13
Yang Makallukay na Ayup na Lyomogwa sikun sa Dagat
1 Adon, aon kinita ko na makallukay na ayup na lyomogwa sikun sang dagat. Yani na ayup pito yang oo aw sampoo yang sowag nan. Sang kada sowag aon korona aw sang kada oo aon yakasorat na ngaan na yakasakoto sang Tohan.
2 Yang ayup na kinita ko maynang tigre, awgaid yang kanan siki maynang siki ng oso aw yang kanan baba maynang baba ng liyon. Ansinyan yatag ng dragon yang kanan kabarakat, yang kanan ingkodanan aw yang kanan dakowa na kapatot ng pagdato adto sidtong ayup.
3 Yang sambok na oo ng ayup kya-aonan singaon ng dakowa na pari na ikamatay gao nan, awgaid yamadyaw da. Agaw, yatingaa kanan yang kariko ng mga otaw sang donya aw yagapangagad silan kanan.
4 Yang kariko ng mga otaw, pyagasambayangan nilan yang dragon kay yan yang yaga-atag ng kapatot adto sang ayup. Aw pyagasambayangan oman nilan yang ayup, laong nilan, “Way makalabaw sini na ayup aw way makalaban kanan.”
5 Ansinyan tyogotan ng Tohan yang ayup na magpa-ambog aw maglaong ng maat adto kanan. Aw tyogotan oman yan na magdato sang donya sa suud ng 42 na bowan.
6 Agaw, yagalaong da yang ayup ng maatay adto sang Tohan aw ininsolto nan yang kanan ngaan, yang kanan pyaga-uyaan aw yang kariko na yanag-uya adto sa sorga.
7 Tyogotan oman yan na mapagtanam sang mga sakop ng Tohan sampay na amatalo nan silan. Aw yatagan yan ng kapatot ng pagdato sang kariko ng mga tribo, banwa, pyaglaongan aw bangsa.
8 Aw ansinyan asambayangan yang ayup ng kariko ng mga otaw sa babawan ng donya na wa akalista sang libro na ansan yakasorat yang ngaan ng mga otaw na yatagan ng kinabowi na way kataposan. Sang wa pa akabaoy yang donya yakalista da yang mga ngaan nilan sinyan na libro na tyakmagan ng Karniro na pyatay.
9 Yang kariko mayo na aon taringa, paningugi mayo ng madyaw yani na pyaglaongan.
10 Abir sino na otaw, kong kahanda ng Tohan na adakupun yan untak ma-inang ng allang,
amadakup yan aw ma-inang yan ng allang.
Aw maskin sino na otaw, kong kahanda ng Tohan na apatayun ng ispada,
apatayun yan ng ispada.
Agaw, sabap sinyan kinaanglan na yang mga sakop ng Tohan magpabagsug sang pagpangintoo nilan aw magsabar sang maskin ono na kasikotan na madatung kanilan.
Yang Makallukay na Ayup na Lyomogwa sikun sang Lopa
11 Ansinyan aon oman kinita ko na makallukay na ayup na lyomogwa sikun sang lopa. Yani na ayup, dowa yang sowag nan na mag-onawa ng sowag ng karniro, awgaid yang kanan tingug maynang tingug ng dragon.
12 Syarigan yan ng ona na ayup untak gamitun nan yang kariko ng kapatot nan. Agaw, pyugus nan yang kariko ng manosiya sa babawan ng donya untak magsambayang sang ona na ayup na aon dakowa na pari na ikamatay gao nan awgaid yamadyaw da.
13 Aon oman dakowa na mga katingaan aw tanda na ininang ng ikadowa na ayup. Sa adapan ng kariko ng mga otaw pya-owan nan yang atoon sikun sang langit.
14 Na, sabap sang mga tanda na pya-inang kanan ng ona na ayup ilimbongan nan yang mga otaw sa babawan ng donya. Syogo nan silan untak mag-inang ng barhala sang pagbantog sang ona na ayup na tinibas singaon ng ispada awgaid yabowi pa.
15 Aw yatagan oman yang ikadowa na ayup ng kapatot mag-atag ng napas sidtong barhala na ya-inang sang porma ng ona na ayup. Agaw, yakapaglaong da yang barhala aw pyatay ng ayup yang maskin sino na di marim magsambayang sidto na barhala.
16 Aw pyugus nan yang kariko ng mga otaw, mga ilado aw dili ng ilado, mga sapian aw miskinan, mga allang aw dili ng allang, na madawat ng marka sang karinto na arima atawa guya nilan.
17 Aw sino-sino yang di magpamarka sang ngaan ng ayup atawa yang nomiro na yagamana sang kanan ngaan, di silan makabili atawa makapagbarigya.
18 Na, kinaanglan na aon kammo katigam untak masabot mo yang mana ng nomiro ng ayup. Kay yang nomiro tanda ng ngaan ng otaw. Aw yani yang nomiro, 666.