3
Diyoba i wai uvala te mote maso i tubuḡa
1 Diyoba ena lava vaitedi a miyana laḡan 7 mulidimo, kaka Diyoba gagali i waitubu, ena tubuḡa laḡanina i laupaliibe.
2 Bi i giuna gado,
3 “Egu tubuḡa laḡanina Maimaituwa kwa bwali kamaḡe.
Dudubalinemo e tubuḡa bi mabai a kitagu.
Bi a giuna a gado, ‘Weeo gomana olotona i tubuḡa,’
mba dudubalina e daboke, kwa bwali kamaḡe.
4 Mba laḡanna ba yai boimatuwa!
Maimaituwa noke nuwana ya yavuḡa,
ḡome mote yanayana ima kena.
5 Boimatuwa pilina mba laḡana ya suma yaḡosi.
Kaka yada dubadubana ya sumatawi,
bi dudubala wai nuwa nainailina mba laḡanna ya sumatawi wainaili.
6 Boimatuwa pilina mba dudubalina ya pili yaḡosi.
Niga dudubalina mote imai nuwavisu munaḡa maibena laḡan ḡesaudi kwalabu noponemo.
Mba dudubalina mote sima i iyevi munaḡe.
7 Mba dudubalina kwa voiye te wai bani geḡana,
ḡome mote maso wainuwavisu bi yasisi.
8 Taubwalabwalau kwa giuwedi te mba laḡana sa pasili otiye.
Tedi mabai mwata a sunesuneḡidina mba laḡanna sa pasili.
9-10 Mba dudubalina mote tinagu bwagana i gudu.
Tana egu pilipili i kadidigi otiye.
Taunana aubaina mba oleolelina kipolidi sai dudubala.
Mba dudubalina laḡan ya egeli bi mote ima yana makai.
11 Bai aubaina egu tubuḡa laḡannemo mote e peki?
Bai aubaina tinagu bwaganemo mote e peki?
12 Bai aubaina tinagu i bewabewa watawatagu?
Bai aubaina i waisusu watawatagu?
13 Egu tubuḡa laḡannemo bi e peki maso niganana tunigu i kalaḡauku.
Bi niganana maso ba egu pekimo e wai yawasi.”