15
Yang Indowan ng mga Kaompowan aw yang Sogowan ng Tohan
(Mark. 7:1-13)
1 Ansinyan aon mga Parisi aw mga magiindoway ng Hokoman sikun sa Awrosalam na dyomood kang Isa aw yaga-osip silan kanan, laong nilan,
2 “Nanga yasopak yang mga inindowan mo sang kabatasanan ng mga kaompowan ta? Kay yakan silan maskin wa silan pakapangonaw.”
3 Tyomobag kanilan si Isa, “Kamo oman, nanga syopak mayo yang sogowan ng Tohan sabap sang pagpangagad mayo sang kabatasanan mayo?
4 Kay yagalaong yang Tohan, ‘Addati mayo yang ama aw ina mayo.’ Aw ‘Sino-sino yang magalaong ng maat adto sang ama atawa ina nan, dait yan patayun.’
5 Awgaid tuna yang pyaga-indo mayo kay yagalaong kamo na kong magalaong yang otaw adto sang ama atawa ina nan na ‘Yang tabang na i-atag ko gao kammo, di da ko ma-atag kay yatag da ko sang Tohan,’
6 na, mapakay na di da nan atabangan yang taganak nan. Agaw, sabap sang pagpangagad mayo sang kabatasanan mayo, tyaripundaan mayo yang sogowan ng Tohan.
7 Kamo na yagapakita-kita gaid na yagapangagad sang Tohan! Bunna sagaw yang pyaglaongan ng Tohan makapantag kamayo pina-agi kang Nabi Isayas na laong nan,
8 “ ‘Yani na mga otaw yagapoji kanak sang baba gaid nilan,
awgaid mawat kanak yang pangatayan nilan.
9 Way siyat yang pag-ibada nilan kanak kay yang pyaga-indo nilan mga sogowan na ininang gaid ng otaw,
awgaid yagalaong silan na sogowan inyan ng Tohan.’ ”
Yang Makabatar sang Otaw
(Mark. 7:14-23)
10 Ansinyan pyadood ni Isa yang mga otaw adto kanan aw pyagalaong nan silan, laong nan, “Paningug kamo aw sabota mayo yang ipaglaong ko kamayo.
11 Yang makabatar sang otaw dili ng pagkan na ilasak nan sang baba nan kondi yang maat na pyaglaongan na malogwa sikun sang baba nan.”
12 Ansinyan dyomood kanan yang mga inindowan nan aw yagalaong silan, “Yamatigam kaw na yadaman kammo yang mga Parisi sabap sidto na pyaglaongan mo?”
13 Tyomobag si Isa, “Yang kariko ng mga tanum na wa atanuma ng kanak Ama na adto sa sorga, agaboton.
14 Pabayai da silan kay main silan ng bota na yagagabay sang kadaigan pa na mga bota. Na, kong yang bota magagabay sang sambok oman na bota, dowa da silan na amallog sang longag.”
15 Ansinyan yagalaong si Pitros kang Isa, “Tabiya, paglaongan kanami yang mana nidtong pyagalaong mo.”
16 Yagalaong si Isa, “Na, maskin oman kamo, wa pa kadi kamo pakasabot?
17 Wa kadi kamo akatigam na yang maskin ono na akanun ng otaw adto amalasak sang tongoo aw malogwa da oman sikun sang lawas nan?
18 Awgaid yang malogwa sikun sang baba ng otaw magasikun sang pangatayan, aw idto yang amakabatar kanan.
19 Kay sikun adto suud ng pangatayan ng otaw yang maat na dumduman na mag-onawa ng pagpatay, yang pagjina, yang pag-inang ng kadopangan, pagpangawat, pamakak aw yang pagpitna.
