42
Diyoba, Bada ena giu i waimunedi
1 Diyoba, Bada ena giu i waimunena gado,
2 “Niganana e sibe te tam bai matabuna tauvoiyedi,
bi em noḡota kwa voivoiyena mote kaka aiyai ima gudu.
3 Kuna giuweguna gado, ‘Diyoba bai aubaina em giu waibani geḡedimo egu nuwauyauya kwai talavitavitale?’
Giukauwa te bai kauwidi e giugiuwedina banidi mote yà sibedi,
bi kauwa nananaka otidi mote luvagu te ya sibedi.
4 Kuna giuna gado, ‘Diyoba, kwai beyavaiya bi yà giu!
Yài talayem bi egu giu kwaimune.’
5 Wala ba lava ḡesaudi a giugiuwatamna e vaivaiye,
bi niganana kaka tagu mata otigumo e kitam.
6 Egu gagali matabudi a voiyegu te ei dabauba,
tagu gobusemo bi kovumo e topana ba ya waimaḡati munaḡegu te e laukuvasa.”
Bada, Diyoba i kavisuvisu
7 Bada, ena gagali Diyoba lisinemo i wai waikovi ba kota Teman olotona isana Elifasi i giuwena gado, “Tam mote ku giukauwa mai egu taupaula Diyoba, taunana aubaina tam bi em lava labu vaitedi, lisimimo e medi.
8 Kamaina te kau oloolotodi 7 bi kota sipu oloolotodi 7 bi ko nawa egu taupaula Diyoba lisinemo bi emi sewasewa ko gabudi. Bi egu taupaula Diyoba aubaimi ya laupali bi bai aubaimi yai baḡaena ba mainana yà voiye te emi ai giugiu yà noḡotikamaḡedi. Bi tagu mote yàma kovoḡimi banina temi mote giukauwa ko giuwe maibena egu taupaula Diyoba.”
9 Kamaina bi Elifasi Teman olotona, Bildad Suwa olotona bi Diyofa Namet olotona Bada ena giuvavasaḡa a voiye, dabanemo tana Diyoba ena pali i waianine.
10 Diyoba ena lava aubaidi i laupali mulinemo ba Bada, Diyoba maula i vite munaḡe bi dabanemo i wailautawi.
11 Tana valevaletina, nuvunuvuna bi ena lava a sibesibena matabudi a tava ena ani miyamo bi vaitena a soi. Banina Bada, pilipili Diyoba i vite bi niganana i yawasana munaḡa taunana aubaina ena lava a tava waiyebonena aubaina. Bi tedi ḡemoḡemotaḡa mane bi nima komakoma goldimo voivoiyedi a natomedi Diyoba a vite.
12 Dolinemo Bada, Diyoba i kavisuvisu bi mwali wapapawapa i vite. Bi ena wainuwatoi mulinemo ba i kavisuvisu gulatena kaka dolinemo banina niganana 14 tausan sipu i vite, kamelo 6 tausan, bulumakau 1 tausan bi donki waivinidi 1 tausan.
13 Bi kota natunatuna oloolotodi 7 bi waiwaivinidi faiona i vite.
14 Natuna waivinina tautuwaḡa i wai isana Dimaima, taumodona Kesiya bi damodamona isana Kelen-Ḡapuk.
15 Bi Diyoba natunatuna waivinidi muleledi mote mai dobumo waivini ḡesaudi. Bi tana i giuwedi te laḡannemo ya pekina ba ena waiguyau sa soiye te dubu ten bi ḡemoḡemotaḡa sa legau bi kota nuvunuvudi mote nuwedi ima yavuḡa.
16 Niga mulinemo Diyoba i miya gulata te kwalabu 140 a kovi bi ena tubulelesa wai 4-na i kita.
17 Bi i magula kauwa kaka i peki.