5
A kum sipsip anun o God
1 Uniri an wasiso torom mot a kum mugumugu na lotu, uni iau kai a mugumugu elar kut nam mot. Ra o Karisito i taramo a kum ngunungut, a tama tari, ma numur ra in nanpat, an rarakon una nun a minamar.
2 Mot in tamtamabat a kum sipsip anun o God, ra di pitar tari torom mot sur mot in tamtamabat det. Gong mot papam, uni a taro det ungongos tar mot uni, mot in papam, uni mot ut mot nemi, elar nama nemnem anun o God. Mot in papam, uni mot ut mot nem doko i, ma gong mot papam kut nama nemnem sur a mani.
3 Gong mot ulabo pas mot, ma mot warkurai dekdek det, ra di sa pitar tar det una numot a tamtamabat. A magiramot in wakak sur a kum sipsip det in tama i ma det in muri.
4 Ra a Labino Tene Tamtamabat anun a kum sipsip in nanpat, mot in rakon a kukup na minamar ra a minamarino ken rop.
5 Lenkutkai ra, mot a kum barman ma a kum toraro, mot rop mot in ser unatino pas mot torom det a kum mugano tamot. Mot in unatino pas mot epotor tamot etetalai, i ra anumot a wakak na ememar. Uni a Buk Tabu i watungi lena,
“O God i nget det ra det ser ulabo pas det,
ikut i maris det ra det ser unatino pas det.” Snd 3:34
6 I mo ra, mot in unatino pas mot utuntudu ina dekdek na laman o God, sur in ulabo pas mot una du bung ra i nemi.
7 Mot in pitar rop tar anumot a kum mamaut torom o God, uni i ser tamtamabat mot.
8 Mot in tumarong, ma mot in tamtamabat wakak anumot a nilaun, uni anumot a ebar, o Satan, i wan tuptupukus elar nama laion. I kukukuk tuptupukus, ma i sisio sur lako taro sur in nan det.
9 Mot in tur dekdek una nurnur ma mot in turbati, uni mot tasmani lena, a kum tistisi mot una rakrakon bual rop det taramo a kum ngunungut, elar nami ra mot taramo i.
10 Ikut o God, i a God na marmaris, ma un o Karisito i kabo pas mot sur mot in kis tomo nami una nun a minamar ra ken rop. Ra mot sa taramo tar a ngunungut un tu nat na du bung kut, numur i ut in uwakak pas mot melet, in udekdek mot ma in warut mot sur mot in tur dekdek.
11 Anunu kut a dekdek ma ken rop. Amen.
A kum ururop na wasiso
12 O Sailas i warut iau ra a tumus a nat na pas ri torom mot. O Sailas a tising una nurnur, ra a nurnur doko uni. Una pas ri, a nemi sur an udekdek mot ma an wasiso talapor una marmaris mulus anun o God. Mot in tur dekdek uni.
13 A taro na lotu ra det kis nin o Babilon, det pitar anundet a marmaris torom mot. Det a taro na pipilok anun o God elar kutkai nam mot. O Mak, a nutung una nurnur, i kai i pitar anun a marmaris torom mot.
14 Ra mot etorom, mot in nem etetalai mot nama egom na marmaris.
A malmal torom mot rop ra mot tagun o Karisito.