37
Diyousep bi tuwatuwaḡana
1 Deikap tamana wala Keinanmo i miyamiya bi tana kota ḡome i miya.
2 Niga ba Deikap ena dam edi titikuna.
Diyousep tana ewali valivaliuna ena kwalabu 17 bi tana tuwatuwaḡana vaitedi sipu a labelabedi. Mba libilibidi tedi Deikap mwanemwanena Bila bi Silpa natunatudi. Bi Diyousep tuwatuwaḡana gebogebo baibaiḡa a voivoiyedina, tamana i giuwe.
3 Deikap, Diyousep i wai nuwavai kauwe mote mai natunatuna ḡesaudi. Banina Deikap i wai magula bi Diyousep i tubuḡa. Taunana aubaina Islael Diyousep puyo i vite: Kwama kulina waimatakanikanina.
4 Bi natunatuna tautautuwaḡa a kita te tamedi ba Diyousep taunaḡa i ḡoeḡoe kauwe. Ḡome tedi tasidi a wai ḡinane bi lisinemo a giugiu ḡasiḡasi.
5 Dudubala ḡemota Diyousep tana lauboni i kita. Bi laḡannemo mba laubonina tuwatuwaḡana i giugiuwedi ba, tedi tana a daboke otiye.
6 Tana i giuna gado, “Koi beyavaiya tagu lauboni niga mainana e kita.
7 Tada matabuda dabimo witi te bwainidi bi te panidi. Bi tagu egu bwaina i moito bi temi matabumi emi bwaina ba tagu egu bwaina a moito waikwaivivili bi a lauduneye.”
8 Bi tuwatuwaḡana tana ai talayena gado, “Tam kwa ḡoeḡoena waibada kwa vai bi kwai badayemai, ee?” Ḡome tedi tana a daboke otiye banina tana ena giu bi ena lauboni aubaidi.
Diyousep tuwatuwaḡana a kuneye Idip lavedi lisidimo
12 Laḡan ḡemota Diyousep tuwatuwaḡana tedi a nawa Sekemmo tamedi ena ḡamoḡamo au labedimo.
13 Bi Deikap natuna Diyousep i giuwena gado, “Tagu yà ḡoeḡoena tam, kwa nawa Sekemmo tuwatuwaḡam ḡamoḡamo sa labelabedina lisidimo.”
Bi Diyousep tamana i giuwena gado, “Kamaina yà nawa.”
14 Kamaina bi Deikap i giuwena gado, “Kwa nawa bi tuwatuwaḡam bi ḡamoḡamo kwa kitedi, tedi kamaina ee geḡa? Bi kwa nato te kwa giuwegu.” Kamaina bi tana Ḡiblon wapunemo bi i nawa Sekem.
Bi laḡannemo Diyousep Sekemmo i tavatava
15 ba tana i wai nuwanaina. Bi oloto ḡemota i wai talayena gado, “Tam bai kwa tavutavuḡe?”
16 Bi Diyousep ena giu i waimunena gado, “Tagu tuwatuwaḡagu ya tavutavuḡedi. Kamaina ee geḡa te maso kuna giuwegu bamo ḡome tedi ḡamoḡamo sa labelabedi?”
17 Kamaina bi oloto ena giu i waimunena gado, “Tedi kage niga ḡome bi kaikana a nawa. Tagu e vaiyedi a giuna gado, ‘Tama ka nawanawa Dotan.” Kamaina bi Diyousep tuwatuwaḡana i kaiwatedi te Dotan diyanemo i banavidi.
18 Bi muliḡa kaka Diyousep tedi lisidimo ya tava bi tedi a wai kita te manekemo a kita. Kamaina bi tana kana pota a yesi bi a ḡoeḡoena maso a vunu.
19 Taudiḡa ai ogatalana gado, “Niga taunana taulaulauboni i tava.
20 Tai peki bi gauba domna ḡemota noponemo ta pwalaḡe yovoḡe. Kamaina bi ta nawa tamada ta tainuwatau te Diyousep ba gunuwala ḡamoḡamodi a vunu. Kamaina bi ta kita te ena laubonidi banidi sa tubuḡa e geḡa.”
21 Laḡannemo Lubin edi giu i vaivaiye ba tana Diyousep waiyawasanina noḡotina noponemo i saḡa bi i giuwedina gado, “Egu lava, mote ena yawasana tama bwali.
22 Bi gauba domna kavakavana noponemo ta pwalaḡe yovoḡe. Bi mote bai gebogebona lisinemo tama voiye. Bi niga ḡome mote kwasinina ima tosi.” Lubin mainana i giuna banina tana noponemo oga i talatalaḡi te muliḡa maso Diyousep i wai yawasani bi i giukamaḡe tamana lisinemo.
23 Kamaina bi laḡannemo Diyousep tuwatuwaḡana lisidimo i tavatava, tedi a laulaupotina tana ena kwama kulikulina waimatakanikanina i kotekotena a lisi kamaḡe.
24 Kamaina bi tedi gauba domna kavakavana noponemo a pwalaḡe yovoḡe.
25 Diyousep dom noponemo mai i miyamiya bi tedi a miya a kanikani bi a wai kita te Ismael lavedi a kitedi a yovoyovo. Tedi Giledmo a modina bi a nawanawa Idipmo. Bi edi kamelo dabedimo kani anitai panepanedi bi bunama tabudi bi tabudi ai geludi bi a yovoyovo.
26 Kamaina bi Diuda tuwatuwaḡana i giuwedina gado, “Bamoda tasida tai peki bi ena peki tai malimaliuwena, ba yaḡolo damonemo bai ta banavi?
27 Mba tasiotida, bai ta voiyena ba ta nawa Ismael lavedi lisidimo ta gimalaye bi mote bai tama voiye lisinemo. Banina tana kwasinida isuna.” Kamaina bi tasitasina bi tuwatuwaḡana tana ena ogatala ai aninena.
28 Bi laḡannemo tauwaikunekune a tavatava, Diyousep tuwatuwaḡana tana dommo a solu saḡe bi mane siluva 20 luvana mai a gimalaye, Ismael lavedi lisidimo. Bi tedi ai doli nawe Idipmo.
29 Bi laḡannemo Lubin dommo i tava bi i kita te Diyousep mote ḡome, tana i wai nuwaboya kauwa bi ena gala i lisidi.
30 Kamaina bi Lubin i munaḡa tasitasina lisidimo bi i giuwedina gado, “Tasida niga ḡome geḡa, niganana tagu bai ya voiye?”
31 Kamaina bi tedi gouti a vunu bi kwasininemo Diyousep ena kwama ai kwasini.
32 Tedi mba kwamana a vai nawe tamedi lisinemo. Bi a giuwena gado, “Niga kwamana tama ke vai bi kwa kita, aiyai ena kwama?”
33 Deikap gala i kitakita, ba i wai nuwaboya kauwa bi i giuna gado, “Aiyoi, mba natugu ena kwama. Bodu ḡamoḡamodi ḡasiḡasidi natugu a vunu bi a lisi waidabalali.”
34 Kamaina bi Deikap ma nuwaboyana ena gala i lisidi bi gala yadiyadidi i kotedi bi laḡan wapewapedi nopodimo i ḡaba gulata.
35 Bi ḡome tana natunatuna oloolotodi bi waiwaivinidi a tava tamedi lisinemo bi giumo a kaka nuwauba. Bi tana yaḡolo i daboka kauwa bi i giuna gado, “Tagu natugu nuwaboyana kamaina te yà ḡaba peki.” Kamaina bi Islael natuna Diyousep aubaina i ḡaba gulata.