9
Maimaituwa i giuwapa Nowa lisinemo
1 Maimaituwa Nowa bi natunatuna i kavisuvisudi bi i giuwedina gado, “Koi natuna dabalala bi dobu koi wanavu.
2 Ḡamoḡamo doḡamo miyemiedi, daledaledi, mwanuwa bi iyana matabudi temi sa nailemi bi temi koi badaedi.
3 Dolinemo kanigidava e vitemi. Bi niganana mwali miyemiyedi vaitedi ko kanidi.
4 Mwali ḡemota, musala ma kwasinina, mote koma kani, ei ḡakemina banina kwasinemo yawasana ya kenakena.
5 “Aiyai bi lava yai pekina ba kovoḡa ya vai, kota ḡamoḡamo lava yai pekina ba ḡamoḡamona sai peki.
6 Maimaituwa lava i voiyedina ba kitedi mainana tana
bi aiyai lava i lai pekina ba lava ḡesaudi kota tana sa laipeki.
Banina Maimaituwa lava i voiyena
kitana mainana tana.
7 Bi temi koi natunatuna dobumo te natunatumi sai natuna dabalala bi dobu matabuna sai wanavu.”
8 Bi Maimaituwa Nowa bi natunatuna i giuwedina gado,
9 “Ei, koi beyavaiya, tagu egu waianina tam bi emi tubulelesa lisimimo yà voivoiye
10 bi mwali yawayawasanidi matabudi, mwanuwa bi ḡamoḡamo vaitedi, gulamo kona potipoti yovona ba muliḡa sai natunatuna watana.
11 Tagu egu waianina yà voivoiyena lisimmo, te dobu bi mwali matabudi miyemiyedi dobumo mote yàmai avali munaḡedi.”
12 Maimaituwa Nowa i giuwena gado, “Niga waianina matailina yà voivoiyena ya kena nonoḡa mododemo, tagu bi tam bi ḡamoḡamo yawayawasanidi vaitedi.
13 Tagu giyoumo waliwaliyoyo yà sakona. Mba ya wai mataila te waianina lava bi bai matabudi dobumo lisidimo.
14 Laḡannemo bi giyou yada i sumana ba waliwaliyoyo ya laumaḡata.
15 Mba tagu egu waianina e voivoiyena lisimmo, yà noḡoti te mote bai laḡannemo ḡamoḡamo yawayawasanidi matabudi yàmai avali munaḡedi.”