Yang ona na Sorat ni
Yahiya
Pagpakatigam makapantag sini na Sorat
Yani na sorat yagasikun kang Yahiya na sambok na sahabat ni Isa Almasi. Si Yahiya yagasorat oman sang sambok na Madyaw na Gogodanun aw yang Pyapakita na kabain sang Kitab Injil.
Yani na sorat pyapadaa nan adto sang mga Almasihin sang yagakatuna-tuna na banwa kay sidto na wakto aon mga magiindoway na yagaindo ng dili ng bunna makapantag kang Isa Almasi. Kay yagaindo silan na si Isa kono wa akabaoy ng manosiya kay yang kariko ng manosiya baradosa. Laong oman nilan na mapakay magpadaa sang napso kay yang kalowasan way kono labot sang lawas kondi sang pangatayan gaid.
Sabap sinyan pyapangimunnaan ni Yahiya sang mga Almasihin na si Isa Almasi bunna na yagasikun sang Tohan awgaid yamabaoy ng manosiya. Pyagalaong oman nan silan na sino-sino yang yamangintoo kang Isa Almasi dait maginang ng madyaw aw dait silan maglinoyay.
1
Yang Pyaglaongan na Makaatag ng Kinabowi
1 Yagasorat ako kamayo makapantag kang Isa Almasi na yan yang Pyaglaongan na makaatag ng kinabowi. Sang pukas nang wa pa akabaoy yang donya, iyan da yan. Bunna na yamadungug nami yang pyaglaongan nan aw kikita nami yan. Kikita nami yan ng dowa na mata nami aw kyukuputan nami ng arima.
2 Yan agaw na pyagasikunan ng kinabowi yakani sang donya, aw kikita nami yan. Yamakasaksi kami sinyan aw adon apakatigam nami kamayo yang makapantag kanan na makaatag ng kinabowi na way kataposan. Disti sang pukas iyan da yan sang masaid sang Tohan na Ama aw yagapakita yan kanami.
3 Adon apakatigam nami kamayo daw ono yang kikita aw dyudungug nami antak magkasambok yang kanatun pangatayan aw mapagsambok oman kita-kamo sang Tohan na Ama kipat sang kanan Anak na si Isa Almasi.
4 Agaw, yagasorat kami kamayo sini na mga butang antak makomplito yang kanatun kasowat.
Yang Kinabowi na iyan sang Kaamdagan
5 Na, yani yang pyaglaongan na dyudungug nami sikun kang Isa Almasi aw yani oman yang apakatigam nami kamayo na yang Tohan kaamdagan aw way kaduguuman adto kanan.
6 Agaw, kong magalaong kita na yagakasambok kita sang Tohan awgaid maat yang kanatun ininang na maynang yagapanaw-panaw kita adto sang kaduguuman, na, bakakun da kita kay wa kita apangagad sang bunna na indowan.
7 Awgaid kong madyaw yang kanatun ininang kay iyan kita sang kaamdagan magonawa sang Tohan na iyan sang kaamdagan, magakasambok yang kanatun pangatayan aw sabap sang dogo ni Isa na Anak ng Tohan makamang yang kariko ng mga dosa natun aw amasotti da kita.
8 Na, kong magalaong kita na way kanatun dosa, lilimbongan natun yang ginawa natun aw waa ansang pangatayan natun yang kabunnaan.
9 Awgaid kong igogod natun sang Tohan yang kanatun mga dosa, makasigoro kita na amponon nan yang mga dosa natun aw sottiun nan yang kanatun pangatayan sikun sang kariko ng ininang natun na maat kay matorid yang Tohan aw otomanun nan yang pasad nan.
10 Kong magalaong kita na wa kita makadosa, maynang yagalaong da kita na bakakun yang Tohan aw waa ansang pangatayan natun yang pyaglaongan nan.