17
Bada ena waianina matailina
1 Ablam ena kwalabu 99 bi Bada i laumaḡata lisinemo bi i giuwena gado, “Tagu Maimaituwa wailewapani guletigu. Egu etaḡa kwa nawa mote bai ḡesau kuma voiye waigebo,
2 taunana aubaina tagu egu waianina ḡaiḡailisina yà sakosako tam lisimmo bi em tubulelesa sa wapa gulata.”
3 Ablam tuwapekana i wai tupagwalie bi i laudulu doḡamo. Kamaina bi Maimaituwa i giuwena gado,
4 “Tagu egu waianina lisimmo te tam muliḡa ba dam wapewapedi itedi.
5 Niganana isam yà vitavitale Ablam te Eiblaḡam. Banina tam em tubulelesemo kaka dobu bi dobu ḡalibona sa tubuḡa.
6 Tagu yà kavisuvisum te dobu bi dobu nopodimo em tubulelesa sa wapa gulata bi tedi lisidiḡa kaka ḡalibona sa moito saḡa.
7 “Tagu egu waianina bagibagina yà voivoiyena tam bi em tubulelesa lisimimo, te em tubulelesa kaka ya tuwa watana. Tagu em Maimaitua bi kota em tubulelesa edi Maimaituwa.
8 Keinan doḡana matabuna emi animiya nawa ba tam bi em tubulelesa yà vitevitemi. Bi tagu edi Maimaituwa bi emi doḡa yà vitevite gwasemi.”
9 Maimaituwa Eiblaḡam i giuwena gado, “Tam bi em tubulelesa egu waianina ko kaididi.
10 Bi waianina matailina tam bi olooloto matabudi em tubulelesemo tunimimo kwapibwali ko voiye.
11 Temi kwapibwali ko voivoiyena ba waianina matailina tagu bi temi mododemo.
12 Bi libilibi oloolotodi sa tubuḡa laḡan 8 mulidimo, egu mataila tunidimo ko voiye. Ko voiye natunatumi bi kota emi taupaula natunatudi bi olooloto matabudi em dammo.
13 Bamoda em dammo libilibi oloolotodi sa tubuḡa bi laḡan 8 mulidimo ba kwapibwali lisidimo ko voiye. Bi mainana laḡannemo emi taupaula kona gimelidina ba kwapibwali lisidimo ko voiye, te egu waianina matailina lisimimo ya kena nonoḡa.
14 Bi aiyai olotona mote waianina matailina tuninemo ba tana egu waianina i waidoukotona ba tana mote egu dam lavedi nopodimo.”
Bada Salai i giuwapa te Aisik ya bewa
15 Maimaituwa Eiblaḡam i giuwena gado, “Mwanem Salai mote kumai isa munaḡe Salai bi yà waiisa vitalena Sela.
16 Tagu yà kavisuvisu bi tana natum ya bewa bi kota yà kavisuvisu te ena tubulelesemo dobu babadidi bi ḡaliḡalibona sa tubuḡa.”
17 Eiblaḡam tuwapekana i waitupagwaliḡe matana doḡamo bi noponemo nuwana i waigwaigwai bi taunaḡa i giu munaḡena gado, “Ḡemoḡemotina oloto ena kwalabu 100 bi yai natuna? Bi kota Sela ena kwalabu 90 bi yai natuna?”
18 Eiblaḡam Bada i giuwena gado, “Bi Ismael bainewa, maso ḡemoḡemotina kuna kavisuvisu?”
19 Maimaituwa i giuwena gado, “Geḡa mwanem yai natuna te gomana olotona ya bewa bi kwa isana Aisik. Bi tagu egu waianina yà voiyena tana bi ena tubulelesa lisidimo ya kena nonoḡa.
20 Em waibaḡa Ismael aubaina kaikana e vaiye bi tana kota yà kavisuvisu te yai natunanatuna bi ena tubulelesa sa wapa gulata. Tana ḡaliḡalibona matabudi 12 dobumo tamedi bi ena dam ya didiga.
21 Tagu egu waianina Aisik lisinemo yà voiye, te Sela yai bewana bokina kwalabunemo niga mainana nawalaina noponemo.”