15
Si Isa yang Tyawag na Ponowan ng Tanum
1 Ansinyan yagalaong oman si Isa sang mga inindowan nan, “Ako yang bunna na ponowan ng tanum aw yang kanak Ama yang yaga-atiman sinyan.
2 Yang kariko ng mga sanga na di amamonga, otodon ng kanak Ama. Awgaid yang kariko ng mga sanga na yamamonga, atotowan aw alinisan nan untak magkadaig yang bonga.
3 Kamo, ilinisan da kamo sabap sang pyaga-indo ko kamayo.
4 Pagpabilin kamo adi kanak aw ako magapabilin ansan kamayo. Yang sanga na di magapabilin sang ponowan, di amamonga. Mag-onawa sinyan, di kamo amamonga kong di kamo magapabilin adi kanak.”
5 Pyadayon ni Isa yang pasombingay, laong nan, “Ako yang ponowan ng tanum aw kamo yang mga sanga. Sino-sino yang magapabilin adi kanak aw ako magapabilin adto kanan, amamonga ng madaig. Awgaid kong mabiya kamo kanak, way ama-inang mayo.
6 Sino-sino yang di magapabilin adi kanak mag-onawa yan ng sanga na idami aw amagango. Yang mayninyan na mga sanga atiponon aw damian adto sang atoon untak sonogon.
7 Awgaid kong abay kamo magpabilin adi kanak aw yang mga pyaglaongan ko magapabilin sang pangatayan mayo, i-atag ko kamayo yang abir ono na apangayoon mayo.
8 Kong amamonga kamo ng madaig, amabantog yang kanak Ama. Aw ansinyan akatigaman na kamo bunna na mga inindowan ko.
9 Pyakadakowa ako ng Ama. Mag-onawa sinyan kyaoyan ta kamo. Agaw pagpabilin kamo sang looy ko.
10 Kong apangagadan mayo yang mga sogowan ko, magapabilin kamo sang looy ko mag-onawa kanak na pyangagadan ko yang mga sogowan ng kanak Ama aw yagapabilin ako sang looy nan.
11 “Pyagalaong ta kamo sini untak ka-aonan kamo ng kasowat na mag-onawa ng kasowat ko aw untak makomplito yang kasowat mayo.
12 Yani yang sogo ko kamayo na pagsikaoyay kamo mag-onawa ng looy ko kamayo.
13 Way looy na labaw pa sang looy ng otaw na magapakamatay para sang mga amigo nan.
14 Kamo, mga amigo ta kamo kong apangagadan mayo yang mga sogo ko kamayo.
15 Di da ta kamo tawagun na mga sogowanun kay yang sogowanun wa akatigam daw ono yang inangun ng amo nan. Awgaid kamo, pyagatawag ta kamo na mga amigo ko kay pyatigam ta kamo ng kariko ng pyagadungug ko adto sang kanak Ama.
16 Dili kamo yang yagapili kanak, awgaid ako yang yagapili kamayo aw pinili ta kamo untak mamonga kamo aw yang bonga mayo magapabilin taman sa taman. Aw ansinyan abir ono yang apangayoon mayo adto sang Ama sang ngaan ko, i-atag nan kamayo.
17 Na, yani yang sogo ko kamayo na pagsikaoyay kamo.”
Yang mga Yagapangintoo kang Isa Dyumutan ng mga Otaw
18 Yagalaong oman si Isa sang mga inindowan nan, “Ayaw kamo pagkatingaa kong adumutan kamo ng mga otaw na kadodonya gaid yang dumduman. Dumduma da gaid mayo na ako yang ona na dyumutan nilan.
19 Kong mag-onawa kamo ng mga otaw na kadodonya gaid yang dumduman, kyallinian gao kamo nilan. Awgaid tuna kamo kay pinili ta kamo aw pyagalain ta kamo sinyan na mga otaw. Agaw sagaw dyumutan kamo nilan.
20 Na, dumduma mayo yang pyagalaong ko kamayo na yang sogowanun dili labaw sang amo nan. Kong pyasikotan nilan ako, kamo da oman yang apasikotan nilan. Kong pyangagadan nilan yang mga pyaglaongan ko, apangagadan oman nilan yang mga pyaglaongan mayo.
21 Yang kariko ninyan inangun nilan kamayo sabap sang pagpangintoo mayo kanak kay wa nilan akilaa yang Tohan na yagasogo kanak.
22 Kong wa ako akani sang donya aw maga-indo kanilan ng kabunnaan, way gao dosa nilan. Awgaid adon, di silan makapaglaong na way dosa nilan kay pyatigam ko kanilan yang kabunnaan.
23 Sino-sino yang yagadumut kanak, yagadumut oman sang kanak Ama.
24 Kong wa nilan akitaa yang mga katingaan na ininang ko na wa aka-inang ng abir sino, way gao dosa nilan. Awgaid kinita da nilan, aw maskin maynan, dyumutan nilan ako aw yang kanak Ama.
25 Awgaid ya-inang yani untak matoman yang yakasorat sang Kitab na yagalaong, ‘Dyumutan ako nilan na waa sabay pyagasabapan.’ ”
26 Laong oman ni Isa, “Ipadaa ko kamayo yang Magtatambagay, yang Nyawa ng Tohan na maga-indo kamayo ng kabunnaan. Makani yan sikun sang Ama aw pagdatung nan, magalaong yan ng makapantag kanak.
27 Kamo oman, dait kamo magpatigam sang mga otaw ng makapantag kanak kay sikun sang pirmiro yamagad kamo kanak.