6
1 Na, sabap ng yagagawbuk kami para sang Tohan, pangayoon nami kamayo na di mayo sapadan yang looy aw tabang ng Tohan na yamadawat mayo.
2 Kay yamakasorat sang Kitab na yagalaong yang Tohan,
“Sang wakto na pyagakahanda ko na apakita ko kanmo yang kanak kadyawan, tyatarima ta kaw.
Sang wakto ng paglowas ko kanmo, tyatabangan ta kaw.”
Agaw, paningug kamo kay adon yang wakto na apakita kamayo ng Tohan yang kadyawan nan. Adon yang wakto ng paglowas nan kamayo.
Yang Pagsabar ni Paulus sang Kasikotan
3 Na, sang kanami paggawbuk para sang Tagallang di nami karim na aon akasaway kanami. Agaw, wa kami magainang ng maskin ono na makababag sang mga otaw sang pagpangagad nilan sang Tagallang.
4 Sang kariko ng ininang nami pyapakita nami na kami mga sogowanun ng Tohan. Maskin yagakatuna-tuna yang kasikotan na kyakaagian nami, pyagasabaran nami yang kariko sinyan.
5 Pyapabadasan kami aw pipiriso aw pyapasakitan kami ng madaig na mga otaw. Aon wakto na sobra yang kanami paggawbuk, way katoog nami aw way oman pagkan.
6 Pyapakita oman nami na bunna kami na mga sogowanun ng Tohan sabap sang madyaw aw matorid na batasan. Sotti yang kanami pangatayan, aon kanami katigam aw pagsabot sang kabunnaan ng Tohan, masabar kami aw madyaw kami sang kapagonawa nami. Idi sang kanami pangatayan yang Nyawa ng Tohan aw iklas yang looy nami sang kadaigan.
7 Yang pyapayapat nami yang bunna na indowan aw yang ininang nami yagadan ng kabarakat ng Tohan. Yang paginang nami ng matorid magonawa ng armas ng sondao na panlaban aw pangsaanig sang sarili.
8 Sang kanami paggawbuk para sang Tagallang aon wakto na abantogon kami ng mga otaw aw aon oman wakto na apakasipugan kami. Aon yagalaong ng madyaw makapantag kanami, aw aon oman yagalaong ng maat. Aon yagalaong na mga limbongon kami, awgaid aag bunna yang pyaglaongan nami.
9 Sang pagtanaw ng kadaigan dili kami ng ilado, awgaid sang kabunnaan, ikilaa kami ng kariko. Maskin ugun-ugun kami masaid sang kamatayun, bowi pa kami. Pyapabadasan kami, awgaid wa kami akamatay.
10 Maskin dakowa yang karido nami, yamasowat oman kami. Miskinan kami, awgaid madaig yang yatagan ng kadyawan sabap kanami. Maskin way kakawasaan nami adi sining donya, tagtomon kami ng kariko ng mga butang.
11 Mga kalomonan ko ansan sang Korinto, pyagalaong da ta kamo sang kariko ng idi sang pangatayan ko kay dakowa yang looy ko kamayo.
12 Way kolang sang looy ko kamayo, awgaid kamo, kolang yang looy mayo kanak.
13 Yaning pyaglaongan ko kamayo magonawa sang pyaglaongan ng ama adto sang mga anak nan. Agaw, pakadakowaa oman mayo ako sang pangatayan mayo magonawa sang ininang ko kamayo.
Dait Magpakawat sang maskin ono na Maat
14 Na adon, ayaw kamo mapagsambok ng dumduman sang mga wa apangintoo sang Almasi. Kay di oman mapakay na magakasambok yang madyaw aw yang maat atawa yang kaamdagan aw yang kaduguuman.
15 Yang Almasi aw yang Saytan, di mapakay na magakaoyon silan. Agaw, yang yamangintoo aw yang wa apangintoo, di oman mapakay na magakaoyon silan.
16 Yang Baay ng Tohan di mapakay inangun ng pagsasambayangan ng mga barhala. Na adon, kita-kamo na yamangintoo sang Almasi magonawa ng baay na pyagauyaan ng bowi na Tohan. Kay aon yamakasorat na yagalaong yang Tohan,
“Magauya ako ansan kanilan aw umupud ako kanilan.
Ako da yang Tohan na apangagadan nilan
aw silan yang mga otaw ko.”
17 Aw yagalaong oman yang Tohan,
“Panawi mayo yang mga otaw na wa apangagad kanak
aw pagpakawat kamo kanilan.
Ayaw kamo magagad sang paginang ng haram.
Kong maynan, atarimaun ta kamo.”
18 “Ako yang amainang ng Ama mayo
aw kamo oman amainang ng mga anak ko.”
Na, idto yang pyaglaongan ng Tohan na Labi na Mabarakat.