3
Dubu di ourefeidena vene
1 Mina sina bi rama iniye: amiye yokoi yaku dubu di ourefeidena amiye nigi ura redo vonisi, bi moimai buni ura redo mini.
2 Mina resi ina bi butigi yokoi de nufa ameyaine; bi rema yokoi maka rumana, mokena buni nufa amesi yuka vana nari reyaine; bi matagini rena amiye amesi yava ika vene afei dui resi oteimai mona reyaine.
3 Ina bi koru gira tau gade irina amiye de ma ruda de amiye, idu ave nina amiye ameyaine; bi kayamo ga resi moni ura ga reyaine.
4 Ini yava vene ourefeidei mona reyaine ma ini mida mida yaku matagini resi ini vava gabireri raga regedi.
5 Adina bi, amiye yokoi ini yava vene ourefeidegi toto vonisi, bi gokai kana Sei di ekalesia vene nari rego?
6 Ina bi ekalesia ruaka amiye kana ga ameyaine, iniye nivasina rego ma Bodaka kana, kotari keto rego baebu.
7 Kamini ekalesia etofaro vene di nemokori bi buni reyaine, Bodaka buoru rigo ma moi no riyo baebu.
Dubu di naivo rededi vene
8 Dubu di naivo rededi vene ka bi vegu rorobo rena vene niyaganedi. Ina bi ofa ago nina, koru gira tau moina, ofa dudu moni moina udu vene ga niyaganedi.
9 Uka di mokena buni iniye ma mokena vari gira Sei rofu aena di ini ago di rama moi ogau riyo, mina moi gira riyaganedi.
10 Kamini ini vegu siko maina regedi; resi butigi yokoi de nufa vonisi, bi dubu di naivo rededi vene kana moimai regedi.
11 Ini rema vene ka vegu rorobo reyagane; nifafana ga resi mokena buni amesi vegu tau gaderi rama reyagane.
12 Dubu di naivo rededi vene ini rema yokoi maka nufa amesi ini mida mida ma ini yava vene nari rei mona reyagane.
13 Adina kaere yaku dubu di naivo rededi vene kana naivo rei mona rededi, bi amiye bi ina rofu ne matagini rededi ma mokena vari gira Iesu Keriso rofu aena di mokena buni tora moidedi.
Sui ago tora
14 Mina ago di bura ya rofu reidari, nai uka mokena bi evade ya rofu bae negida.
15 Idu evade de bae negida vonisi, bi makai Sei di yavari gokai vegu rei mona reyagane diba nigiya; mina yava bi Sei vegu amedo di ekalesia vene, kaere bi ago rama di gado gira ma ini adina kana.
16 Ye Sei di sui ago bi tora yo nisifa:
Amiye di roaita dudu ogau niyo,
ma Vima yaku ina bi rama mina nioteimaro,
ma Sei di naivo naivo vima yaku veyadi.
Gagani gagani di vene di fogori ago nirausi reyadi,
ma kono tora noibanu vene mokena vari gira ina rofu aeyadi,
ma vabara dudu omari afei boyo.