yuöl gɨ hagnaböl,
‘Wasö e! Wasö e! Babilon daun kub kƚö ke yabɨƚ e!
Babilon nɨpe mɨdö nɨŋöl gɨ, kabö gol, kabö silpa, mani,
nan aij aij mani kub rauep nan gau ke ke iru nöp mɨdö,
ñɨg magɨb ajöl gun, mani iru nöp udmɨdun u,
pen mɨñi wan aua nöp nan aij nɨpe anɨb gau
magöŋhalö hadö böŋ nöp ur göp,’ a gɨnaböl.
20 “Pen God nɨpe gö Babilon böŋ nöp pa jö ma jö gɨ mɨdöp u,
kale kumi kabö adö laŋ mɨdpim gau
paj hagmim obi ale ale gɨmim mɨñ mɨñ gɨmim!
God gö, bɨ si udep nɨbi anɨbu böŋ nöp ap lug paköp u,
kale Krais nɨbi bɨ nɨpe mɨdpim gau abe,
Krais manö aij nɨpe ud arep bɨ gau abe,
God manö hagep bɨ gau abe, kale obi ale ale gɨmim
mɨñ mɨñ gɨmim!
Nɨpe kalöp gɨ naij ga u nɨŋöm
God nɨpe nɨp manö kub hagöm,
nɨp pen ilön kub yabɨƚ ñöb me u,” a ga.
21 Pen magö anɨbu, ejol kƚö ke yabɨƚ ap, kabö kub yabɨƚ wid magö pak hib jaköm plaua gɨpal kabö u rö ap ud ñɨg solwara aŋ au ud yuöm haga,
“Anɨg unbö rö nöp daun kub ke yabɨƚ Babilon
ud waƚ gɨ yulö hainö nɨbi bɨ kuöyaŋ nɨŋagnaböl.
22 Babilon nɨbi bɨ mɨñ mɨñ göl gɨ, nan gida rö paköl gɨ,
gabu paköl gɨ, aƚɨŋ magö pu göl gɨ, mɨdageinaböl.
Wög adö ke ke gɨpal rö u, gagnaböl.
Wid magö pak hib jaköm plaua gɨpal rö u, gagnaböl.
23 Nɨbi bɨ ƚam mailö daun kub aŋ anɨbu kuöyaŋ nɨŋagnaböl.
Nɨbi bɨ ñɨlö udöm, mɨñ mɨñ göm, gagnaböl.
Nɨbi bɨ ne sɨkim gɨmɨdal gau,
ram mɨnöŋ ke ke gau bɨ kub yabɨƚ mɨdmɨdal.
Pen nɨbi bɨ ne kuj göm, manö piral hagöm gɨlö,
nɨbi bɨ ram mɨnöŋ ke ke gau
nɨŋöm magöŋhalö hain göm
anɨg unbö rö nöp gɨ naij gɨmɨdal.
24 “Babilon nɨbi bɨ gau nöp,
God manö hagep bɨ nɨpe gau kalɨp al pak löm,
nɨbi bɨ nɨpe gau kalɨp al pak löm, gɨmɨdal.
Nɨbi bɨ mɨnöŋ naböŋ iƚ i al pak lɨmɨdal gau magöŋhalö iƚ u me Babilon nöp.
Anɨg göp rö, God nɨp pen ilön kub yabɨƚ u ñöb,” a ga.