20 Idto yang amakabatar sang otaw. Awgaid yang makan na wa pakapangonaw, di yan amakabatar kanan.”
Yang Pagpangintoo ng Bobay na dili ng Yahodi
(Mark. 7:24-30)
21 Ansinyan pyanawan ni Isa yan na banwa aw kyomadto yan sang logar na masaid sang mga syodad ng Tiros aw Sidon.
22 Sidto na logar aon sambok na bobay na dili ng Yahodi na dyomood kang Isa. Pagdood nan kanan yagapiyagit yan aw laong nan, “Kay Dato, Anak ni Daud, kallati ako! Kay yang anak ko na bobay kyasaytanan aw labi da yang kasikot nan.”
23 Awgaid wa atobag kanan si Isa. Ansinyan dyomood kanan yang mga inindowan nan aw yaga-angyo silan kanan, laong nilan, “Papanawa idtong bobay kay yag-agad-agad yan kanatun aw yagakasamok.”
24 Ansinyan yagalaong si Isa sidtong bobay, “Syogo gaid ako sang mga topo ni Israil kay mag-onawa silan ng mga karniro na yamangkawaa.”
25 Awgaid yang ininang ng bobay, syomojod yan sa atobangan ni Isa aw laong nan, “Kay Dato, tabangi ako.”
26 Awgaid tyomobag si Isa aw laong nan, “Dili ng madyaw aw akamangun yang pagkan ng mga isu aw idami adto sang mga ido.”
27 “Bunna sagaw, kay Dato,” yagalaong yang bobay, “awgaid maskin yang mga ido makakan ng momo na amallog sikun sang lamisa ng tagtomon nilan.”
28 Ansinyan yagalaong kanan si Isa, “Kay Bi, dakowa yang pagpangintoo mo! Amatoman da yang pyangayo mo.” Aw sinyan na wakto yamadyaw da yang anak nan.
Pyakadyaw ni Isa yang mga Masakitun
29 Ansinyan pyomanaw si Isa sinyan na banwa aw kyomadto yan sang kilid ng Linaw ng Jalil. Pagkatapos, syomakat yan sang butay aw pag-ingkod ansan.
30 Ansinyan madaig yang mga otaw na kyomadto kanan na yagadaa sang mga masakitun mag-onawa ng mga pongkol, sadi, bota, mga amang aw yang kadaigan pa na masakitun. Byutang nilan yang mga masakitun sang masaid sang siki ni Isa aw pyakadyaw nan yang kariko nilan.
31 Yatingaa da yang mga otaw pagkita nilan na yang mga amang yakapaglaong da, yang mga pongkol yamadyaw da, yang mga sadi yakapanaw da, aw yang mga bota yakakita da. Aw ansinyan pyoji nilan yang Tohan ng bangsa Israil.
Pyakan ni Isa yang 4000 na mga Otaw
(Mark. 8:1-10)
32 Adon pyadood ni Isa yang mga inindowan nan aw paglaonga nan, “Yamaooy ako sini na mga otaw kay too pang allaw na yamagad silan kanak aw adon waa day pagkan nilan. Di ko karim na pa-oriun ko silan na yamangkagutum kay basin amalangot silan sang daan.”
33 Yagalaong kanan yang mga inindowan nan, “Wain kita makakamang ng ipakan sang kadaig sini na mga otaw sini na banwa na mamingaw?”
34 “Pilambok yang pan mayo ansan?” yaga-osip kanilan si Isa.
“Pitombok da,” tyomobag silan, “aw tagbi da gaid yang mangkayantuk na isda.”
35 Ansinyan pya-ingkod ni Isa yang mga otaw sang lopa.
36 Kyamang nan yang pitombok na pan aw yang mga isda aw panginsokor sang Tohan. Pagkatapos, pyagapisang-pisang nan aw atagan sang mga inindowan nan untak ipangatag nilan adto sang mga otaw.
37 Ansinyan kyoman da yang kariko nilan aw yamangkabiyag silan. Pagtipon ng mga inindowan sang yamasama na pagkan, pitongka bokag yang yamapono nilan.
38 Yang kadaig ng mga otaw na yakakan, 4000 yang kausugan na way labot yang kaobayan aw yang mga isu.
39 Pagkatapos sinyan, pya-ori ni Isa yang mga otaw. Ansinyan syomakay yan sang bangka aw kadto sang banwa ng Magadan.