Idikel
Lainuwanega
Islael lavedi Maimaituwa otina a daboke bi maimaituwa kaikaiyovudi a laulauduneyedi. Tedi sauga matabuna matanemo gebo a voivoiyedi, taunana aubaina ḡaviya i wai aninedi te a lauyovoḡedi bi ai doli nawedi edi dobumo. Bi Idikel ba pilsi Livai damnemo, tana Maimaituwa i wai sumaḡe bi i voteyeteye. Diuda dobunemo i miyamiya bi Babilon edi tauwaiḡaviya a tava te a lauyovoḡedi te tana bi Diuda lavedi matabudi ai doli nawedi edi dobumo.
Tana ḡome i miyamiya bi Maimaituwa i vine te taugiuwatana bi giuna i vite. Diuda lavedi Babilonmo miyemiyedi bi kota ḡesaudi Yelusalemmo miyamiya gwasedi vaitedi. Bi Maimaituwa tainuwatau giudi Idikel i giu vitena gado, “Bamoda sa lau kasaḡaiḡaiyeguna ba kedi ḡaviya yài aninedi te sa lau yovoḡedi bi edi taun sa ka gebogebo.”
Sauginemo Diuda lavedi Maimaituwa a laulau kasaḡaiḡaiye ba Babilon edi tauwaiḡaviya a tava te Yelusalem a ka gebogebo, maibena dolinemo i giugiuna mainana.
Idikel ba Maimaituwa ena giu Islael lavedi i taitainuwataudi, te edi kauwa gebogebodimo maso a nuwavitala bi visuvisumo a miya. Bamoda sa nuwa vitalana Maimaituwa lisinemo ba ya munaḡedi edi dobumo.
2
Idikel bi Diuda lavedi ḡesaudi vaitedi a pani nawedi Babilonmo a miyamiya. Laḡan ḡemota Idikel i miyamiya te wailove i kitana ba galewa nuwawasena bi Maimaituwa namalina i kita.
Maimaituwa Idikel i vine te taugiuwatana
1 Sauginemo Bada namalina e kitakita ba tagu e miyatulu doḡamo te e laupwalasoku bi kalina e vaiye i giuna gado, “Lava ota, kwa moito bi lisimmo yà gagali.”
2 Tana i gagagali ba Maimaituwa Aluwina i wai wanavugu te i solu waimoitogu bi lisigumo i giuna gado,
3 “Lava ota, yà giugiukamaḡem Islael lavedi lisidimo. Tedi a lau kasaḡaiḡai bi a miya tautauliyeguna maibena wala edi magumagula.
4 Kwa nawana bi lavedi ba nopodi gudugududi bi laulaukasaḡaiḡaidi kwa giuwedi, te tagu Bada wailewapanigu yà giugiukamaḡemna kalinagu kwa giuwedi.
5 Bamoda lavedi laulaukasaḡaiḡaidi sai beyavaiyem ee geḡa bi sa sibe te taugiuwatana ba vaitedi.”