22
Yang Tobig na Maka-atag ng Kinabowi
1 Adon, pyakita kanak ng malaikat yang tobig na maka-atag ng kinabowi na way kataposan na yang katinaw mag-onawa ng kristal aw yang pyagasikunan adto sang ingkodanan ng Tohan aw yang Karniro.
2 Yaboos yani na tobig sang tunga ng dakowa na karsada sidto na syodad. Sang kada kilid ng tobig yatobo yang kaoy na maka-atag ng kinabowi. Yamamonga yan ng makasampoo aw dowa ng sangka toig aw maka-isa ng sambowan. Aw yang mga daon sinyan makapagkadyaw sang mga sakit ng kariko ng mga otaw abir ono yang bangsa.
3 Way maskin ono na akitaun ansan na syodad na yaharam ng Tohan.
Iyan san yang ingkodanan ng Tohan aw yang Karniro aw yang mga sogowanun nan magasambayang kanan.
4 Makita da nilan yang parangay ng Tohan aw adto sang guya nilan yakasorat yang ngaan ng Tohan.
5 Waa day gabi. Agaw, di da silan magakinaanglan ng ilawan atawa yang sigay ng suga kay yang Tohan na kanatun Tagallang yang allag nilan. Aw magadato da silan taman sa taman.
Yang Pagbarik ni Isa
6 Adon, yagalaong oman kanak yang malaikat, “Bunna aw kasarigan yang kariko sini na pyaglaongan na yadungug mo. Yang Tohan na kanatun Tagallang na yagapatigam ng kanan pyaglaongan adto sang mga nabi, yagasogo ng kanan malaikat untak ipatigam nan sang kanan mga sogowanun yang mga butang na madari da maitabo.”
7 “Paningug kamo!” laong ni Isa. “Masaid da yang pagbarik ko. Kadyaw ng ginawa ng mga otaw na yagapangagad sang pyaglaongan na pyatigam ng Tohan ansini na sorat.”
8 Na, ako yani si Yahiya yang yakadungug aw yakakita sang kariko sini na mga butang. Aw pagkatapos ko madungug aw makita yang kariko sinyan, syomojod ako sa adapan ng malaikat na yagapakita kanak sang kariko sinyan untak magsambayang kanan.
9 Awgaid yagalaong yan kanak, “Ayaw pagsojod kanak kay mag-onawa kita na sogowanun ng Tohan, na mag-onawa oman sang kammo mga kalomonan aw mga nabi kipat yang kariko na yagapangagad sang pyaglaongan ansini na sorat. Yang Tohan gaid yang dait mo pagsambayangan!”
10 Ansinyan yagalaong oman kanak yang malaikat, “Ayaw pagtagowa yang pyatigam ng Tohan ansini na sorat kay masaid da domatung yang wakto na amaitabo yang kariko sinyan.
11 Pasagdi yang mga otaw na yaga-inang ng maat aw yang maskin ono na haram na magapadayon sang ininang nilan. Awgaid yang yaga-inang ng madyaw aw matorid, dait na padayonon nilan yang ininang nilan na madyaw. Aw yang mga otaw na sotti sang pagtanaw ng Tohan, dait na magapabilin silan ng sotti.”
12 Ansinyan yagalaong oman si Isa, “Paningug kamo kay sang di amadogay magabarik da ako. Aw adaun ko yang baras na i-atag ko sang kada isa sobay sang ininang nan.
13 Ako yang Alip aw Ya, yang ona aw yang maori, aw ako yang pagsogod aw yang kataposan ng kariko.
14 “Kadyaw ng ginawa ng mga otaw na yagalaba sang kanilan dagom untak ma-inang silan ng sotti. Amangkasowat silan kay yatagan silan ng kapatot na makasuud sang syodad pina-agi sang powertaan aw makakan silan sang bonga ng kaoy na maka-atag ng kinabowi na way kataposan.
15 Awgaid di makasuud sang syodad yang mga otaw na darowaka, mga baliyan, mga yagajina, mga yagapamatay, mga yagasambayang sang mga barhala, aw yang kariko ng mga bakakun aw limbongon.
16 “Ako yani si Isa yang yagasogo ng kanak malaikat untak ipatigam nan yani na mga butang adto kamayo na mga jamaa sang yagakatuna-tuna na mga banwa. Ako yani topo ni Soltan Daud aw tyawag oman ako ng bitoon na yagasilat ng omaga.”
17 Ansinyan yagalaong yang Nyawa ng Tohan aw yang bobay na akawinun, “Adi kaw!” Aw yang kariko ng yakadungug sinyan magalaong oman, “Adi kaw!” Sino-sino kamayo yang yamangga aw marim mag-inum, dood kamo aw inum kamo ng tobig na maka-atag ng kinabowi na way kataposan kay pa-inumun kamo ng way bayad.
Yang Kataposan na Pyaglaongan
18 Ako yani si Yahiya yagalaong sang kariko ng yakadungug sang mga pyaglaongan ng Tohan ansini na sorat na sino-sino yang magadogang ng pyaglaongan sang yakasorat ansini, ipadatung kanan ng Tohan yang mga batalo na syorat ansini.
19 Aw sino-sino yang makamang ng pyaglaongan sikun sang pyatigam ng Tohan ansini na sorat, akamangun oman ng Tohan yang baras na para kanan. Na, di da yan makakan sang bonga ng kaoy na maka-atag ng kinabowi na way kataposan aw di da oman yan makasuud sang sotti na syodad na pyagalaong ansini na sorat.
20 Na, si Isa na yagasaksi na bunna yang kariko ng yakasorat ansini yagalaong, “Bunna sagaw na masaid da yang pagbarik ko.”
Amin, kay Tagallang Isa, pagbarik da!
21 Na adon, yang kariko mayo na sakop ng Tohan, kaoyan pa gao kamo ni Isa na kanatun Tagallang. Amin.
Wassalam